Raga̱jma̱ i̱yi̱i̱ʼ rí na̱jkha̱ inún Corintios

11 Nandoʼ rí maʼngo̱o̱ a̱jkia̱la ku̱yo̱ʼ maski ajndu ni̱ndxu̱ʼ xóo skágunʼ. ¡Mú kuwáanʼ má raʼngala! 2 Numuu rí naxmiéjunʼ ka̱ya̱la xó má Dios naxmiéjuunʼ kaʼyala, mú ikhúúnʼ nixnaxáanʼla dí mbuya̱a̱ mbáwíí xa̱bu̱ bi̱ nindxu̱u̱ Cristo, nandoʼ maxnaxáanʼla náa ikhaa xóo mbáa wáxá bi̱ xóó tábóoʼ ga̱jma̱a̱ xa̱bu̱. 3 Mú namíñúʼ dí xóo a̱bu̱nʼ nijmañuu niʼni nduwaaʼ Eva, dí edxa̱la ikháanʼ maguma nduwaaʼ ga̱jma̱a̱ munitsíngumi̱jna̱ náa rí gajkhun ma̱ngaa náa dí mikaʼwu rí kaʼyoo Cristo. 4 Numuu dí xó má xtáa rarígá, á mu mbáa na̱ʼkha̱ gáʼtala ga̱jma̱a̱ numuu i̱mba̱a̱ Jesús, mú raʼkháa bi̱ ikháanʼxu ni̱tala ga̱jma̱a̱ numuu o á mu ikháanʼ nindrígú i̱mba̱ espíritu* dí raʼkháa xóo nindrígú o i̱mba̱ kiʼsngáa dí májánʼ raʼkháa xóo nindrígú, ikháanʼ nundrígú dí naʼthí ikhaa. 5 Ikhúúnʼ nandxa̱ʼwa̱mínáʼ dí na̱nguá ni̱ndxu̱ʼ chíʼgiúnʼ náa apóstoles náa bi̱ naku̱mu̱ún rí nuni̱ xúgíʼ dí májánʼ. 6 Maski ajndu ikhúúnʼ tséjmañuʼ gátha̱ májánʼ mú gúʼdoo ku̱ma̱, mbá rí nindoo nisngajmá náa ikháanʼla náa xúgíʼ ñajunʼ rí ninixu̱.

7 O lá nikuʼdáminaʼ mbá aʼkhá índo̱ ninindxu̱ʼ xa̱bu̱ wabaaʼ náa ikháanʼla mu maguaʼdáá numala índo̱ nitaráʼala ga̱jma̱a̱ xúgíʼ a̱jkiu̱nʼ ajngáa májánʼ rí na̱ʼkha̱ náa Dios rí asndu tárumáanʼla ráʼ. 8 Asndu xóo ni̱ni̱ kúʼwúnʼ a̱ngiu̱lú bi̱ nagimbíi̱n náa i̱mba̱ níʼkhá índo̱ nigruígú rí nixnuʼ mu mambáyala. 9 Índo̱ nixtáá ga̱jma̱á nindxa̱la nirígá dí ndiyóʼ, mú nimbáa táni gajmúu, numuu rí a̱ngiu̱lú bi̱ niguwáʼ náa Macedonia nixnuʼ xúgíʼ dí ndiyóʼ. Xúʼko̱, ni̱ni̱ má xóo niʼngo̱o̱, mu xáni gajmála ikháanʼ ga̱jma̱a̱ xúʼko̱ má gáni xóó. 10 Nda̱yo̱o̱ májánʼ xó má dí gajkhun dí na̱ʼkha̱ náa Cristo dí rígá náa ikhúúnʼ, xániʼñúuʼ ra̱ni̱mbamínáʼ ga̱jma̱a̱ rígi̱, náa mbayuuʼ Acaya. 11 Náá numuu rá. Lá numuu rí tsíyóʼ ka̱ya̱la ráʼ. Dios ndaʼyoo dí nandoʼ ka̱ya̱la.

12 Ma̱ni̱ xó má e̱ni̱ mu xúʼko̱ xániʼñúuʼ muthi bi̱ nduyáʼ mbá rí muthi, bi̱ nandún muni̱ mbrígumíjná gajmiúxu náa ñajunʼ rí nuni̱ mbaʼumíjna̱ ga̱jma̱a̱. 13 Numuu rí xa̱bu̱ buʼko̱ ni̱ndxu̱ún apóstoles bi̱ minduwiinʼ, nuñajunʼ mu muni̱ nduwiinʼ eʼwíinʼ ga̱jma̱a̱ nurtaximíjná xóo apóstoles ndrígóo Cristo. 14 Tséʼniuʼ tsiánguá, numuu rí mínaaʼ má Gixa̱a̱* nartaximínáʼ xóo mbáa ángel bi̱ naʼni rí májánʼ.* 15 Ikha jngóo tséʼniulú tsiánguá dí xa̱bi̱i̱ ma̱ngaa nunimíjna̱ dí ni̱ndxu̱ún xa̱bu̱ bi̱ nuni̱ rí májánʼ. Mú ikhiin mumíniiʼ xó má kaʼñún ga̱jma̱a̱ numuu ñajunʼ dí nuni̱.

16 Na̱tala mbu̱júu̱ʼ: Nimbáa xándxa̱ʼwáminaʼ rí ni̱ndxu̱ʼ mbáa xa̱bu̱ skágunʼ. Mú, á mu xúʼko̱ ku̱ma̱la, gundrígúún xóo mbáa xa̱bu̱ skágunʼ, mu xúʼko̱ ikhúúnʼ ma̱ndoo manimbamínáʼ mbá chíʼgíiʼ. 17 Tsétala xóo naʼthí Tátá, na̱tala xóo maʼni mbáa xa̱bu̱ skágunʼ, bi̱ naku̱mu̱u̱ kaʼyaminaʼ i̱ndó ikháá ga̱jma̱a̱ naʼnimbamínáʼ. 18 Numuu rí mbaʼin xa̱bu̱* nuni̱ mbaʼumíjna̱ ga̱jma̱a̱ rí nuni̱, mangúún ma̱ni̱ xúʼko̱. 19 Numuu rí ikháanʼla “ndu̱ya̱a̱ wéñuuʼ”, ikha jngóo nundrígúun májánʼ bi̱ ni̱ndxu̱ún skágunʼ. 20 Ikha jngóo naʼngo̱o̱ a̱jkia̱la kuñu̱u̱n bi̱ nuniala xóo ñumbáá, asndu tsáá bi̱ gárígú káyala dí kuaʼdáá, asndu tsáá bi̱ gáguwíi kaʼyála dí nindxu̱u̱ ndrígála, asndu tsáa bi̱ nakuximinaʼ náa ikháanʼla ga̱jma̱a̱ asndu tsáa bi̱ naxpájtu inala.

21 Ma̱jti̱ʼ dí mu̱taxu̱ rígi̱, numuu rí tikuáanʼ dí ikháanʼla ndu̱yu̱xu xóo mbáa xa̱bu̱ bi̱ guabaaʼ wéñuuʼ.

Mú, á mu tikhuun xa̱bu̱ tsítiñúúnʼ rí muni̱ mbaʼumíjna̱, ikha jngóo mangúún xátiyuʼ rí manimbamínáʼ maski ajndu mbáa maʼthúnʼ rí ni̱ndxu̱ʼ skágunʼ. 22 Lá ni̱ndxu̱ún hebreos xáʼ. Ni̱ndxu̱ʼ má mangúún. Ni̱ndxu̱ún israelitas xáʼ. Ni̱ndxu̱ʼ má mangúún. Lá ni̱ndxu̱ún e̱ji̱i̱n* Abrahán xáʼ. Ni̱ndxu̱ʼ má mangúún. 23 Lá ni̱ndxu̱ún xa̱bi̱i̱ Cristo xáʼ. Nariʼña̱a̱ rígi̱ xóo mbáa bi̱ nakágu̱u̱nʼ: Ikhúúnʼ ni̱ni̱ itháan ki xóo ikhiin. Niñajunʼ itháan, mbaʼa nuthu nigúdáʼ náa guʼwá e̱jua̱nʼ. Mbaʼa nuthu nixnuʼ ga̱jma̱a̱ mbaʼa nuthu nigíʼ makhañúʼ. 24 Náa rí mbá witsu aʼphu̱ judíos nixnuʼ mbá 39 nuthu, 25 ajtsú nuthu nixnuʼ ga̱jma̱a̱ xkuíyá, mbá miʼtsú nixnuʼ ga̱jma̱a̱ itsí, ajtsú nuthu niguámbáa barco rí na̱jkhá ga̱jma̱a̱, mbá mbruʼun ga̱jma̱a̱ mbá mbiʼi nixtáá náa inuu lamáa. 26 Mbaʼa náa ni̱jkhá, nimíñúnʼ rí mugu̱ʼwu̱u̱n náa mañu, gamíi náa kuʼwáʼ, gamíi náa xa̱bu̱ xuajñunʼ ga̱jma̱a̱ náa i̱ʼwáʼ xuajen, gamíi náa xuajen mba̱ʼu̱, gamíi náa ku̱ba̱ʼ mijxooʼ,* náa lamáa, gamíi náa bi̱ nuthi̱í rí ni̱ndxu̱ún a̱ngiu̱lú, 27 niñejunʼ ga̱jma̱a̱ xúgíʼ tsiakii ndrígóʼ rí asndu táyáa xu̱ʼ, mbaʼa nuthu na̱nguá nigú, nixkidxu̱ʼ ga̱jma̱a̱ nikándawuʼ, mbaʼa nuthu na̱nguá nikuiʼtsu, nikrámuʼ ga̱jma̱a̱ ni̱jkha̱nú mbiʼi rí nánguá nigúʼdoo xtíñúʼ.*

28 Raʼkháa i̱ndó rúʼko̱, rígá i̱ʼwáʼ rí naʼni maxmiéjunʼ mámbá mbiʼi: Xóo rí maxmiéjunʼ ka̱ñu̱u̱n xúgíinʼ a̱ngiu̱lú náa nagimbíi̱n. 29 Á mu mbáa guabaaʼ, xúʼko̱ ma mangúún. Á mu mbáa najngrádaaʼ, rígi̱ naʼni makiʼnún.

30 Á mu nanimbamínáʼ, manimbamínáʼ ga̱jma̱a̱ náa rí nasngájma dí ni̱ndxu̱ʼ guabúnʼ. 31 Dios bi̱ nindxu̱u̱ Anu̱u̱ Tátá Jesús, ndaʼyoo rí na̱nguá e̱ni̱ ndúwaʼ, ikhaa kaʼyoo rí maguma mba̱a̱ asndu kámuu. 32 Náa Damasco, xa̱bu̱ ñajunʼ bi̱ nambáyúu rey Aretas nigruigi̱i̱n xa̱bu̱ rí muyajngoo mu murtuwún, 33 mú nixruigún ga̱jma̱a̱ mbá canasta* náa ventana ndrígóo xtájtsí* ga̱jma̱a̱ xúʼko̱ nikríñu̱u̱nʼ náa ñawúúnʼ xa̱bu̱ buʼko̱.