Rí na̱jkha̱ inún Romanos

2 Á mu ikháán i̱ndó naratánumúún eʼwíinʼ, tséʼniuu má tsáa nindxa̱a̱ʼ na̱nguá kaʼyaaʼ ikháán maratha̱ rúʼko̱. Índo̱ naratánumúún eʼwíinʼ natasngájma dí kaʼyaaʼ matamíniiʼ numuu dí natani̱ xó má eni̱ ikhiin. 2 Nduʼyáálu rí Dios naʼni rí jmbu índo̱ nandi̱ʼi̱i̱n cuenta xa̱bu̱ ga̱jma̱a̱ ikhaa maʼthí rí mumíniiʼ bi̱ nuni̱ rígi̱.

3 Mú ikháán bi̱ naratánumún bi̱ nuni̱ rúʼko̱, lá naku̱ma̱a̱ʼ rí makríña̱a̱nʼ índo̱ Dios gándi̱ʼi̱i̱n cuenta dí ikháá má tani̱ mangáán ráʼ. 4 Lá tsékrua̱ʼa̱ʼ rí májánʼ wéñuuʼ a̱jkiu̱u̱n, nagi̱ʼthu̱u̱n ga̱jma̱a̱ naʼngo̱o̱ a̱jkiu̱u̱n xáʼ. Lá tsétayáá rí Dios nandoo mambáyaaʼ mu mata̱nga̱a̱ a̱jkia̱a̱nʼ náa dí ra̱májánʼ dí nitani̱ ráʼ. 5 Numuu rí gújkhúʼ wéñuuʼ a̱jkia̱a̱nʼ ga̱jma̱a̱ rí tsétanga̱a̱ a̱jkia̱a̱nʼ náa dí ra̱májánʼ dí nitani̱, xtaa ratiéjxi̱i̱ sia̱nʼ náa ikháán mu matamíniiʼ mbiʼi rí Dios manda̱ʼa̱a̱ cuenta náa rí nindxu̱u̱ jmbu eʼyoo ikhaa. 6 Ikhaa maxnúu mámbáa rí kaʼyoo magruigú xó má rí niʼni: 7 Ikhaa maʼni rí makuwá kámuu ga̱jma̱a̱ rí xuñúnʼ xáʼchúu, bi̱ nduyáʼ muni̱ rí májánʼ, xa̱bu̱ buʼko̱ nduyáʼ gamajkhu índo̱ naʼngu̱u̱n nuni̱ rí májánʼ; 8 mú Dios maʼni mumíniiʼ ga̱jma̱a̱ makiʼnáa kaʼñúún bi̱ nuni̱ xkujndu ga̱jma̱a̱ tsénimbu̱u̱n náa rí gajkhun, mú nunimbu̱u̱n náa dí ra̱májánʼ. 9 Marigá ga̱ʼkhu̱ ga̱jma̱a̱ tsingíná* náa xúgíinʼ bi̱ nuni̱ dí ra̱májánʼ, ginii náa judío nda̱wa̱á náa griego. 10 Mú marigá gamajkhu ga̱jma̱a̱ tsímáá náa xúgíinʼ bi̱ nuni̱ rí májánʼ, ginii náa judío nda̱wa̱á náa griego. 11 Numuu rí Dios tséraʼwíin xa̱bu̱.

12 Ikha jngóo bi̱ nini̱ aʼkhá bi̱ tséniʼnuuʼ xtángoo ndrígóo Dios makhañún má asndu xúniʼnuuʼ xtángoo rúʼko̱, mú xúgíinʼ bi̱ nini̱ aʼkhá bi̱ nuniʼnuuʼ xtángoo rúʼko̱ majuiʼthá dí mugiʼníí xó má naʼthí náa xtángoo. 13 Numuu rí bi̱ i̱ndó nudxawíín rí naʼthí náa xtángoo ndrígóo Dios, na̱nguá ni̱ndxu̱ún míjíinʼ xa̱bu̱ náa inuu Dios, bi̱ nunimbáníí rí naʼthí náa xtángoo, buʼko̱ bi̱ majuiʼthá rí ni̱ndxu̱ún míjíinʼ xa̱bu̱. 14 Numuu rí xa̱bu̱ numbaaʼ bi̱ na̱nguá guáʼdáá xtángoo nunimbáníí xtángoo rígi̱ maski má ikhiin raguáʼdáá xtángoo, mú nusngajma dí rígá xtángoo rígi̱ náa a̱jkiu̱ún. 15 Rí ikhiin nuni̱ nasngájma rí xtángoo kiʼnirámáʼ náa a̱jkiu̱ún, nakujmaa rígi̱, índo̱ ku̱ma̱ ndrígu̱ún naʼni mbuyáá á mu dí kúwá runi̱ nindxu̱u̱ májánʼ o ra̱májánʼ. 16 Rígi̱ gárígá mbiʼi rí Dios majmiuu Cristo Jesús mu manda̱ʼa̱a̱ cuenta náa rí xa̱bu̱ nuni̱ ga̱jma̱a̱ nundxa̱ʼwa̱míjna̱ ngu̱ʼwa̱á, rígi̱ nindxu̱u̱ ajngáa rí májánʼ dí ikhúúnʼ nataráʼa.

17 Á mu ikháán naratá rí nindxa̱a̱ʼ judío ga̱jma̱a̱ najmaaʼ xtángoo ndrígóo Moisés mu matambáyuminaʼ, natanimbamínáʼ numuu rí nambájxa̱a̱ʼ ga̱jma̱a̱ʼ Dios, 18 á mu natayáá* xúgíʼ rí nandoo ikhaa ga̱jma̱a̱ naʼnga̱a̱ʼ nakruaʼaʼ dí nindxu̱u̱ májánʼ numuu rí nitanigajma̱a̱ Xtángoo, 19 á mu natayáá gajkhun rí natambáñún bi̱ tsékruigu̱u̱n ga̱jma̱a̱ nindxa̱a̱ʼ mbá aguʼ náa bi̱ kúwá náa mikrína, 20 rí nindxa̱a̱ʼ mbáa bi̱ naxprígún bi̱ sgundiin ga̱jma̱a̱ nindxa̱a̱ʼ mbáa bi̱ naʼsngúún e̱ji̱n majkhiinʼ, natayáá xú káʼnii phú nindxu̱u̱ ku̱ma̱ ga̱jma̱a̱ rí gajkhun dí na̱ʼkha̱ náa Xtángoo..., 21 ikha jngóo, ikháán bi̱ narasngáá i̱mba̱a̱, lá tsérasngáminaʼ ráʼ. Ikháán bi̱ naratáraʼa “xátani̱ kuʼwáʼ”, lá natani̱ kuʼwáʼ ráʼ. 22 Ikháán bi̱ naratá “xátani̱ aʼkhá ga̱jma̱a̱ʼ i̱mba̱a̱”, lá natani̱ aʼkhá ga̱jma̱a̱ i̱mba̱a̱ ráʼ. Ikháán bi̱ tsíyáaʼ gátañu̱u̱nʼ xándú, lá natani̱ kuʼwáʼ náa guʼwá rí nduyamajkhún xáʼ. 23 Ikháán bi̱ natanimbamínáʼ rí xtaʼdáá xtángoo, índo̱ tsitanimbáníí* Xtángoo, lá tsitríyaʼ majkhuíí Dios ráʼ. 24 Numuu rí xó má kiʼnirámáʼ, “xa̱bu̱ numbaaʼ nutanumáá mbiʼyuu Dios ga̱jma̱a̱ numala ikháanʼ”.

25 Rí matrujtu xtóo xuyuuʼ tsáʼkháanʼ gíʼdoo numuu á mu natanimbáníí xtángoo. Mú, á mu nanújngurámaanʼ* xtángoo, rí nitrujtu xtóo xuyuuʼ tsáʼkháanʼ naʼni xóo rí asndu tátrujtu. 26 Á mu mbáa xa̱bu̱ naʼnimbánuu rí naʼthí náa Xtángoo maski ajndu tárujtu xtóo xuyuuʼ tsáʼkhúun, lá tsékujmaa rí májáanʼ nindxu̱u̱ maski asndu tárujtu xtóo xuyuuʼ tsáʼkhúun xáʼ. 27 Mbáa xa̱bu̱ bi̱ na̱nguá nirujtu xtóo xuyuuʼ tsáʼkhúun naʼnimbo̱o̱ Xtángoo, ikhaa masngájma rí xtaʼdáá aʼkháanʼ dí nanújngurámaanʼ* xtángoo maski ajndu ikháán xtaʼdáá xtángoo ga̱jma̱a̱ rí nitrujtu xtóo xuyuuʼ tsáʼkháanʼ. 28 Numuu dí raʼkháa judío bi̱ nakujmaa mbájnuu ni má rí matrujtuminaʼ mbájnii náa xuyaaʼ. 29 Bi̱ nindxu̱u̱ judío ñajuunʼ asndu náa a̱jkiu̱u̱n, rí nitii* nithu asndu náa a̱jkiu̱u̱n, rígi̱ naʼni espíritu santo* raʼkháa xtángoo. Dios naʼni mba̱a̱ xa̱bu̱ buʼko̱, raʼkháa mbáa xa̱bu̱ú.