Isaías
52 ¡Arajxu̱u̱nʼ! ¡Arajxu̱u̱nʼ! ¡Araʼdáá tsiaki̱i̱, Sion!
¡Atagíiʼ xtíñaaʼ dí mitsaanʼ,* Jerusalén, xuajin rí kaʼwu!
Numuu dí xátangi̱ín mati̱ʼi̱i̱n náa ikháán bi̱ túthu xtóo xuyuuʼ tsáʼkhún ga̱jma̱a̱ bi̱ tsagiin.
2 Ataxprígumi̱na̱a̱ʼ yujndaʼ, arajxu̱u̱nʼ ga̱jma̱a̱ araʼwún, Jerusalén.
Atríya̱a̱ʼ nuñuu dí kua̱ʼa̱n náa aphaaʼ, wáxióo* Sion bi̱ ni̱jkha̱ kiʼyáa.
3 Rígi̱ dí naʼthí Jeobá:
“Ikháanʼ na̱nguá nixtagujua̱a̱nʼ ga̱jma̱a̱ nimbá,
ikha jngóo xájuiʼtsiwáanʼ ga̱jma̱a̱ mbújkha̱a̱”.
4 Rígi̱ dí naʼthí Tátá Jeobá bi̱ itháán mba̱a̱:
“Nákha ginii xa̱bu̱ xuajñunʼ niguájtaan náa Egipto mu makuwá ikhí xóo xa̱bu̱ bi̱ naguwaáʼ,
nda̱wa̱á Asiria mbaʼ niʼni ngíníi”.
5 “Ga̱jma̱a̱ numuu rígi̱, ndiéjunʼ gíʼmaa ma̱ni̱ gi̱i̱ rá.”, eʼthí Jeobá.
“Nda̱a̱ mbá numuu dí nigún kudiin xa̱bu̱ xuajñunʼ.
Bi̱ nuni̱ ngíníi nundxa̱ʼwa̱ má xúʼko̱ dí naʼngu̱u̱n, eʼthí Jeobá,
tsejtsíí mbiʼi, kañiiʼ mbiʼi tséyamajkuíí mbiʼyuʼ.
6 Ikha jngóo xa̱bu̱ xuajñunʼ maguánú muniʼnuuʼ mbiʼyuʼ,
mbiʼi rúʼko̱ ikhiin maguánú mbuyáá dí ikhúún nindxu̱ʼ bi̱ xtáa raʼthí.
¡Xúʼko̱, ikhúún nindxu̱ʼ!”.
7 ¡Ra̱ʼkhá tháán mitsaanʼ kujmaa rajkhúu náa kúbá bi̱ na̱jkha̱ kayóo ajngáa rí májánʼ,*
bi̱ naʼthí dí rígá rí tsímáá,
bi̱ na̱ʼkha̱ kayóo ajngáa mu maʼthí dí rígá rí májánʼ,
bi̱ naʼthí dí naguma káwíin,
bi̱ naʼthúu̱n Sion “¡Dios ndrígáaʼ ni̱jkha̱nú ninindxu̱u̱ Rey!”!
8 ¡Atadxawíín! Xa̱bia̱a̱ʼ bi̱ nuyejngoo muxujxi̱ aʼwún.
Mbóó gúndxa̱ʼwa̱ mbá xúgíinʼ asndu nadxún,
numuu dí índo̱ Jeobá gágímbíin náa Sion, ikhiin mbuyáá pa̱jnu.
9 Gaʼdxalá mbá xúgíʼ dí niguma gámbáa náa Jerusalén, gu̱ndxa̱ʼwala mbóó ga̱jma̱a̱ gagi,
numuu dí Jeobá niʼni̱i̱ a̱jkiu̱u̱n xuajñuu, ni̱ʼtsi̱ríya̱a̱ʼ Jerusalén.
10 Jeobá niʼni dí mbá xúgíinʼ xa̱bu̱ xuajin maguánú mbuyáá tsiaki̱i̱ ndrígóo dí nindxu̱u̱ kaʼwu,
mbá xúgíinʼ bi̱ kúwá náa naguámbári̱go̱o̱ ku̱ba̱ʼ maguánú mbuyáá xóo eʼni Dios ndrígúlú mu maʼni káwíin xa̱bu̱.
11 ¡Gu̱ni̱ wájímíjná, gu̱ni̱ wájímíjná, gagajnáanʼla ikhí, xúrugua̱ nimbá dí tsaga!
Gagajnáanʼla ikhí ga̱jma̱a̱ gakuwáanʼla mikaʼwáanʼ
xúgiáanʼ ikháanʼ bi̱ na̱jkua̱ kudala dí najmaa náa goʼwóo Jeobá.
12 Ikháanʼla xáʼyóoʼ magajnáanʼla ikhí ga̱jma̱a̱ gamíi,
ni má xáʼyóoʼ magajnálaʼ ragayála,
numuu dí Jeobá maʼga ginii náa inala,
ga̱jma̱a̱ Dios ndrígóo Israel maʼga kidxalaʼ.
13 ¡Gu̱ya̱a̱! Xa̱bi̱ʼ majmañuu májánʼ dí maʼni.
Makánáán mbá ñajunʼ dí gíʼdoo numuu,
magruigú gamajkhu ga̱jma̱a̱ maguma mba̱a̱.
14 Xó má mbaʼin bi̱ niguanún tsiánguá índo̱ ndiyáá,
numuu dí niriʼkhuu kiejxu̱u̱ itháan ki xóo mbáa xa̱biya̱,
ga̱jma̱a̱ itháan mitsiʼyáa ki xóo mbáa xa̱bu̱ numbaaʼ,
15 xúʼko̱ gáʼni dí xa̱bu̱ bi̱ kúwá náa xuajin mba̱ʼu̱ maguanún tsiánguá.
Maguanún wíí reyes náa inuu,
numuu rí mbuyáá dí xóó tséjuiʼthún
ga̱jma̱a̱ mundxa̱ʼwa̱míjna̱ náa dí xóó túdxawíín.