Esdras

7 Nda̱wa̱á dí nirígá xúgíʼ rúʼko̱, náa mbá xúgíʼ tsiguʼ rí niʼtáñajunʼ rey Artajerjes ndrígóo Persia, nitanga̱a̱ Esdras.* Ikhaa nindxu̱u̱ a̱ʼdióo Seraya, a̱ʼdióo Azarías, a̱ʼdióo Hilquías, 2 a̱ʼdióo Salum, a̱ʼdióo Sadoc, a̱ʼdióo Ahitub, 3 a̱ʼdióo Amarías, a̱ʼdióo Azarías, a̱ʼdióo Merayot, 4 a̱ʼdióo Zerahías, a̱ʼdióo Uzí, a̱ʼdióo Buquí, 5 a̱ʼdióo Abisúa, a̱ʼdióo Finehás, a̱ʼdióo Eleazar, a̱ʼdióo Aarón bi̱ nindxu̱u̱ ndxajkun bi̱ kayá edxu̱u̱. 6 Esdras bugi̱ nindxu̱u̱ bi̱ ni̱ʼkha̱a̱* náa Babilonia. Nindxu̱u̱ mbáa bi̱ najmañuu májánʼ bi̱ naʼtáriya̱ʼ Xtángoo ndrígóo Moisés, dí Jeobá, Dios ndrígóo Israel nixnún xa̱bu̱ xuajñún. Numuu dí Jeobá Dios ndrígóo nimbáyúu ikhaa, ikha jngóo rey nixnúu xúgíʼ rí ninda̱ʼa̱.

7 Tikhuun israelitas, ndxajkun, levitas, bi̱ nuni̱ ajmúú, bi̱ nuñewa̱a̱n xkrugua, bi̱ nuñajunʼ náa guʼwá rí nduyamajkuíí Dios* nitsima̱án náa Jerusalén índo̱ niʼni juwan tsiguʼ rí xtáa raʼtáñajunʼ rey Artajerjes. 8 Esdras ni̱jkha̱nú náa Jerusalén dí maʼni witsu igu̱nʼ, índo̱ maʼni juwan tsiguʼ dí xtáa raʼtáñajunʼ rey. 9 Nigájnuu náa Babilonia mbiʼi rí timbá igu̱nʼ ga̱jma̱a̱ ni̱jkha̱nú náa Jerusalén rí timbá mbiʼi rí witsu igu̱nʼ, núma̱a̱ má rí Dios ndrígóo niñewu̱u̱n májánʼ wéñuuʼ.* 10 Esdras niʼniratoo a̱jkiu̱u̱n* ga̱jma̱a̱ niʼnigajmaa Xtángoo ndrígóo Jeobá, niʼnimbánuu ga̱jma̱a̱ niʼsngúún ikha ga̱jma̱a̱ xtángoo xa̱bu̱ Israel.

11 Rígi̱ nindxu̱u̱ mbá copia ndrígóo i̱yi̱i̱ʼ dí rey Artajerjes nixnúu Esdras bi̱ nindxu̱u̱ ndxajkun ga̱jma̱a̱ bi̱ naʼtáriya̱ʼ májánʼ, mbáa bi̱ najmañuu májánʼ kiʼtáñajunʼ ndrígóo Jeobá ga̱jma̱a̱ ikha dí na̱jkha̱ inún xa̱bu̱ Israel:

12 *“Artajerjes rey ndrígu̱ún reyes, mu maʼga inuu Esdras, bi̱ naʼtáriya̱ʼ Xtángoo ndrígóo Dios bi̱ naʼtáñajunʼ mekhuíí: Tsímáá wéñuuʼ gáraxtaa. 13 Nitañajunʼ rí xúgíinʼ israelitas bi̱ kúwíin náa xuajin rí natáñajunʼ, ndxajkun, levitas mu magún ga̱jma̱á nindxa̱a̱ʼ náa Jerusalén á mu nandún. 14 Numuu dí rey ga̱jma̱a̱ bi̱ mbá juwiin bi̱ nuxnáá consejo nuxuʼmáán mu midxu̱u̱ʼ náa Judá ga̱jma̱a̱ náa Jerusalén mu ma̱ta̱ya̱a̱ á mu nunimbaníí Xtángoo ndrígóo Dios ndrígáaʼ, dí ikháán má xtaʼdáá.* 15 Ma̱ngaa madiédxuʼ plata, oro dí rey gajmíi̱n bi̱ nuxnáá consejo, nandún muxnáá Dios ndrígóo Israel, bi̱ xtáa náa Jerusalén. 16 Ma̱ngaa madiédxuʼ xúgíʼ plata, oro dí gúxna* bi̱ kúwá náa mbayuuʼ Babilonia ga̱jma̱a̱ regalo dí gúxna xa̱bu̱ xuajin ga̱jma̱a̱ ndxajkun dí na̱ʼkha̱ a̱jkiu̱ún muxna mu majmaaʼ náa goʼwóo Dios ndrígu̱ún, dí rígá náa Jerusalén. 17 Xájyaa’ mu majmaaʼ mbújkha̱a̱ rúʼko̱, mu maratsi̱i̱n xedi̱, mugu̱ e̱jmba̱a̱, e̱jín múgú ga̱jma̱a̱ xúgíʼ rí kaʼyoo náa tsigijñaʼ rí tsígáʼ ga̱jma̱a̱ tsigijñaʼ dí magadírámuuʼ, mbaʼyóoʼ maraxnajxí náa nakarámáʼ tsigijñaʼ náa goʼwóo Dios ndrígáaʼ náa Jerusalén.

18 Plata ga̱jma̱a̱ oro dí gápídu̱únʼ gajmala náa rí májánʼ gáta̱ya̱a̱ ikháán gajmiáanʼ a̱ngia̱a̱nʼ, xó má nandoo Dios ndrígala. 19 Ma̱ngaa maraxnajxí náa inuu Dios náa Jerusalén xúgíʼ xua̱a̱, copa o i̱ʼwáʼ dí gakánaʼ mu majmaa náa goʼwóo Dios ndrígáaʼ. 20 Asndu ndiéjunʼ má dí gáʼyóoʼ maraxna náa goʼwóo Dios, atani̱ numáá ga̱jma̱a̱ mbújkho̱o̱ rey.

21 Ikhúún rey Artajerjes, nitañajúúnʼ xúgíinʼ tesoreros* bi̱ kúwi̱i̱n xígií náa narámaaʼ a̱jkha̱ʼ* náa mañu Éufrates, rí muxnajxi̱i̱ mbá nacha̱ ndxajkun Esdras, bi̱ naʼtáriyaʼ xtángoo ndrígóo Dios bi̱ naʼtáñajunʼ mekhuíí, xúgíʼ rí gánda̱ʼa̱: 22 I̱ndó ma̱ndoo makhánáá, 3,420 kilo* plata, 22 mil litro* trigo, 2,200 litro* vino ga̱jma̱a̱ 2,200 litro* aceite, idú asndu nguáthá má gánda̱ʼa̱. 23 Xúgíʼ rí Dios bi̱ naʼtáñajunʼ mekhuíí gátañajunʼ rí maguma náa goʼwóo, guni̱ ga̱jma̱a̱ xúgíʼ a̱jkia̱la. Mu xúʼko̱ Dios bi̱ naʼtáñajunʼ mekhuíí xákiʼnáa kaʼñún e̱jñu̱ún rey ni má xa̱bu̱ xuajin bi̱ kúwá náa naʼtáñajunʼ rey. 24 Ma̱ngaa nitañajunʼ rí ndxajkun, levitas, bi̱ nuni̱ ajmúú ga̱jma̱a̱ bi̱ nudi̱i̱ ajua̱nʼ, bi̱ nuñewa̱a̱n xkrugua, bi̱ nuñajunʼ náa guʼwá rí nduyamajkuíí Dios o eʼwíinʼ bi̱ nuñajunʼ náa goʼwóo Dios xáʼyoo murumiin xúgíʼ rí kaʼyoo muni numáá o xúgíʼ rí na̱nda̱ʼa̱ rey.

25 Ikháán Esdras, ga̱jma̱a̱ʼ ku̱ma̱ rí nixnáʼ Dios ndrígáaʼ,* atandri̱gi̱i̱n bi̱ muñambáá ga̱jma̱a̱ bi̱ nunimbaníí xkujndu ndrígu̱ún xa̱bu̱ xuajin bi̱ kúwá náa xígií náa narámaaʼ a̱jkha̱ʼ, xúgíinʼ bi̱ najmañún xtángoo ndrígóo Dios ndrígáaʼ. Ma̱ngaa gíʼmaa musngúún xtángoo rígi̱ asndu tsáá bi̱ xóó tséʼninuuʼ. 26 Asndu tsáá bi̱ tséʼnimbo̱o̱ Xtángoo ndrígóo Dios ndrígáaʼ ga̱jma̱a̱ xtángoo ndrígóo rey, núkhu mbaʼyóoʼ makhañúu o muxkriyaaʼ náa xuajin o mixtanda̱ʼa̱a̱ maxná mbújkha̱ʼ o maʼga guʼwá e̱jua̱nʼ”.

27 ¡Gaguma mba̱a̱ Jeobá, Dios ndrígu̱ún wajin xiʼñúnlu, bi̱ nigíwa̱a̱n náa a̱jkiu̱u̱n rey rí maʼndoo maʼni mitsaanʼ goʼwóo Jeobá dí rígá náa Jerusalén! 28 Dios nisngájmuʼ ngajua rí tsétumuu* ga̱jma̱a̱ niʼni dí rey maʼni a̱jkiu̱u̱n kaʼyoʼ xó má bi̱ nuxnáá consejo ga̱jma̱a̱ príncipes ndrígióo bi̱ guáʼdáá itháán numún. Ikha jngóo ndi̱ya̱a̱ tsiaki̱i̱ numuu rí Jeobá Dios ndrígóʼ nixtáa ga̱jma̱á nindxu̱ʼ ga̱jma̱a̱ ikhú nigímbíin tikhuun bi̱ kuya̱ edxu̱u̱ náa Israel mu matsimuʼ gajmíʼ.