Isaías
14 Numuu dí Jeobá masngájmuu Jacob dí nagáwíinʼ a̱jkiu̱u̱n kaʼyoo ga̱jma̱a̱ matanga̱a̱ maraʼwíi Israel. Maʼni dí makuwá* náa ku̱bu̱únʼ ga̱jma̱a̱ xa̱bu̱ bi̱ naguwaáʼ muwi̱i̱n gajmiún, ma̱ngaa makuwá mbóó náa goʼwóo Jacob. 2 Ga̱jma̱a̱ xa̱bu̱ xuajin magúun kudiin náa ku̱bu̱únʼ, náa ku̱bo̱o̱ʼ Jeobá maguánú mani̱ndxu̱ún xa̱biu̱ún bi̱ kúwá náa goʼwóo Israel, dí xúgi̱ ikhiin muguáʼdiin xóo presos bi̱ nákha ginii nigún kudiin ga̱jma̱a̱ mutañajúúnʼ bi̱ nákha ginii nixtumiin muñajunʼ.*
3 Mbiʼi dí Jeobá gáʼni dí mbi̱ya̱a̱ jxa̱a̱ʼ, náa dí naʼni mikui̱i̱n, náa dí natamíniiʼ ga̱jma̱a̱ náa dí nuxtumán matiejunʼ, 4 ikháán matatsijmáa* rey ndrígóo Babilonia, marata̱:
“¡Atayáá xóo ni̱jkha̱nú mbiʼi ndrígóo bi̱ naxtúmii eʼwíinʼ muñajunʼ!
¡Atayáá xóo niguámbá dí naʼni ngíníi eʼwíinʼ!
5 Jeobá nijkúmiga̱ʼ xkuíyá ndrígu̱ún bi̱ ra̱míjíinʼ,
ga̱jma̱a̱ ragótiu̱ún xa̱bu̱ ñajunʼ,
6 bi̱ asndu nakásngañu̱u̱ʼ exnún má xúʼko̱ xa̱bu̱ xuajin,
asndu najmangu̱u̱ʼ extúmii xa̱bu̱ munimbu̱ún kuyáá, na̱jkha̱ raxkhúún má xúʼko̱ mu magudíin.
7 Dí xúgi̱ tsímáá eyáa jxu̱u̱ʼ mbá xúgíʼ ku̱ba̱ʼ.
Xa̱bu̱ nundxa̱ʼwa̱ ga̱jma̱a̱ gagi.
8 Asndu ixi̱ enebros nadxún dí nitagíʼníí,
ma̱ngaa cedros dí rígá náa Líbano.
Nuthi: ‹Asndu nákha mbiʼi dí nixpátríguíín,
nánguá e̱ʼkha̱ nimbáa mu maʼdu̱u̱ ixi̱ náa ikháanʼxu̱›.
9 Asndu Iñá wajinʼ* dí rígá itháán mi̱jnu̱ʼ
maʼba̱a̱n mu magruiguíín índo̱ gárkawaaʼ.
Ga̱jma̱a̱ numaaʼ ikháán, Iñá wajinʼ maxkajui̱ín bi̱ nikháñún bi̱ nánguá guáʼdáá tsiaki̱i̱,
xúgíinʼ bi̱ kuya̱ edxu̱u̱ náa tsu̱du̱u̱ ku̱ba̱ʼ* bi̱ nuni̱ ngíníi eʼwíinʼ.
Naʼni dí mbá xúgíinʼ reyes bi̱ kúwá náa xúgíʼ xuajin matujxu̱u̱n náa xíliu̱ún* dí tri̱gi̱i̱n.
10 Mbá xúgíinʼ ikhiin nigi̱ʼdi̱i̱ nithi, ga̱jma̱a̱ nithaanʼ.
‹Ikháán mangáánʼ nikáguabáánʼ xó má ikháanʼxu̱ ráʼ.
Ni̱dxu̱ʼnú ninindxa̱a̱ʼ xó má ikháanʼxu̱ ráʼ.
11 Dí natanimbamínaʼ nijuiʼdama̱ʼa̱n náa Iñá wajinʼ,
aʼwóo ajua̱nʼ dí gíʼdoo cuérdóo dí xtaʼdáá.
Náa agoo kua̱ʼa̱a̱n gíwíin ñu̱u̱ dí nindxu̱u̱ xóo xiewaaʼ,
ga̱jma̱a̱ ñu̱u̱ nindxu̱ún xóo xtíin dí kúgurámáánʼ ga̱jma̱a̱›.
12 ¡Atayáá xóo nixpátríguíín náa mekhuíí,
ikháán bi̱ nambiʼii, aʼguá najtsi!
¡Atayáá xóo nituríguíín ga̱jma̱a̱ nixpátríguíín mbayííʼ,
ikháán bi̱ nitani̱ gámbáa xuajin mba̱ʼu̱!
13 Niratá náa awúu̱n a̱jkia̱a̱nʼ: ‹Matsimuʼ mekhuíí.
Magrígu xíliúʼ náa natañájunʼ náa tsu̱du̱ún a̱ʼgua̱a̱n bi̱ gíʼdiin Dios
ga̱jma̱a̱ magrúwan náa inuu kúbá dí nagimbíi̱n,
náa itháán mitsínguánʼ xígií náa norte.
14 Matsimuʼ náa tsu̱du̱u̱ du̱u̱n,
maniminaʼ mani̱ndxu̱ʼ xó má bi̱ Phú mba̱a̱›.
15 Mú majuiʼdama̱ʼa̱a̱n náa Iñá wajinʼ,*
náa iñáʼ dí itháán mi̱jnu̱ʼ.
16 Xa̱bu̱ bi̱ gúyáaʼ, maguanún ruyejxa̱a̱ʼ,
mungujmán májánʼ ga̱jma̱a̱ muthi:
‹Xa̱bu̱ bugi̱ bi̱ niʼba̱a̱n ku̱ba̱ʼ,
bi̱ niʼni dí maguíʼiin xa̱bu̱ ñajunʼ ráʼ.
17 Ikhaa bi̱ naʼni dí ku̱ba̱ʼ náa kúwá xa̱bu̱ maguanáa xóo ku̱ba̱ʼ mijxooʼ*
ga̱jma̱a̱ naʼni gámbóo xuajñún,
ikhaa bi̱ tséniñúúnʼ matangi̱ín náa guʼwún xa̱bu̱ bi̱ na̱jkha̱ kagui̱i̱n náa guʼwá e̱jua̱nʼ ráʼ.›
18 Xúgíinʼ eʼwíinʼ reyes bi̱ kúwá náa xuajin mba̱ʼu̱,
mbá xúgíinʼ ikhiin najuiʼdi̱ín ga̱jma̱a̱ gamajkhu,
mámbáa náa iñá wajñuuʼ.*
19 Mú ikháán nuda̱a̱nʼ ga̱jma̱a̱ tséjuiʼdi̱ín,
xóo mbá rudiuuʼ ixi̱ dí tsíñún gúyáá,
náa jngútámiin mbaʼin xa̱bu̱ bi̱ nifraʼa jngañiin espada,
bi̱ najngumíʼiin náa tsu̱du̱u̱ itsí dí tuaʼán náa awúu̱n iñáʼ,
xóo mbá wajñuuʼ xa̱bu̱ dí nujngupri̱ga̱.
20 Xádxuuʼ gajmiáanʼ náa iñá wajinʼ,
numuu dí nitani̱ gámbáa ku̱ba̱a̱ʼ,
niradíin xa̱bu̱ xuajñanʼ.
Bi̱ naguwáʼ náa xa̱bu̱ ra̱míjíinʼ ni xájuiʼthá ga̱jma̱a̱ numún.
21 Gu̱ni̱ májáánʼ mbá ku̱ba̱ʼ náa muradíin e̱ji̱i̱n
ga̱jma̱a̱ numuu aʼkhúún wajin xiʼñúúnʼ,
mu xúʼko̱ xátujxu̱u̱n ga̱jma̱a̱ xúndrigúu ku̱ba̱ʼ
ga̱jma̱a̱ xúni̱ dí marigá xuajñún ikhí”.
22 “Ikhúún matujxu̱ʼ kagui̱i̱n”, eʼthí Jeobá bi̱ naʼtáñajúúnʼ ángeles.
“Ga̱jma̱a̱ ma̱ni̱ jngudi̱i̱ náa Babilonia mbiʼyuu, bi̱ gáguanún, bi̱ gáguwáʼ náa ikhaa, ma̱ngaa ga̱jma̱a̱ numuu”, eʼthí Jeobá.
23 “Ma̱ni̱ dí endi tsuwanʼ* makuwá ikhí ga̱jma̱a̱ maʼni̱i̱ na̱ma̱ʼ, ma̱ngaa magíjxi̱i̱ ga̱jma̱a̱ escoba dí naʼni gámbáa”, eʼthí Jeobá bi̱ naʼtáñajúúnʼ ángeles.
24 Jeobá bi̱ naʼtáñajúúnʼ ángeles nixná ajngóo:
“Xó má nitha̱ ma̱ni̱, xúʼko̱ má gárígá,
xó má niraʼwíí maguma, xúʼko̱ má gámbánúu.
25 Makujmbiriga̱a̱ asirio náa ku̱bo̱ʼ
ga̱jma̱a̱ makujmbirámaaʼ náa kúbá ndrígóʼ.
Yugo ndrígóo magajta̱a̱ náa xuajñunʼ
ga̱jma̱a̱ dí nixnún muda magajta̱a̱ náa xpajphún”.
26 Rígi̱ dí nixtaʼwíí* magumaa xúgíʼ ku̱ba̱ʼ,
ga̱jma̱a̱ ñawúunʼ Dios fruíya̱ʼ mu maxnún mbá xúgíinʼ xa̱bu̱ xuajin.
27 Numuu dí Jeobá bi̱ naʼtáñajúúnʼ ángeles niraʼwíí má maʼni,
tsáá gáʼngo̱o̱ gárikoo dí xárígá rá.
Fruíya̱ʼ má ñawúunʼ,
tsáá gáʼngo̱o̱ gáʼni dí maʼga̱a̱ skidiʼ rá.
28 Tsiguʼ dí nikháñúu rey Acaz, nijuiʼthá ajngáa rígi̱:
29 “Xuajin Filistea, nimbáa bi̱ xtáa náa ikháán xáʼdxuu
i̱ndó ga̱jma̱a̱ numuu dí nijmigaʼ ragóti dí nijuixnáaʼ ga̱jma̱a̱.
Numuu dí náa xndúu a̱bu̱nʼ mawiʼtáa̱ mbáa a̱bu̱nʼ mbiiʼ,
ga̱jma̱a̱ bi̱ gáʼkha̱ náa ikhaa mani̱ndxu̱u̱ mbáa a̱bu̱nʼ mbiiʼ ga̱jma̱a̱ bi̱ na̱jkha̱ náa inuu giñánʼ.
30 Ejín giʼniún bi̱ ngíníi muphiʼtsu
ga̱jma̱a̱ bi̱ ngíníi mu̱nuʼ tsímáá,
mú ikhúún ma̱ni̱ dí xa̱bu̱ xuajñanʼ makhañún ga̱jma̱a̱ ewiʼ,
ga̱jma̱a̱ dí gáguanúu xóó náa ikháán maguma gámbáa.
31 ¡Gagáwíinʼ a̱jkia̱a̱nʼ, xkrugua! ¡Atandxaʼwá, xuajin!
¡Xuajin Filistea, xúgíinʼ bi̱ kúwá náa ikháán makáguabiinʼ!
Numuu dí asndu náa norte naguwáʼ soldado bi̱ nindxu̱ún xóo gúní,
ga̱jma̱a̱ nimbáa dí ikhiin tséguanúu kidííʼ”.
32 Ndiéjunʼ lá gájuiʼthún bi̱ naguwáʼ kuñu̱u̱n ajngáa náa xuajin rá.
Dí Jeobá nigíʼ rajkhúu Sion
ga̱jma̱a̱ bi̱ ngíníi bi̱ kúwá náa xuajñuu mumbayumíjná ikhí.