Rí na̱jkha̱ inún Romanos

5 Xúgi̱ rí Dios naʼthí, dí ni̱ndxu̱lú mbáa xa̱bu̱ jmbii ga̱jma̱a̱ numuu fe rí kuaʼdáá, gakuwáanʼlu tsímáá gajmiúlú Dios ga̱jma̱a̱ numuu Tátá Jesucristo, 2 fe rí kuaʼdáá náa Jesús nambáyulú muxuʼmámíjnálú náa Dios ga̱jma̱a̱ dí mundrígú rí májánʼ wéñuuʼ a̱jkiu̱u̱n* ikhaa. Gaʼdxulú* rí kuaʼti̱i̱n dí makuwáanʼ gajmiúlú Dios. 3 Ikha jngóo, gaʼdxulú* índo̱ nuraʼníí ga̱ʼkhu̱, numuu rí índo̱ nuraʼníí ga̱ʼkhu̱ naʼni rí maʼngulú; 4 numuu rí índo̱ naʼngulú, Dios nadxuu a̱jkiu̱u̱n ga̱jma̱a̱ rúʼko̱ naʼni dí marigá rí muguaʼthi̱i̱n nda̱wa̱á, 5 rí nuguaʼthi̱i̱n nda̱wa̱á tséʼni rí majmáa a̱jkiu̱lú numuu rí ngajua ndrígóo Dios nirígá náa a̱jkiu̱lú* ga̱jma̱a̱ numuu espíritu santo* rí nindrígúlú.

6 Nákha ikháanʼ ni̱ndxu̱lú xa̱bu̱ aʼkhá,* Cristo nikháñuu ga̱jma̱a̱ numún xa̱bu̱ bi̱ ra̱míjíinʼ náa mbiʼi rí kaʼyoo. 7 Mingíjyúuʼ rí mbáa makhañúu ga̱jma̱a̱ numuu mbáa xa̱bu̱ jmbii, mbáa maxtáa mbáa bi̱ ma̱ndoo makhañúu ga̱jma̱a̱ numuu mbáa xa̱bu̱ májáanʼ. 8 Mú, Dios nisngájmulú ngajua ndrígóo xúgi̱ kaʼnii: Índo̱ kaʼníí ni̱ndxu̱lú xa̱bu̱ aʼkhá, Cristo nikháñuu ga̱jma̱a̱ numulú. 9 Xúgi̱ rí Dios niʼthí rí ni̱ndxu̱lú jmbii ga̱jma̱a̱ numuu eʼdiuu Jesús, ikha jngóo ga̱jma̱a̱ numuu ikhaa ma̱ndoo makáwáanʼlu índo̱ Dios gákiʼnáa. 10 Mú, índo̱ ikháanʼ ni̱ndxu̱lú xa̱bu̱ sia̱nʼ gajmiúlú Dios, nindoo nimbájxi̱i̱ʼ gajmiúlú ga̱jma̱a̱ numuu rí nikháñuu A̱ʼdióo ga̱jma̱a̱ numulú, xúgi̱ rí nimbájxi̱i̱ʼ gajmiúlú ikhaa, ikha jngóo rí maguma káwáanʼlu ga̱jma̱a̱ numuu rí ikhaa xtáa. 11 Raʼkháa i̱ndó rúʼko̱, ma̱ngaa kuwáanʼlu gagi rí nindoo nimbájxi̱i̱ʼ gajmiúlú Dios, núma̱a̱ má ga̱jma̱a̱ numuu Tátá Jesucristo ga̱jma̱a̱ numuu ikhaa rí xúgi̱ nimbájxi̱i̱ʼ gajmiúlú Dios.

12 Ga̱jma̱a̱ numuu mbáwíí xa̱bu̱, nito̱ʼo̱o̱ aʼkhá náa numbaaʼ, ma̱ngaa rí nakháñulú nito̱ʼo̱o̱ ga̱jma̱a̱ numuu aʼkhá, ikha jngóo xúgíinʼ xa̱bu̱ nakháñún numuu rí xúgíinʼ nixudami̱jná aʼkhá... 13 Numuu rí nákha xóó tserígá Xtángoo, aʼkhá rígá má náa numbaaʼ, mú xándoo mataxruíga̱a̱ nimbáa ga̱jma̱a̱ numuu aʼkhá á mu nda̱a̱ xtángoo. 14 Rí nakháñulu niʼtáñajunʼ nákha nixtáa Adán asndu índo̱ nixtáa Moisés, asndu niʼtáñajúúnʼ mangiin bi̱ túxudami̱jna̱ aʼkhá xóo rí nikudaminaʼ Adán, bi̱ nambríguii ga̱jma̱a̱ mbáa bi̱ wíji̱ ma̱ʼkha̱.

15 Mú rí nimínáanʼlu Dios na̱nguá nindxu̱u̱ xóo aʼkhá rí nikudaminaʼ Adán. Á mu mbaʼin nikháñúún ga̱jma̱a̱ numuu aʼkhá ndrígóo mbáa xa̱bu̱, itháan má mbaʼin gámbáñún rí nimínáanʼlu Dios maski ajndu rakáʼyulú numuu rí májánʼ wéñuuʼ a̱jkiu̱u̱n,* nikhánulú rígi̱ núma̱a̱ má ga̱jma̱a̱ numuu rí májánʼ wéñuuʼ a̱jkiu̱u̱n mbáa xa̱bu̱, ikhaa nindxu̱u̱ Jesucristo. 16 Raʼkháa ikháá má rígá ga̱jma̱a̱ numuu rí nimínáanʼlu Dios, xó má aʼkhá rí nikudaminaʼ mbáwíí xa̱bu̱: Numuu rí aʼkhá ndrígóo mbáa xa̱bu̱ niʼni rí xúgíinʼ xa̱bu̱ kaʼñún dí makhañún, mú rí nimínáanʼlu Dios niʼni rí majuiʼthá dí ni̱ndxu̱ún xa̱bu̱ jmbiin maski má nirígá wéñuuʼ aʼkhá. 17 Rí nakháñulú niʼtáñajunʼ ga̱jma̱a̱ numuu aʼkhá rí nikudaminaʼ mbáwíí xa̱bu̱, ¡itháan náa bi̱ mundrigú rí májánʼ wéñuuʼ a̱jkiu̱u̱n Dios dí rakáʼñun, rí ikhaa nixnúún numuu rí ninindxu̱ún xa̱bu̱ jmbiin, makhánún rí mutañajunʼ ga̱jma̱a̱ numuu mbáa xa̱bu̱, ikhaa nindxu̱u̱ Jesucristo!

18 Ikha jngóo, ga̱jma̱a̱ numuu mbá aʼkhá dí nirígá niʼni rí xúgíinʼ enii xa̱bu̱ makhañún, xúʼko̱ má ga̱jma̱a̱ numuu mbá rí májánʼ dí nirígá niʼni rí xúgíinʼ enii xa̱bu̱ majuiʼthá rí ni̱ndxu̱ún xa̱bu̱ jmbiin ga̱jma̱a̱ mundrigú rí makuwá. 19 Xó má rí mbaʼin xa̱bu̱ niguánú ninindxu̱ún xa̱bu̱ aʼkhá ga̱jma̱a̱ numuu rí táʼnimbo̱o̱ mbáwíí xa̱bu̱, xúʼko̱ má mbaʼin niguánú ninindxu̱ún xa̱bu̱ jmbiin ga̱jma̱a̱ numuu rí niʼnimbo̱o̱ mbáwíí xa̱bu̱. 20 Xtángoo nirígá mu aʼkhá maʼni itháan mba̱a̱. Náa nirígá itháan aʼkhá, nikujmaa itháán rí májánʼ wéñuuʼ a̱jkiu̱u̱n Dios.* 21 Náá numuu nirígá xúgi̱ kaʼnii rá. Numuu rí xó má aʼkhá ga̱jma̱a̱ rí nakháñulú niʼtáñajunʼ, xúʼko̱ má rí májánʼ wéñuuʼ a̱jkiu̱u̱n Dios niʼni dí Jesucristo bi̱ nindxu̱u̱ Tátá ndrígúlú maʼtáñajunʼ jmbu ga̱jma̱a̱ maʼga kaguáanʼlú dí makuwáánʼ kámuu mbiʼi.