Isaías

 2 ¡Atayáá! Rí mikína marugoo náa ku̱ba̱ʼ

ga̱jma̱a̱ du̱u̱n skuniʼ marugoo xuajin mba̱ʼu̱,

mambiʼii Jeobá náa ikháán, rí naxpíbiinʼ makujmaa náa ikháán.

 3 Xuajin mba̱ʼu̱ magún náa agiaaʼ,

ga̱jma̱a̱ reyes magún náa naxpíbínʼ agiaaʼ.*

 5 Mbiʼi rúʼko̱, ma̱ta̱ya̱a̱ rígi̱ ga̱jma̱a̱ maʼni xpíbíínʼ,

a̱jkia̱a̱nʼ ra̱ʼkhá tháán gakhi̱i̱ gákijxi̱i̱ ga̱jma̱a̱ maʼdxuu,

rí gíʼdoo numuu dí rígá náa lamáa* ma̱ʼkha̱ náa ikháán,

ga̱jma̱a̱ rí guáʼdáá xuajin mba̱ʼu̱ ma̱ʼkha̱ náa ikháán.

 6 Mbaʼin camello muruguáá ku̱ba̱ʼ,*

camello bi̱ xkujiinʼ bi̱ kúwá náa Madián ga̱jma̱a̱ náa Efá.

Maguáʼnú náa nakarámáʼ tsigijñaʼ ndrígóʼ

ga̱jma̱a̱ magruiguíin ga̱jma̱a̱ ma̱ni̱ rí maʼni mitsiʼyáa goʼwóʼ rí mitsaanʼ.

 8 Tsíín ñajúúnʼ bugi̱, bi̱ nagún rijma̱a̱ xóo du̱u̱n,

ga̱jma̱a̱ xóo paloma náa guʼwúún rá.

 9 Numuu rí bi̱ kúwá náa islas* muguáʼthi̱i̱n náa ikhúún,

ga̱jma̱a̱ barcos rí na̱ʼkha̱ náa Tarsis nagún ginii mu maguwáʼ kudiin ejña̱a̱nʼ asndu náa mitsínguánʼ,

ma̱ngaa plata ga̱jma̱a̱ oro ndrígu̱ún mu majmaa náa mbiʼyuu Jeobá Dios ndrígáaʼ

bi̱ Kaʼwii náa Israel, numuu rí ikhaa maʼni mitsiʼñán.

10 Xa̱bu̱ bi̱ naguwáʼ muni̱i̱ xtájtsí ndrígáaʼ,

ga̱jma̱a̱ reyes ndrígu̱ún muni̱ ñajuaanʼ, numuu rí índo̱ nikiʼnún ni̱xna̱a̱ʼ,

mú índo̱ rí májáanʼ xa̱bu̱ nindxu̱ʼ magáwíinʼ a̱jkiu̱nʼ ka̱ya̱a̱ʼ.

11 Xkruguaaʼ mambaʼta má xúʼko̱,

xáxtuguáa rí mbiʼi ni má mbruʼun,

mu xúʼko̱ maguwáʼ kudúún rí guáʼdáá xuajin mba̱ʼu̱

mangiin gajmiún reyes ndrígu̱ún náa inaaʼ.

12 Numuu rí xúgíʼ xuajin ga̱jma̱a̱ xa̱bu̱ ñajunʼ bi̱ xúni̱ ñajuaanʼ mandátígi̱i̱n,

ga̱jma̱a̱ xuajin mba̱ʼu̱ maguanáa.

13 Rí mitsaanʼ dí rígá náa Líbano ma̱ʼkha̱ náa ikháán,

ixi̱ enebros, ixi̱ fresnos ga̱jma̱a̱ ixi̱ cipreses ma̱ʼkha̱ náa ikháán,

mu ma̱ni̱ rí maʼni̱i̱ mitsaanʼ náa guʼwá rí nduyamajkhuʼ,

ikhúún maxnu̱u̱ gamajkhu náa natsuajun rajkúʼ.

14 E̱jñu̱ún bi̱ nini̱ ngínáá maguwáʼ ga̱jma̱a̱ musmbati̱gu̱u̱n náa ikháán,

mbá xúgíinʼ bi̱ na̱nguá niguáʼdáá gamajkhu maguwáʼ musmbati̱gu̱u̱n náa rajkuáaʼ,

ga̱jma̱a̱ muxna mbiʼyaaʼ xuajñuu Jeobá, Sion ndrígóo bi̱ Kaʼwii náa Israel.

15 Ikhaa rí maguanáaʼ mbáwíín ga̱jma̱a̱ rí xáʼndúún gúyáaʼ ga̱jma̱a̱ rí xánújngoo nimbáa náa inaaʼ,

ma̱ni̱ rí mani̱ndxa̱a̱ʼ mbá rí maʼni maʼdxúún

ga̱jma̱a̱ rí makuwá gagi mbá xúgíinʼ xa̱bu̱ bi̱ gáguwáʼ rakúwá.

16 Xuajin ga̱jma̱a̱ reyes muxnaaʼ rí ndayáaʼ xóo e̱ʼni̱ mbáa a̱ʼgú nikhi̱i̱ bi̱ naxnijxúu a̱ʼdióo

ga̱jma̱a̱ phú gajkhun ma̱ta̱ya̱a̱ dí ikhúún Jeobá nindxu̱ʼ bi̱ naʼni kríña̱a̱nʼ

ga̱jma̱a̱ Dios ndrígóo Jacob bi̱ gíʼdoo Tsiaki̱i̱ nindxu̱u̱ bi̱ Maʼtsiríña̱a̱nʼ.

17 Ikhaa dí ma̱ʼkhá ka̱yo̱ʼ cobre, ma̱ʼkhá ka̱yo̱ʼ oro,

ikhaa dí ma̱ʼkhá ka̱yo̱ʼ hierro, ma̱ʼkhá ka̱yo̱ʼ plata,

ikhaa dí ma̱ʼkhá ka̱yo̱ʼ ixi̱, ma̱ʼkhá ka̱yo̱ʼ cobre,

ikhaa dí ma̱ʼkhá ka̱yo̱ʼ itsí, ma̱ʼkhá ka̱yo̱ʼ hierro,

ga̱jma̱a̱ maʼgíiʼ rí tsímáá xóo bi̱ mbayá edxu̱u̱ náa ikháán

ga̱jma̱a̱ rí májánʼ xóo bi̱ muxnaaʼ ñajunʼ dí matani̱.

18 Nánguá muwáán rí naguma ngíníi náa ku̱ba̱a̱ʼ

ni má rí maguma gámbáa náa awúu̱n mbayaaʼ.

Bi̱ kúwá náa awúu̱n xtájtsí ndrígáaʼ makáwíin

ga̱jma̱a̱ bi̱ kúwá náa awúu̱n xkruguaaʼ muni̱ mba̱a̱ Dios.

19 A̱jkha̱ʼ nánguá mani̱ndxu̱u̱ agiaaʼ rí mbiʼi,

ni má xámbiʼyaaʼ agiuuʼ gu̱nʼ.

Numuu rí Jeobá mani̱ndxu̱u̱ mbá aguʼ kámuu náa ikháán

ga̱jma̱a̱ Dios ndrígáaʼ mani̱ndxu̱u̱ rí maʼni mitsiʼñán.

20 A̱jkha̱ʼ ndrígáaʼ nánguá majnguáanʼ ga̱jma̱a̱ mambiʼi má xúʼko̱ gu̱nʼ ndrígáaʼ,

numuu rí Jeobá mani̱ndxu̱u̱ náa ikháán mbá aguʼ rí mbajyúuʼ asndu kámuu,

ga̱jma̱a̱ mambáa mbiʼi dí niraxtaa ngíná.

21 Ga̱jma̱a̱ mbá xúgíinʼ xa̱bu̱ xuajñaanʼ mani̱ndxu̱ún míjíinʼ,

ikhiin makuwá náa ku̱ba̱ʼ asndu kámuu.

Mani̱ndxu̱ún rudiuuʼ dí ikhúún nidu̱u̱,

ñajunʼ rí ni̱ni̱ ga̱jma̱a̱ ñawúnʼ mu maʼni mitsiʼñún.

22 Bi̱ chíʼgíiʼ* maʼga̱nú mani̱ndxu̱u̱ mbá mil,

ga̱jma̱a̱ bi̱ na̱nguá gíʼdoo numuu mani̱ndxu̱u̱ mbá xuajin rí gíʼdoo tsiaki̱i̱.