Jueces

3 Rígi̱ nindxu̱u̱ xuajin dí Jeobá niniñuuʼ mu mundriga̱ tsáʼkhá náa israelitas bi̱ túyáá xóo nixmijná gajmiún bi̱ kúwá náa Canaán 2 (xígi̱ kaʼnii gúyáá xóo exmijná israelitas bi̱ ndiʼkhún eguwáʼ rakúwá bi̱ nimbá miʼtsú xóó tséyáá rígi̱): 3 Mbá witsiin xa̱bu̱ ñajunʼ filisteos ga̱jma̱a̱ xúgíinʼ cananeos, sidonios mangiin heveos bi̱ nikúwá náa kúbá Líbano, nagi̱ʼdu̱u̱ asndu náa kúbá Baal-Hermón asndu náa Lebó-Hamat.* 4 Ikhiin nini̱ makujmaa á mu israelitas nunimbu̱ún kiʼtáñajunʼ dí Jeobá nixnúu Moisés mu maʼthúún wajin xiʼñúúnʼ. 5 Ikha jngóo israelitas nikúwá náa majñu̱únʼ cananeos, hititas, amorreos, perizitas, heveos ga̱jma̱a̱ jebuseos. 6 Israelitas nidiin wa̱ʼxiúnʼ xa̱bu̱ xuajin buʼko̱, ga̱jma̱a̱ wa̱ʼxiúnʼ ikhiin nixnúún mudiin e̱jñu̱ún, ma̱ngaa nigi̱ʼdi̱i̱ ndiyamajkhún dioses ndrígu̱ún.

7 Israelitas nini̱ dí ra̱májánʼ náa iduu Jeobá, nimbumún kuyáá Jeobá Dios ndrígu̱ún ga̱jma̱a̱ ndiyamajkhún Baal, ma̱ngaa poste rí mitsúʼkháan.* 8 Ikha jngóo Jeobá nikásnga̱ñu̱u̱nʼ kaʼñúún israelitas ga̱jma̱a̱ niniñúúnʼ* náa ñawúunʼ Cusán-Risataim rey ndrígóo Mesopotamia.* Israelitas nini̱ ñajuunʼ Cusán-Risataim mbá migiñuʼ tsiguʼ. 9 Índo̱ israelitas nitakáñíí Jeobá rí mambáñún, Jeobá nixniúún mbáa bi̱ maʼni káwíin: Otniel a̱ʼdióo Quenaz giʼtio̱o̱ Caleb. 10 Espíritu santo* ndrígóo Jeobá nirígá náa Otniel, ni̱jkha̱nú ninindxu̱u̱ mbáa bi̱ naʼnimbánuu xkujndu náa Israel, índo̱ Otniel nigájnuu gáxmína̱ʼ niʼngo̱o̱ niʼnigajma̱a̱ Cusán-Risataim rey ndrígóo Mesopotamia,* numuu rí Jeobá nixnájxi̱i̱ náa ñawúunʼ. 11 Ikhú nikúwá tsímáá israelitas bi̱ kúwá náa mbaaʼ rúʼko̱ mbá 40 tsiguʼ. Ikhú Otniel a̱ʼdióo Quenaz nikháñuu.

12 Mbu̱júu̱ israelitas nigi̱ʼdi̱i̱ nini̱ dí ra̱májánʼ náa iduu Jeobá. Ikha jngóo Jeobá niniñuuʼ dí Eglón rey ndrígóo Moab magiʼdoo itháán tsiaki̱i̱ ki xóo israelitas, numuu dí ikhiin kúwá runi̱ dí ra̱májánʼ náa iduu Jeobá. 13 Ma̱ngaa rey Eglón ni̱ʼkha̱ kagui̱i̱n ammonitas ga̱jma̱a̱ amalequitas, mu muxmijná gajmiún israelitas ga̱jma̱a̱ nitu̱ʼu̱u̱n náa xuajin Jericó. 14 Israelitas nini̱ ñajuunʼ Eglón rey ndrígóo Moab mbá 18 tsiguʼ. 15 Ikhú israelitas nitakáñíí Jeobá rí mambáñún ga̱jma̱a̱ Jeobá nixniúún mbáa bi̱ maʼni káwíin: Ehúd a̱ʼdióo Guerá mbáa benjaminita bi̱ najmuu ñawún xti̱yu̱u̱ʼ. Nda̱wa̱á israelitas nixuʼmaa Ehúd mu maʼga̱ gáʼni numuu Eglón rey ndrígóo Moab. 16 Ehúd niʼni mbá espada dí xíníʼ mbá nájma̱ níjniúu ga̱jma̱a̱ mbá 38 centímetros* dí mbaʼ, nda̱wa̱á nirájkha náa xtiyu mújúunʼ náa agoo xtíñuu. 17 Ikhú niʼni numuu Eglón, rey ndrígóo Moab, mbáa xa̱bu̱ bi̱ mba̱a̱.

18 Índo̱ niguámbóo nixnájxu̱u̱, Ehúd niʼtángawún xa̱bu̱ bi̱ niguwáʼ gúni numa. 19 Nda̱wa̱á dí ni̱jkha̱nú náa trámiinʼ xándú bi̱ ki̱ʼni̱i̱ ga̱jma̱a̱ itsí bi̱ nikúwá náa Guilgal, Ehúd nitanga̱a̱ ga̱jma̱a̱ niʼthúu̱n rey: “Tátá rey, gúʼdoo mbá dí ma̱tha̱a̱nʼ i̱ndó ikháán”. Ikhú rey niʼthí: “¡Wíí gáʼni!”. Ikhú mbá xúgíinʼ bi̱ numbayíí nigájnún. 20 Índo̱ mbawíí rey niguanúu náa guʼwá dí grígu tsudií,* ikhú Ehúd nikuʼmaminaʼ ga̱jma̱a̱ niʼthúu̱n: “Gúʼdoo mbá ajngóo Dios dí mbaʼyóoʼ ma̱tha̱a̱nʼ”. Índo̱ niʼdxawuun rígi̱, ikhú rey nitu̱jxu̱u̱ náa xíliu̱u̱* dí naʼtáñajunʼ. 21 Ehúd nixmátriya̱ʼ ga̱jma̱a̱ ñawún xti̱yu̱u̱ʼ espada dí frájkha náa xtiyu mújúunʼ ga̱jma̱a̱ nixkrua̱ʼa̱ náa awúu̱n Eglón. 22 Mbá kañiiʼ espada nito̱ʼo̱o̱ náa awúu̱n asndu ixu̱u̱, ga̱jma̱a̱ xtangoo nirúgoo espada numuu dí Ehúd táxmatri̱ya̱a̱’, asndu nigájnuu ambóo rey. 23 Ehúd nigájnáa ga̱jma̱a̱ náa ventana, nirúguáa guʼwá dí grígu tsudií ga̱jma̱a̱ llave. 24 Nda̱wa̱á dí Ehúd nigájnáa, ikhú bi̱ numbayíí rey nitangiín, ndiyáá dí kúgoo xkrugoo guʼwá dí grígu tsudií ga̱jma̱a̱ llave. Ikha jngóo nithi: “Mbáa kraʼaa ramíjxúuʼ”. 25 Mba̱yu̱u̱ʼ niguáʼthi̱i̱n, ikhú nixmiéjúúnʼ. Índo̱ ndiyáá dí rey tsémbáʼta̱a̱ xkrugoo guʼwá dí grígu tsudií, nigún gúya̱ llave ga̱jma̱a̱ nirmbaʼtáá. ¡Ikhú ndiyáá dí mbayííʼ kri̱ga̱a̱ rey nikháñúu!

26 Ehúd nigáyúu índo̱ ikhiin kúwá runi̱ gajímíjná, ninújnga̱a̱ náa trámiinʼ xándú bi̱ ki̱ʼni̱i̱ ga̱jma̱a̱ itsí. Ni̱jkha̱núu májánʼ náa Seirá ga̱jma̱a̱ nda̱a̱ dí nigíʼnuu. 27 Índo̱ ni̱jkha̱núu niʼni dí mawán chi̱ji̱ʼ náa kúbá Efraín. Israelitas niguájtáan gajmiún náa kúbá, ikhaa frígu ra̱jkha̱ ginii náa inún. 28 Ikhú niʼthún: “Gaguwa̱ʼla mu̱ʼgua numuu dí Jeobá nixnájxíin xa̱bu̱ sia̱nʼ moabitas náa ñawánla”. Ikhiin nigún kidxuuʼ, mu moabitas xágáñún nigi̱ʼi̱i̱n náa nakidiin ga̱jma̱a̱ náa mañu Jordán. Túniña̱a̱ʼ dí nimbáa manújngoo. 29 Mbiʼi rúʼko̱ niradíin mbá 10,000 moabitas, xa̱bekha bi̱ guáʼdáá tsiaki̱i̱ ga̱jma̱a̱ bi̱ tsémíñún, nimbáa tákríya̱a̱ʼ. 30 Xúʼko̱ kaʼnii niʼni dí israelitas nitañajúúnʼ moabitas, ikhú nikúwá tsímáá israelitas bi̱ nikúwá náa mbaaʼ rúʼko̱ mbá 80 tsiguʼ.

31 Nda̱wa̱á dí nikháñuu Ehúd, nigíiʼ Samgar, a̱ʼdióo Anat, bi̱ nigudíin mbá 600 filisteos ga̱jma̱a̱ ixi̱ kúdú dí nuxnún ga̱jma̱a̱ xedi̱, ikhaa ma̱ngaa niʼni káwíin xa̱bu̱ Israel.