Isaías
23 Rígi̱ rí nijuiʼthá magíʼnuu Tiro:
¡Gagáwíinʼ a̱jkia̱la, barcos dí na̱ʼkha̱ náa Tarsis!*
Numuu dí náa naguájun barco niguma gámbáa ga̱jma̱a̱ rakáʼnii mata̱ʼa̱a̱ʼ ikhí.
Asndu náa ku̱ba̱ʼ Kitim niwáán dí nirígá.
2 Wíí gáʼni xa̱bu̱ bi̱ kúwá náa ku̱ba̱ʼ dí rígá náa rawuunʼ lamáa.*
Xa̱bu̱ nagujua̱ bi̱ naguwáʼ náa Sidón bi̱ nakidiin náa lamáa nijtíin náa ikháán.
3 Tsígáʼ dí rígá náa Sihor* ga̱jma̱a̱ dí najma̱a̱ náa Nilo, náa na̱ʼkha̱ mbújkho̱o̱,
nikidiin kudúún náa mbaʼa iyaʼ xúgíʼ rígi̱ niʼni rí muguáʼdáá xa̱bu̱ xuajin.
4 Gati̱ya̱a̱ʼ Sidón xuajin kúgumaʼá dí rígá náa lamáa,
numuu dí lamáa niʼthí:
“Na̱nguá nigúʼdoo ga̱ʼkhu̱ ni má na̱nguá nigúʼdaa ada̱,
na̱nguá ni̱ni̱ mbaji̱i̱n jiámá ni má tásngúún wa̱ʼxa̱ʼ”.*
5 Xó má índo̱ nidxawíín dí nigíʼnuu Egipto,
xa̱bu̱ makuwá ngíná índo̱ gúdxawíín dí magíʼnuu Tiro.
6 ¡Gakidáanʼla náa Tarsis!
¡Gakuwáanʼla ngíná xa̱bu̱ bi̱ kúwá náa ku̱ba̱ʼ dí rígá náa rawuunʼ lamáa!
7 Rígi̱ nindxu̱u̱ xuajñala, dí nadxuu ga̱jma̱a̱ naʼni maʼdxúún xa̱bu̱ asndu nákhá wajyúuʼ ráʼ.
Xa̱bu̱ xuajin nigún kuya̱a̱ náa xuajin dí rígá mitsínguánʼ mu maxtáa ikhí.
8 Tsáá niraʼwíí maʼniuu rígi̱ Tiro rá.
Xuajin bi̱ nagruigi̱i̱n xa̱bu̱ ñajunʼ,
bi̱ nugujua̱ náa ikhaa nindxu̱ún príncipes,
bi̱ nugujua̱ náa ikhaa nundrigú gamajkhu náa mbá xúgíʼ tsu̱du̱u̱ ku̱ba̱ʼ.
9 Mínaaʼ má Jeobá bi̱ naʼtáñajúúnʼ ángeles niraʼwíí maguma rígi̱,
mu matsíjmaa numuu rí naʼnimbamínáʼ rí mitsiʼyáa,
mu maʼni májti̱i̱nʼ xúgíinʼ bi̱ nundrigú gamajkhu náa tsu̱du̱u̱ ku̱ba̱ʼ.
10 Wáxióo* Tarsis, akidáán xuajñanʼ xóo mañu Nilo.
Nánguá rígá nimbá náa naguájun barco.
11 Ikhaa nikrui̱ya̱ʼ ñawúunʼ xígií náa lamáa,
mu maʼbajngañiin xa̱bu̱ ñajunʼ.
Jeobá nikuʼma rí maguma gámbáa rí kúgumaʼá ga̱jma̱a̱ Fenicia.
12 Ga̱jma̱a̱ ikhaa naʼthí: “Ni xáʼdxanʼ itháan,
ikháán, bi̱ naguma gínáán wáxióo Sidón bi̱ xóó tsébóoʼ ga̱jma̱a̱ xa̱bu̱.
Atujxa̱a̱ʼ ga̱jma̱a̱ akidáán mi̱dxu̱ʼ xígií Kitim.
Ni má ikhí xáraxtaa tsímáá”.
13 ¡Gu̱ya̱a̱la! Ku̱bu̱únʼ caldeos.
Rígi̱ nindxu̱u̱ xuajin, raʼkháa Asiria,
dí niʼni rí náa mbaaʼ rígi̱ makuwá xujkhúʼ bi̱ kúwá náa ku̱ba̱ʼ mijxooʼ.*
Ikhiin nuxujxi̱ torre mu muni̱ gámbáa,
nini̱ nga̱jxi̱i̱ torre rí kúgumaʼá dí rígá ikhí
nini̱ rí maʼni̱i̱ i̱ndó idiuuʼ.
14 Gágawíinʼ a̱jkia̱la, barcos dí na̱ʼkha̱ náa Tarsis,
numuu dí kúgumaʼá ga̱jma̱a̱ niguma gámbáa.
15 Mbiʼi rúʼko̱ mambumún kuyáá xuajin Tiro mbá 70 tsiguʼ xó má mbiʼi dí xtáa mbáa rey. Índo̱ gárámuuʼ dí 70 tsiguʼ, xuajin Tiro magíʼnuu dí naʼthí náa ajmúú ndrígóo a̱ʼgu̱ bi̱ nagujuamínáʼ:
16 “A̱ʼgu̱ bi̱ nagujuamínáʼ bi̱ nimbumún kuyáá, ayá mbá arpa ga̱jma̱a̱ ayuʼ kuáʼáanʼ náa mbá xúgíʼ xuajin.
Atadi̱i̱ májánʼ arpa ndrígáaʼ,
atani̱ mbaʼa ajmúú,
mu xúʼko̱ marmáʼáan a̱jkiu̱ún kuyaaʼ”.
17 Índo̱ gárámaaʼ dí 70 tsiguʼ, Jeobá marmáʼáan a̱jkiu̱u̱n kaʼyoo Tiro ga̱jma̱a̱ ikhaa matanga̱a̱ magruigúu má xúʼko̱ numuu ga̱jma̱a̱ makudaminaʼ aʼkhá gajmíi̱n xa̱bu̱ ñajunʼ bi̱ kúwíin náa xúgíʼ tsu̱du̱u̱ ku̱ba̱ʼ. 18 Mú rí gáda̱a̱ʼ ga̱jma̱a̱ mbújkho̱o̱ maʼga̱nú mani̱ndxu̱u̱ kaʼwu náa Jeobá. Xáxtagijxi̱i̱ ní má xájoo, numuu rí nadaaʼ maʼga náa bi̱ kúwá náa inuu Jeobá, mu ikhiin muphiʼtsu asndu magiʼmúún ga̱jma̱a̱ mugíʼ xtíin rí mitsaanʼ.*