Raga̱jma̱ i̱yi̱i̱ʼ rí na̱jkha̱ inún Corintios

7 Ikha jngóo a̱ngui̱nʼ, bi̱ nandoʼ ka̱ya̱la wéñuuʼ, numuu rí nduʼyáá dí Dios nikudaminaʼ maʼni, gu̱ʼni̱ kaʼwumijnáa náa xúgíʼ rí naʼni gachúu xuyulúʼ ga̱jma̱a̱ náa a̱jkiu̱lú,* nu̱ʼni̱ dí kaʼwu numuu rí namíñulú kuʼyáá Dios.

2 Gundríguáanʼxu náa a̱jkia̱la.* Numuu dí nimbáa túni̱i̱xu dí raʼkhí, ní má túni̱i̱xu dí majngrádaaʼ nimbáa ní má túnindúwaaʼxu nimbáa. 3 Tsétala rígi̱ mu rí mumíniiʼ, numuu rí xóo ni̱tala nákha ginii rí kuwáanʼ náa a̱jkiu̱xu, ikha jngóo makañúlú mbóó ga̱jma̱a̱ makuwa̱a̱nʼlu mbóó. 4 Na̱tala mbájmbu, nadxuʼ ga̱jma̱á numala. Naʼni̱i̱ a̱jkiu̱nʼ ga̱jma̱a̱ nadxuʼ wéñuuʼ maski ajndu rígá mbaʼa rí naʼni mumíniiʼlú.

5 Gajkhun má rí índo̱ ni̱jkuánúxu náa Macedonia na̱nguá niʼni̱i̱ a̱jkiu̱xu,* nimíniiʼxu má xúʼko̱: Nagiʼdu̱u̱n rexa̱a̱ ga̱jma̱a̱ gamíi má awúu̱n. 6 Mú Dios bi̱ naʼni̱i̱ a̱jkiu̱ún bi̱ nakáguabiinʼ, niʼni̱i̱ a̱jkiu̱xu índo̱ ni̱ʼkha̱nú* Tito. 7 Raʼkháa i̱ndó niʼni̱i̱ a̱jkiu̱xu rí ikhaa ni̱ʼkha̱nú, ma̱ngaa rí ikhaa nigruigú tsiakii náa ikháanʼla. Ma̱ngaa niʼthí rí ikháanʼla nandala mbu̱yo̱ʼ ga̱jma̱a̱ kuwáanʼ gíná ma̱ngaa naxmiéjuanla wéñuuʼ ga̱jma̱a̱ numuʼ, rúʼko̱ niʼni maʼdxuʼ itháan.

8 Á mu niʼni rí makuwa̱a̱nʼ gíná i̱yi̱i̱ʼ dí nikuʼmá, mú tségáwíinʼ má a̱jkiu̱nʼ. Maski ajndu nákha ginii nigáwíinʼ a̱jkiu̱nʼ (índo̱ ndi̱yo̱o̱ rí i̱yi̱i̱ʼ dí nikuʼmá niʼni rí makuwa̱a̱nʼ gíná, nguáthá mbiʼi), 9 rí xúgi̱ nadxuʼ raʼkháa ga̱jma̱a̱ numuu rí ni̱ni̱ makuwa̱a̱nʼ gíná, numuu dí índo̱ ni̱ni̱ xúʼko̱ nimbáyalaʼ mu mata̱nga̱a̱ a̱jkia̱la mu mu̱ni̱ xó má rí Dios nanigu̱u̱ʼ, ikha jngóo túmíniiʼ ga̱jma̱a̱ numuxu. 10 Numuu rí índo̱ kuwa̱a̱nʼ gíná xóo rí Dios nanigu̱u̱ʼ, rígi̱ naʼni rí mata̱nga̱a̱ a̱jkiu̱lú mu makáwáanʼlú, rígi̱ tségáwíinʼ a̱jkiu̱lú, mú rí makuwáanʼlu gíná xóo kúwi̱i̱n xa̱bu̱ numbaaʼ naʼni rí makañúlú. 11 ¡Gu̱ya̱a̱la xóo niʼni makuwa̱a̱nʼ gíná rí nanigu̱u̱ʼ Dios! Niʼni rí ikháanʼ mu̱ni̱ kaʼwi̱i̱ mbiʼyuu, rí makiʼnáanʼ kuya̱a̱ dí ra̱májánʼ dí ni̱ni̱la, rí mamiñála kuya̱a̱ Dios, dí maʼndala muriʼkumijnáa, ninimíjnala mu̱ni̱ ga̱jma̱a̱ ni̱ni̱ jmbi̱i̱ dí nikiéʼkala. Náa xúgíʼ rígi̱, ikháanʼ nisngajmá dí nindxa̱la kaʼwáanʼ. 12 Maski má niniraʼmáʼ, táni̱ ga̱jma̱a̱ numuu bi̱ niʼni dí ra̱májánʼ, ni má bi̱ nigumaa dí ra̱májánʼ, ga̱jma̱a̱ numuu aʼkhá niniraʼmáʼ mu mba̱yo̱o̱ á mu gajkhun nusngajmá náa Dios dí nandala mudxawunxu̱. 13 Rúʼko̱ niʼni dí maʼni̱i̱ a̱jkiu̱xu.

Mú raʼkháa rígi̱ dí niʼni maʼni̱i̱ a̱jkiu̱xu, nidxuxu̱ itháan dí xúgiáanʼ ikháanʼ nixna̱a̱la tsiakii* Tito. 14 Numuu rí xúgíʼ rí májánʼ ni̱thu̱u̱n Tito ga̱jma̱á numala, tséʼni matiyuʼ. Numuu rí xúgíʼ dí ni̱tala ga̱jma̱a̱ numala nindxu̱u̱ gajkhun ga̱jma̱a̱ nikujmaa dí nindxu̱u̱ gajkhun náa xúgíʼ dí ni̱thu̱u̱n Tito. 15 Ma̱ngaa nandoo kaʼyala itháan índo̱ narmáʼáan a̱jkiu̱u̱n xú káʼnii ikháanʼ ninimbala ma̱ngaa dí nindríguíi ga̱jma̱a̱ gamajkhu. 16 Nadxuʼ dí náa xúgíʼ ma̱ndoo maku̱mu̱ʼ ka̱ya̱la.*