Isaías
17 Rígi̱ dí nijuiʼthá magíʼnuu Damasco:
“¡Gu̱ya̱a̱la! Damasco maniñuuʼ ranindxu̱u̱ mbá xuajin,
ga̱jma̱a̱ maʼga̱nú mani̱ndxu̱u̱ mbá ru̱tsu̱u̱ dí niguma gámbáa.
2 Xuajin dí rígá náa Aroer maguanáa,
maʼga̱nú mani̱ndxu̱u̱ mbá mbaaʼ náa makuíji̱i̱n mugu̱,
náa nimbáa ndawa̱a̱ tsáa maʼni míñúún.
3 Xuajin dí kúgumaʼá mandáti̱ga̱a̱ náa Efraín,
ga̱jma̱a̱ rí nutañajunʼ mandáti̱ga̱a̱ náa Damasco,
ga̱jma̱a̱ bi̱ gáguanún xóó náa Siria
ni xáguáʼdáá tsiaki̱i̱ xó má israelitas”,* eʼthí Jeobá bi̱ naʼtáñajúúnʼ ángeles.
4 “Mbiʼi rúʼko̱, tsiaki̱i̱ rí gíʼdoo Jacob maʼga raguámbáa
ga̱jma̱a̱ xuyuuʼ dí ragíʼdoo nandii* maʼni̱i̱ i̱ndó itsu̱.
5 Mani̱ndxu̱u̱ xóo índo̱ mbáa xa̱bu̱ nagu̱u̱ trigo dí wájun,
ga̱jma̱a̱ ñawúunʼ nagu̱u̱ iña,
xóo índo̱ mbáa ndayáaʼ trigo dí niguanáa náa mata* Refaím.
6 Káaʼ nguátaá gáguanúu dí napídu̱únʼ
xóo índo̱ nuxpraʼáá ixi̱ olivo,
káaʼ naguanúu a̱jma̱ o ajtsú aceituna nikhi̱i̱ náa ñawúunʼ rí itháan mitsídánʼ,
káaʼ a̱jkhu̱ o witsu náa ñawúunʼ rí kagu̱ májánʼ xndúu”, eʼthí Jeobá, Dios ndrígóo Israel.
7 Mbiʼi rúʼko̱, xa̱biya̱ mayejxi̱ náa bi̱ Niʼnii, ga̱jma̱a̱ iduu mayejxi̱ náa bi̱ Kaʼwii náa Israel. 8 Xáyejxi̱ náa najuixnájxi̱ tsigijñaʼ dí niʼni ga̱jma̱a̱ ñawúunʼ, ni má xáyejxi̱ náa dí niʼni ga̱jma̱a̱ e̱ji̱i̱n ñawúunʼ, ni má náa poste rí mitsúʼkháan,* ni má náa nakarámáʼ rí ndataun.
9 Mbiʼi rúʼko̱, xuajñún dí kúgumaʼá mani̱ndxu̱u̱ xóo mbá mbaaʼ dí naguanáa náa xaxi̱,
xóo mbá ñawúunʼ ixi̱ rí niguanáa dí kri̱ga̱ náa inún israelitas,
mani̱ndxu̱u̱ mbá mbaaʼ dí niguanáa.
10 Numuu dí nimbumaaʼ xtayáá Dios bi̱ naʼni kríña̱a̱nʼ,
na̱nguá nirmáʼáan a̱jkia̱a̱nʼ xtayáá Tsíñu náa natambáyúminaʼ.*
Ikha jngóo natadu ixi̱ dí najma̱a̱ xndúu,
ga̱jma̱a̱ náa majñu̱u̱ʼ natadu mbá ixi̱ dí tsétatsinuuʼ.*
11 Dí mbiʼi tsu̱ma̱á tani̱ gúlóo rí nitadu,
dí miʼcha̱ natani̱ dí makráʼáan tsígáʼ dí nitadu,
mú dí gájma̱a̱ mandáti̱ga̱a̱ mbiʼi rí gáʼkha̱ nandii ga̱jma̱a̱ mbá ga̱ʼkhu̱ rí nda̱a̱ thanuu.
12 ¡Gudxawíínla! ¡Kúwá xa̱bu̱ náa mbaʼa xuajin bi̱ na̱nguá kúwá wíí!
Nubayimi̱jna̱ xóo eʼni lamáa.*
¡Xa̱bu̱ xuajin kúwá rundxa̱ʼwa̱!
Nawáán xóo ewán iyaʼ rí xkujyuuʼ.
13 Xa̱bu̱ xuajin mundxa̱ʼwa̱ xóo endxa̱ʼwá iyaʼ,
ikhaa maxprígún ga̱jma̱a̱ ikhiin magáñún mitsínguánʼ.
Xóo ra̱jxa̱ dí na̱jkha̱ kagu̱u̱ giñánʼ náa kúbá,
xóo tsuwanʼ nijndooʼ* dí na̱jkha̱ kayóo giñáxóoʼ.
14 Dí wakíʼ narígá gamíi.
Nákhá xóó tséjtsi ikhiin niniña̱a̱nʼ má rakúwá.
Rúʼko̱ gúndrigúu bi̱ nagún kudúún rí kuaʼdááxu̱
ga̱jma̱a̱ rúʼko̱ gákhánún bi̱ nagún kudúún rí kuaʼdááxu̱.