Hechos rí nini̱ apóstoles

16 Ikhú ni̱jkha̱nú náa Derbe ga̱jma̱a̱ nda̱wa̱á ni̱jkha̱ náa Listra. Ikhí nixtáa mbáa xa̱bi̱i̱ Jesús bi̱ nigumbiʼyuu Timoteo. Ikhaa nindxu̱u̱ a̱ʼdióo mbáa a̱ʼgú judía bi̱ ma̱ngaa ninindxu̱u̱ xa̱bi̱i̱ Jesús, mú anu̱u̱ nindxu̱u̱ xa̱bu̱ griego. 2 Ma̱ngaa a̱ngiu̱xu bi̱ kúwá náa Listra ga̱jma̱a̱ náa Iconio, nithi rí májánʼ ga̱jma̱a̱ numuu ikhaa. 3 Pablo nindoo rí maʼga ga̱jma̱a̱ Timoteo, mú ginii nirujtu xtóo xuyuuʼ tsáʼkhúun ga̱jma̱a̱ numún judíos bi̱ kúwá náa xuajen rúʼko̱, numuu rí xúgíinʼ nduyáá rí anu̱u̱ nindxu̱u̱ xa̱bu̱ griego, ikhú ni̱jkha̱ ga̱jma̱a̱. 4 Índo̱ kúwá ragún náa mámbá xuajen, nithúún a̱ngiu̱xu awan dí niri̱ya̱ʼ apóstoles ga̱jma̱a̱ bi̱ kuya̱ edxu̱u̱* bi̱ kúwá náa Jerusalén mu rí munimbáníí. 5 Rígi̱ niʼni rí a̱ngiu̱xu bi̱ nagimbíi̱n maʼni itháán gújkhúʼ fe ndrígu̱ún, ga̱jma̱a̱ ni̱jkha̱ raʼni itháán mbaʼin mámbá mbiʼi.

6 Ma̱ngaa nigún ranújngún náa Frigia ga̱jma̱a̱ náa mbayuuʼ Galacia, numuu rí espíritu santo* tániñúnʼ mutaraʼa náa mbayuuʼ Asia. 7 Índo̱ niguánú náa Misia, nigíʼ matu̱ʼu̱u̱n náa Bitinia, mú Jesús nijmuu espíritu santo mu xániñúnʼ magún ikhí. 8 Ikhú ninújngún náa Misia ga̱jma̱a̱ niguájtaán náa Troas. 9 Índo̱ niʼni mbruʼun, Pablo rígá mbá rí niwasngájmáá:* Ndiʼyoo mbáa xa̱bu̱ bi̱ na̱ʼkha̱ náa Macedonia ga̱jma̱a̱ wíji̱ raʼtákáñuu: “Ayi̱ Macedonia gátambáyuxuʼ”. 10 Nda̱wa̱á rí Pablo niwasngájmáá rígi̱, ikhú ni̱jkuáxu̱ Macedonia, numuu rí ni̱jkuánúxu ndi̱ya̱a̱ rí Dios nindxaʼwúxu muʼguá ikhí mu mutaráʼaxu ajngáa rí májánʼ.

11 Ikha jngóo, nirajtuunxu barco náa Troas mu mu̱ʼguáxu náa Samotracia. Imbo̱o̱ mbiʼi nigájnuxu mu muʼguá náa Neápolis, 12 ga̱jma̱a̱ nda̱wa̱á ni̱jkuáxu Filipos, xuajen dí kaʼyoo Roma rí gíʼdoo itháan numuu náa Macedonia. Niguanúxu ikhí nguáthá mbiʼi. 13 Rí mbiʼi sábado* nigájnuxu náa rawuunʼ xuajen ga̱jma̱a̱ ni̱jkuáxu náa rawuunʼ mbá mañu, nindxa̱ʼwa̱míjna̱xu rí ikhí marigá náa rí ma̱ndoo mutajkáanxu.* Ikhú nitrigáanʼxu̱ ikhí ga̱jma̱a̱ nigíʼdi̱i̱ nitamíjná gajmiúxu gu̱ʼu̱ bi̱ nagimbíi̱n ikhí. 14 Mbáa a̱ʼgu̱ bi̱ mbiʼyuu Lidia xtáa raʼdxawun. Ikhaa na̱ʼkha̱ náa xuajen Tiatira ga̱jma̱a̱ nagujua̱ xtíin miʼñuu, ma̱ngaa ikhaa ndaʼyamajkuu Dios. Ikhú Jeobá* nimbáʼtoo kájxi̱ a̱jkiu̱u̱n mu makro̱ʼo̱o̱ rí Pablo xtáa raʼthí. 15 Nda̱wa̱á dí Lidia gajmíi̱n bi̱ kúwá náa goʼwóo nijngún iyááʼ, ikhaa niʼtákáñuxu: “Á mu ikháanʼ ndu̱ya̱a̱ rí ikhúúnʼ ni̱ndxu̱ʼ jmbii náa Jeobá,* aguwaʼ mu maguanála náa goʼwóʼ”. Ikhú ni̱jkuáxu numuu rí ikhaa niʼnikháñunxu.

16 Mbóo mbiʼi índo̱ ni̱jkuáxu náa rí mutajkáan, nixkamaaxu mbáa wáxá bi̱ gíʼdaa mbáa giñán xkawi̱i̱ʼ* bi̱ naʼthí dí marigá nda̱wa̱á. Ikhaa niʼni rí maguáʼdáá wéñuuʼ mbújkha̱a̱ patriúun numuu rí naʼtáriyaʼ dí marigá nda̱wa̱á. 17 Wáxá bugi̱ ni̱jkha̱ kidxu̱xu náa na̱jkuá gajmiúxu Pablo ga̱jma̱a̱ niʼthí gakhi̱i̱: “Xa̱bu̱ bugi̱ ni̱ndxu̱ún xa̱bi̱i̱ Dios bi̱ phú mba̱a̱, ga̱jma̱a̱ nutaraʼala ga̱jma̱a̱ numuu kamba̱a̱ rí maʼni káwáanʼla”. 18 Mba̱yu̱u̱ʼ mbiʼi niʼni rígi̱. Ikhú Pablo niskoo ga̱jma̱a̱ nitanga̱a̱ niʼthúu̱n giñán xkawi̱i̱ʼ:* “Natañájuanʼ ga̱jma̱a̱ mbiʼyuu Jesucristo rí magajnáaʼ náa ikhaa”. Núkhu má giñán xkawi̱i̱ʼ nigájnáa.

19 Mú, índo̱ patriúun ndiyáá rí nánguá xóo mudaaʼ mbújkha̱a̱ ikhú nirajtuwiin Pablo ga̱jma̱a̱ Silas ga̱jma̱a̱ nixmajtiin asndu náa xuáá náa inún xa̱bu̱ ñajunʼ. 20 Índo̱ nixnajxi̱i̱n náa inún xa̱bu̱ ñajunʼ, nithi: “Xa̱bu̱ bugi̱ kúwá runi̱ jngi̱i̱n xa̱bu̱ xuajen. Ikhiin ni̱ndxu̱ún judíos 21 ga̱jma̱a̱ nuthi mbá kiʼsngáa dí ragíʼmaa munixu̱, numuu rí ni̱ndxu̱xu̱ xa̱bu̱ romanos”. 22 Ga̱jma̱a̱ xa̱bu̱ ningujxi̱i̱n kudiin. Ikhú xa̱bu̱ ñajunʼ nixkuʼtu xtíñún, ga̱jma̱a̱ nitañajunʼ rí muxpajtiin ga̱jma̱a̱ xkuíyá. 23 Nda̱wa̱á rí nixnúún, nixudi̱i̱nʼ náa guʼwá e̱jua̱nʼ ga̱jma̱a̱ nitañajuíínʼ bi̱ nañewu̱u̱n guʼwá e̱jua̱nʼ rí majngawiin májánʼ. 24 Índo̱ guámbá nijuiʼtañajuíínʼ, ikhaa nikudiinʼ náa guʼwá e̱jua̱nʼ ga̱jma̱a̱ nikudaa’ rajkúún náa ixi̱.*

25 Xóo tikhu nduʼun Pablo ga̱jma̱a̱ Silas kúwá rutajkáan ga̱jma̱a̱ nuni̱ mba̱a̱ Dios ga̱jma̱a̱ ajmúú, ga̱jma̱a̱ eʼwíinʼ bi̱ kúwá náa guʼwá e̱jua̱nʼ nudxawíín. 26 Ikhú nda̱a̱ tsu̱ma̱ niʼxma gakhi̱i̱ wéñuuʼ rí asndu niʼbajngaa xúgíʼ guʼwá e̱jua̱nʼ. Núkhu nimbaʼtoo xúgíʼ xkrugua ga̱jma̱a̱ nijkuíiʼ cadena dí kaxtuʼwún ga̱jma̱a̱ xúgíinʼ. 27 Índo̱ bi̱ nañewu̱u̱n guʼwá e̱jua̱nʼ ndijui̱i̱ ga̱jma̱a̱ ndiʼyoo dí xkrugoo guʼwá e̱jua̱nʼ kambaʼta, ikhú niríyáʼ espada ndrígóo mu maxíyaminaʼ numuu rí nikumu̱u̱ dí bi̱ tri̱ʼi̱i̱n náa guʼwá e̱jua̱nʼ nigáñún. 28 Mú, Pablo niʼthúu̱n gakhi̱i̱: “¡Xátaxíyaminaʼ! ¡Numuu rí xúgiáanʼ má kúwáanʼxu gi̱i̱!”. 29 Ikhú bi̱ nañewu̱u̱n guʼwá e̱jua̱nʼ ninda̱ʼa̱ aguʼ, nigáyúu nito̱ʼo̱o̱ awúu̱n ga̱jma̱a̱ asndu naguáʼaan nismbáti̱go̱o̱ náa rajkúu Pablo ga̱jma̱a̱ Silas. 30 Nda̱wa̱á niguwíin ga̱jma̱a̱ niʼthún: “Xabuanii, ndiéjunʼ gáʼyóoʼ ma̱ni̱ mu makríñu̱u̱nʼ rá.” 31 Ikhiin niriʼñáán: “Atanimbaaʼ xtayáá Tátá Jesús, mu xúʼko̱ ikháán gajmiáanʼ bi̱ kúwá náa guʼwáaʼ makáwáanʼ”. 32 Ikhú nitaruʼúún ajngá rawuunʼ Jeobá* ikhaa gajmíi̱n xúgíinʼ bi̱ kúwá náa goʼwóo. 33 Ikhaa má hora rúʼko̱, bi̱ nañewu̱u̱n guʼwá e̱jua̱nʼ ni̱jkha̱ kagu̱u̱n mu maʼjñáa náa nigawúúnʼ. Nda̱wa̱á ikhaa gajmíi̱n xúgíinʼ bi̱ kúwá náa goʼwóo nijngún iyááʼ. 34 Ikhaa niʼthún rí matu̱ʼu̱u̱n náa goʼwóo ga̱jma̱a̱ rí matri̱gi̱i̱n náa mesa mu muphiʼtsu. Ma̱ngaa nidxuu wéñuuʼ gajmíi̱n xúgíinʼ bi̱ kúwá náa goʼwóo numuu rí niguánú ninimbu̱ún kuyáá Dios.

35 Índo̱ nijtsi, xa̱bu̱ ñajunʼ nixuʼmiin comesiú mu muthán bi̱ nañewu̱u̱n guʼwá e̱jua̱nʼ: “Atrawíin xa̱bu̱ buʼko̱”. 36 Bi̱ nañewu̱u̱n guʼwá e̱jua̱nʼ niʼthúu̱n Pablo: “Xa̱bu̱ ñajunʼ nixuʼmiin tikhun xa̱bu̱ dí nájmáanʼ ikháanʼ magajnáanʼla. Ikha jngóo, agajnáanʼla ga̱jma̱a̱ guʼgua̱a̱ʼla tsímáá”. 37 Mú, Pablo niʼthún: “Nixpajtiáanxu náa inún xa̱bu̱ asndu xóó túyáá á mu guáʼdáá aʼkhúxu ikháanʼ rí ni̱ndxu̱xu̱ʼ xa̱bu̱ romanos, ga̱jma̱a̱ nixudáanʼxu náa guʼwá e̱jua̱nʼ. Ga̱jma̱a̱ rí xúgi̱ nandún murawáanʼxu ngu̱ʼwa̱á xáʼ. ¡Na̱nguá! Gaguwáʼ ikhiin gúrawáanʼxu”. 38 Ikhú comesiú nitangiín gúthún xa̱bu̱ ñajunʼ rí ikhaa niʼthí. Índo̱ ikhiin nidxawíín rí ni̱ndxu̱ún xa̱bu̱ romanos, ra̱ʼkhá tháán nimíñúún. 39 Ikhú nigún gúñún mu mundu̱ʼu̱u̱n rí muni̱ mba̱a̱ a̱jkiu̱ún kuñún, ga̱jma̱a̱ nda̱wa̱á dí nirawíin ma̱ngaa nindu̱ʼu̱u̱n rí magajníín náa xuajen. 40 Mú, índo̱ Pablo ga̱jma̱a̱ Silas nigájni̱i̱n náa guʼwá e̱jua̱nʼ, nigúun náa goʼwóo Lidia, náa ndiñún a̱ngiu̱xu ga̱jma̱a̱ nixnúún tsiakii, nda̱wa̱á nigúun.