Raga̱jma̱ libro rí niʼnirámáʼ Samuel

12 Jeobá nikuʼmaa Natán dí maʼga gáʼyoo David. Índo̱ ni̱jkha̱nú náa David, niʼthúu̱n: “Kúwá a̱jmi̱i̱n xa̱bu̱ náa xuajin. Mbáa bi̱ gíʼdoo, ga̱jma̱a̱ i̱mba̱a̱ bi̱ ngínáa. 2 Xa̱bu̱ bi̱ gíʼdoo, gíʼdiin mbaʼin mugu̱ ga̱jma̱a̱ xedi̱, 3 mú xa̱bu̱ ngínáa kááʼ mbáwíí a̱ʼdá múgiúu gíʼdaa bi̱ niʼtsi̱i̱. Ikhaa nañewu̱u̱n, a̱ʼdá múgiúu nigaja̱a̱ mbóó gajmíi̱n e̱ji̱i̱n. Mugiu̱u̱ na̱ʼkhu̱ mbá chíʼgíiʼ* dí ikhaa gíʼdoo, naʼga̱a̱n ga̱jma̱a̱ dí gajnuʼ náa vásiúu, ndayáraʼaa mu mi̱gu. Ndaʼyoo asndu xóo mbáa wáxióo.* 4 Mbóo mbiʼi, xa̱bu̱ bi̱ gíʼdoo ni̱ʼkha̱ mbáa xa̱bu̱ gáʼyoo náa goʼwóo, mú ikhaa na̱nguá nindoo gáxíyáa mugiu̱u̱ ni má xediu̱u̱ mu maʼni májáanʼ mikhu̱u̱ xa̱bu̱ bi̱ ni̱ʼkha̱. Dí phú niʼni, ni̱jkha̱ gáyaa mugiu̱u̱ xa̱bu̱ ngínáa niʼni májáanʼ mikhu̱u̱ xa̱bu̱ bi̱ ni̱ʼkha̱”.

5 Índo̱ David niʼdxawun rígi̱, ra̱ʼkhá tháán nikiʼnáa kaʼyoo xa̱bu̱, niʼthúu̱n Natán: “¡Na̱xna̱ ajngóʼ ga̱jma̱a̱ numuu mbiʼyuu Jeobá, dí xa̱bu̱ bi̱ niʼni rúʼko̱ gíʼmaa makhañúu! 6 Dí xúʼko̱ kaʼnii niʼni ga̱jma̱a̱ dí tágáwíinʼ a̱jkiu̱u̱n, gíʼmaa dí maʼni numa̱a̱ a̱ʼdá múgú mbá a̱jkhu̱ nuthu xóo numuu”.

7 Ikhú Natán niʼthúu̱n David: “¡Ikháán nindxa̱a̱ʼ xa̱bu̱ buʼko̱! Rígi̱ nindxu̱u̱ dí naʼthí Jeobá, Dios ndrígóo Israel: ‹Ikhúún mínu̱u̱ʼ niraʼwi̱i̱n mani̱ndxa̱a̱ʼ rey náa Israel ga̱jma̱a̱ ni̱ni̱ kríña̱a̱nʼ náa ñawúunʼ Saúl. 8 Nindoʼ maxna̱a̱ʼ goʼwóo patriáanʼ ga̱jma̱a̱ maxnajxiáa gu̱ʼwi̱i̱. Ma̱ngaa ni̱xna̱a̱ goʼwóo Israel ga̱jma̱a̱ Judá. Raʼkháa i̱ndó rúʼko̱, ma̱ngaa nindoʼ ma̱ni̱ itháan ga̱jma̱a̱ numaaʼ. 9 Náá numuu dí na̱nguá nitayamajkuíí ajngóo Jeobá índo̱ nitani̱ dí ra̱májánʼ náa iduu rá. ¡Nitaxíyáa ga̱jma̱a̱ espada Urías xa̱bu̱ hitita! Nda̱wa̱á dí nitaxíyáa ga̱jma̱a̱ espada ndrígu̱ún ammonitas, niguanáaʼ ga̱jma̱a̱ʼ a̱ʼgiu̱u̱ ga̱jma̱a̱ ndiyáa. 10 Dí xúgi̱ rá, marigá má xúʼko̱ gamiéjunʼ* náa guʼwáaʼ, numuu dí na̱nguá nitayamajkhuʼ nitrígú káyííʼ a̱ʼgiu̱u̱ Urías xa̱bu̱ hitita ga̱jma̱a̱ ndiyáa›. 11 Rígi̱ nindxu̱u̱ dí naʼthí Jeobá: ‹Makuʼmá gamiéjunʼ náa ikháán, dí náa guʼwáaʼ má gáʼkha̱. Ma̱ta̱ya̱a̱ xígi̱ ga̱jma̱a̱ idaaʼ xóo gágruígú káyáaʼ gu̱ʼya̱a̱ mu maxniu̱u̱ i̱mba̱a̱ xa̱bu̱, ikhaa mabóoʼ gajmíi̱n mbiʼi xígi̱.* 12 Ngu̱ʼwa̱á nitani̱ ikháán, mú ikhúún ma̱ni̱ pa̱jnu̱ náa inún xúgíinʼ xa̱bu̱ Israel ga̱jma̱a̱ mbiʼi xígi̱›”.*

13 Ikhú David niʼthúu̱n Natán: “Nikuʼdáminaʼ aʼkhá náa inuu Jeobá”. Natán niriʼñuu: “Jeobá naʼni mba̱a̱ a̱jkiu̱u̱n kaʼyoo aʼkhá dí nitani̱. Xákáñáaʼ má. 14 Maski ajndu xúʼko̱, numuu dí tátayamajkuíí Jeobá índo̱ nitani̱ xúʼko̱, ikha jngóo ada̱ bi̱ niraʼdaa makhañúu”.

15 Nda̱wa̱á Natán ni̱jkha̱a̱ náa goʼwóo.

Jeobá niʼni dí ada̱ bi̱ David nigiʼdaa ga̱jma̱a̱ a̱ʼgiu̱u̱ Urías maʼniuu nandii. 16 David niʼtákáñuu Dios ga̱jma̱a̱ numuu ada̱. Tákuiʼtsu ga̱jma̱a̱ niruguaraʼamina̱a̱ʼ, dí mbruʼun mbayííʼ eʼgu. 17 Xa̱bi̱i̱ bi̱ kúwá náa goʼwóo nixuʼmamijná ga̱jma̱a̱ ninimíjna̱ dí muxu̱jxi̱i̱ mbayííʼ, mú ikhaa na̱nguá nindoo ga̱jma̱a̱ tándoo gákuiʼtsu gajmíi̱n. 18 Índo̱ niʼni juwan mbiʼi nikháñúu ada̱. Xa̱bi̱i̱ David namíñúún gútháán dí nikháñúu a̱ʼdióo. Numuu dí nitamijná: “Nákha ada̱ xtáa ndaʼya, índo̱ nuʼtámíjná gajmiúlú rey ikhaa tsíyoo gáʼdxawunlú. Xú káʼnii lá gúʼthán xúgi̱ dí nikháñúu ada̱ xá. Gamíi maʼni mbá dí ra̱májánʼ”.

19 Índo̱ David ndiʼyoo dí xa̱bi̱i̱ kúwá rutangu̱ʼwa̱míjna̱ nikumu̱u̱ má dí nikháñúu ada̱. Ikha jngóo nirajxu̱u̱n xa̱bi̱i̱: “Nikháñúu ada̱ ráʼ.” “Aan, nikháñúu”, nitháán. 20 Ikhú David nitujxi̱i̱ mbayííʼ. Niwan ga̱jma̱a̱ nigímina̱a̱ʼ aceite, niriʼkhu̱u̱ xtíñuu, ikhú ni̱jkha̱ náa goʼwóo Jeobá mu mbaʼyamajkuu. Nda̱wa̱á ni̱jka̱a̱la náa goʼwóo,* ninda̱ʼa̱ dí maguwáʼ kuñu̱u̱n dí mi̱khu̱ ga̱jma̱a̱ ikhú nikuiʼtsu. 21 Xa̱bi̱i̱ nirajxi̱i̱: “Ndíjkha dí xúʼko̱ tani̱. Nákha xtáa ndaʼya ada̱, nda̱a̱ dí nitsu̱ ga̱jma̱a̱ tsétatsíñáánʼ ratambi̱ya̱ʼ. Mú xúgi̱ dí nikháñúu ada̱, nitujxa̱a̱ ga̱jma̱a̱ natatsiʼtsu”. 22 Ikhaa niriʼñúún: “Nákha ada̱ xtáa ndaʼya, tákuíʼtsú ga̱jma̱a̱ nimbi̱ya̱ʼ, numuu dí nindxa̱ʼwa̱mínáʼ ‹Tsiánguá rá, mbáa Jeobá magáwíinʼ a̱jkiu̱u̱n kaʼyoʼ ga̱jma̱a̱ maniñuuʼ dí maxtáa ada̱›. 23 Mú xúgi̱ dí nikháñúu, nándáa má numuu dí xákuíʼtsú. Lá maʼngo̱ʼ ma̱ni̱ dí matanga̱a̱ xáʼ. Ikhúún maʼgáaʼ náa ikhaa, mú ikhaa ní xátanga̱a̱ náa ikhúún”.

24 Ikhú David niʼni̱i̱ a̱jkiu̱u̱n Bat-Seba. Ni̱jkha̱a̱, nibóoʼ ga̱jma̱a̱ nda̱wa̱á ikhaa ni̱jkha̱nú nigiʼdaa mbáa dxámá bi̱ nixná mbiʼyuu Salomón,* bi̱ Jeobá nandoo kaʼyoo. 25 Numuu dí Jeobá nandoo kaʼyoo, ikha jngóo nikuʼmaa profeta* Natán mu maʼthúún dí muxna mbiʼíí Jedidías.*

26 Joab nixmínaʼ má xúʼko̱ ga̱jma̱a̱ xuajin Rabá náa kúwá ammonitas, ga̱jma̱a̱ nito̱ʼo̱o̱ náa xuajin dí nutañajunʼ. 27 Joab nikuʼmiin bi̱ magún kuñu̱u̱n ajngáa náa David mu muthán: “Nixmíjná gajmiúxu Rabá ga̱jma̱a̱ niʼngu̱xu̱ nitu̱ʼu̱xu náa xuajin dí rígá iyaʼ.* 28 Dí xúgi̱ rá, atagímbíin ikháán soldado bi̱ xóó naguanún, atruguamaʼáan xuajin ga̱jma̱a̱ ata̱ʼa̱a̱ʼ ikháán, mu xúʼko̱ xáto̱ʼo̱ʼ ikhúún náa xuajin ga̱jma̱a̱ xágruígú gamajkhu”.*

29 Ikhú David nigímbíin mbá xúgíinʼ soldado, ni̱jkha̱ gáxmína̱ʼ ga̱jma̱a̱ Rabá, ma̱ngaa niʼngo̱o̱ nito̱ʼo̱o̱. 30 Nirígú corona dí grígu náa edxu̱u̱ Malcam.* Corona dí oro rígi̱ ga̱jma̱a̱ dí tima itsí mitsaanʼ* dí ki̱wu̱n naʼni mbá 34 kilo,* nigrigu náa edxu̱u̱ David. Ga̱jma̱a̱ ikhaa niguéjkha̱a̱ mbaʼa dí niguanáa náa xuajin. 31 Ma̱ngaa niguwíin xa̱bu̱ bi̱ kúwá náa xuajin, nixtumiin dí murujtu itsí, majmúún ajua̱nʼ dí narujtu hierro ga̱jma̱a̱ hacha dí ajua̱nʼ, ma̱ngaa nigíʼmiin murawíi ladrillos. Xígi̱ kaʼnii niʼni gajmíi̱n mbá xúgíinʼ ammonitas. Nda̱wa̱á David gajmíi̱n mbá xúgíinʼ soldado nitangiín náa Jerusalén.