Isaías
40 “Gu̱ni̱i̱ a̱jkiu̱u̱n, gu̱ni̱i̱ a̱jkiu̱u̱n xuajñunʼ”, eʼthí Dios ndrígala.
2 “Gutha̱a̱n Jerusalén mbá dí maʼga̱nú náa a̱jkiu̱u̱n,
ga̱jma̱a̱ guta̱a̱nla dí ñajunʼ ndrígóo niguámbá,
ma̱ngaa dí nikiéʼkúun niguma numa̱a̱ má.
Ñawúunʼ Jeobá niʼni dí mamínuuʼ ga̱jma̱a̱ numuu xúgíʼ aʼkhá dí niʼni”.
3 Nawáán eʼthí gakhi̱i̱ mbáa náa ku̱ba̱ʼ mijxooʼ:*
“¡Gu̱ni̱ májáanʼ* kambo̱o̱ Jeobá!
Gu̱ni̱ jmbi̱i̱ kambo̱o̱ Dios ndrígulú náa ku̱ba̱ʼ mijxooʼ.
4 Gagumambáníi mbá xúgíʼ mata,*
kúbá ga̱jma̱a̱ bíjní magajta̱a̱.
Mbaʼyóoʼ dí magumambáníi ku̱ba̱ʼ dí gíʼdoo ndi̱jtsu̱u̱,
maʼni̱i̱ xkua̱ náa mbaaʼ náa dí na̱nguá mbánii.
5 Makujmaa tsiaki̱i̱ ndrígóo Jeobá,
mbá xúgíinʼ gúyáá,
numuu dí Jeobá má niʼthí”.
6 ¡Atadxawíín! Mbáa naʼthí: “¡Aratá!”.
Imba̱a̱ narajxi̱: “Ndiéjunʼ gátha rá.”
Imba̱a̱ nariʼña̱a̱: “Xúgíinʼ xa̱bu̱ numbaaʼ* nindxu̱ún xóo iná maxaʼ,
ga̱jma̱a̱ dí nandún kuyamijná* nindxu̱u̱ xóo ri̱ʼi̱ dí rígá xanáá.
7 Iná maxaʼ nujndooʼ,
ri̱ʼi̱ nujnduxtá,
numuu dí jxu̱u̱ʼ Jeobá nandijmuu ikhí.
Nakujmaa kaʼwu dí xa̱bu̱ nindxu̱ún xóo iná maxaʼ.
8 Iná maxaʼ nujndooʼ,
ri̱ʼi̱ nujnduxtá,
mú ajngóo Dios ndrígulú mbajyúuʼ asndu kámuu”.
9 Atatsimaaʼ náa mbá kúbá mitsídánʼ,
a̱ʼgu̱ bi̱ na̱ʼkha̱ kayóo ajngáa dí májánʼ náa Sion.
Gakhi̱i̱ gárata,
a̱ʼgu̱ bi̱ na̱ʼkha̱ kayóo ajngáa dí májánʼ náa Jerusalén,
gakhi̱i̱ gárata, xámíñáaʼ.
Arathún xa̱bu̱ xuajin bi̱ kúwá náa Judá: “Gi̱i̱ xtáa Dios ndrígala”.
10 ¡Atayáá! Tátá Jeobá bi̱ itháán mba̱a̱, ma̱ʼkha̱ ga̱jma̱a̱ tsiaki̱i̱ ndrígóo,
maʼtáñajunʼ ga̱jma̱a̱ ñawúunʼ.
¡Atayáá! Ikhaa kayá dí maxnúu mada̱a̱ʼ mámbáa,
ga̱jma̱a̱ xtáa má xawii mu maʼni numi̱ín.
11 Mañewu̱u̱n mugiu̱u̱ xóo eʼni mbáa baxtúu.
Magímbíin ejín múgiúu ga̱jma̱a̱ ñawúunʼ,
ga̱jma̱a̱ maguriʼiin* gáʼga.
Tsu̱ma̱á gáʼga kagui̱i̱n mugu̱ bi̱ nuxníxúúnʼ e̱jñu̱ún.
12 Tsáá nigiéwan iyaʼ ga̱jma̱a̱ a̱jkiu̱u̱n ñawúunʼ rá.
Tsáá nigiéwan mekhu ga̱jma̱a̱ ñawún paskoo* rá.
Tsáá nigímbóó yujndaʼ dí rígá náa tsu̱du̱u̱ ku̱ba̱ʼ náa mbá xua̱a̱ chíʼgíiʼ rá.
Tsáá nigiéwan kúbá náa mbá balanza
ga̱jma̱a̱ bíjní náa mbá báscula rá.
13 Tsáá nigiéwan tsiaki̱i̱ ndrígóo* Jeobá rá.
Tsáá gándoo gáxnúu consejo ga̱jma̱a̱ maʼsngóo xá.
14 Tsáá nirajxu̱u̱ mu ma̱ndoo makro̱ʼo̱o̱ xá.
Tsáá niʼsngóo ndiéjunʼ nindxu̱u̱ kamba̱a̱ dí májánʼ xá.
Tsáá exnúu ku̱ma̱ xá.
Tsáá esngájmuu kamba̱a̱ gajkhun náa rígá ku̱ma̱ xá.
15 ¡Atayáá! Ikhaa ndaʼñún xa̱bu̱ xuajin xóo mbá gota iyaʼ náa cubeta,
ndaʼñún rí nindxu̱ún xóo yujndaʼ dí kagu̱u̱ náa mbá balanza.
¡Atayáá! Ikhaa nakujxi̱ islas* rí ndaʼyoo xóo yujndaʼ.
16 Xáʼngo̱o̱ ixi̱ dí rígá náa Líbano mu mi̱kha má xúʼko̱ ga̱jma̱a̱ aguʼ,
ga̱jma̱a̱ xujkhú xáná bi̱ kúwá ikhí,
xáʼngo̱o̱ mu mixnájxi̱i̱n náa mbá tsigijñaʼ dí nakarámáʼ.
17 Náa inuu ikhaa, mbá xúgíʼ xuajin mba̱ʼu̱ dí rígá nindxu̱u̱ xóo mbá dí nda̱a̱,
ikhaa ndaʼyoo rí nda̱a̱ dí nindxu̱ún, xó mbá dí na̱nguá rígá.
18 Tsáá gándoo gúni̱ mbríguii ga̱jma̱a̱ Dios rá.
Ndiéjunʼ dí ma̱ndoo mu̱ni̱ mbríguii ga̱jma̱a̱ xá.
19 Bi̱ najmañuu nañejunʼ, naʼnii mbáa xándú ajua̱nʼ,*
bi̱ nañejuunʼ ajua̱nʼ naxtájmuu oro
ga̱jma̱a̱ naʼni cadena dí plata.
20 Atraʼwíí mbá ixi̱ mu majuixnájxi̱ xóo tsigijñaʼ,
mbá ixi̱ dí xíga.
Atayáaʼ mbáa bi̱ najmañuu nañajunʼ májánʼ,
mu maʼnii mbáa xándú ga̱jma̱a̱ ixi̱ dí xángájxi̱i̱.
21 Lá tséya̱a̱ ráʼ.
Lá na̱nguá nidxa̱wíín ráʼ.
Lá tájuiʼtála asndu nákha nigi̱ʼdu̱u̱ ráʼ.
Kaʼníí xóó tsékruaʼala asndu nákha nigi̱ʼi̱ ku̱ba̱ʼ ráʼ.
22 Xtáa mbáa náa tsu̱du̱u̱ ku̱ba̱ʼ nújndú,
xóo tsíʼbu* kaʼniún xa̱bu̱ bi̱ kúwá ikhí.
Ikhaa naxtriga mekhu xóo mbá xtíin mbawiʼ
ga̱jma̱a̱ naxtriga xóo mbá guʼwá xtíin náa makuwá xa̱bu̱.
23 Narígúu ñajunʼ ndrígu̱ún xa̱bu̱ bi̱ guáʼdáá numún
ga̱jma̱a̱ naʼni dí bi̱ nunimbaníí xkujndu* mani̱ndxu̱ún xóo mbá dí na̱nguá rígá.
24 Nindxu̱ún xóo mbá planta dí ndiʼkúú nijuiʼdu,
índo̱ naguámbá rajuiʼdu,
naxkuaʼán ajmu̱u̱ náa ku̱ba̱ʼ,
mú índo̱ nandijmuu giñánʼ nujndooʼ,
ga̱jma̱a̱ giñánʼ na̱jkha̱ kayóo xóo ejkha̱ kayóo mbá náskha.
25 “Tsáá gándoo gúni̱ mbrígún ga̱jmu̱ʼ rá.
Tsáá i̱mba̱a̱ xóo ikhúún rá.”, eʼthí bi̱ Kaʼwii.
26 “Guxujxí e̱dxa̱laʼ mekhuíí ga̱jma̱a̱ gu̱ya̱a̱.
Tsáá niʼni xúgíʼ rígi̱ rá.
Ikhaa bi̱ naʼni dí magajnún xóo soldado,
naguxnii mámbíin dí ikhiin, mámbáa naʼthúu̱n ga̱jma̱a̱ mbiʼyuu.
Ra̱ʼkhá tháán mba̱a̱ tsiaki̱i̱ ndrígóo ga̱jma̱a̱ ra̱ʼkhá tháán mitsaanʼ,*
mámbáa gíʼ náa kaʼyoo.
27 Náá numuu dí naratá Jacob, mangáán Israel:
‹Ngu̱ʼwa̱ rígá kambo̱ʼ eʼyoo Jeobá,
Dios tséʼniuʼ dí májánʼ› rá.
28 Lá tsétayáá ráʼ. Lá na̱nguá nitadxawíín ráʼ.
Jeobá, bi̱ Niʼni mbá xúgíʼ dí rígá asndu náa naguámbári̱go̱o̱ ku̱ba̱ʼ,
nindxu̱u̱ mbáa Dios bi̱ xtáa asndu kámuu.
Ikhaa nditháan tségaaʼ ni má tséʼni néʼngo̱o̱.
Nimbáa tséʼngo̱o̱ gákro̱ʼo̱o̱ dí najmañuu.
29 Ikhaa naxnúu tsiaki̱i̱ bi̱ néʼngo̱o̱
ga̱jma̱a̱ naxnúu tsiaki̱i̱ bi̱ nakáguabaaʼ.
30 Asndu jiámá naʼni néʼngu̱u̱n ga̱jma̱a̱ nagiinʼ,
mangiin najngrádiin ga̱jma̱a̱ najngutigi̱i̱n,
31 mú bi̱ nuguáʼthi̱i̱n náa Jeobá muda̱a̱ tsiaki̱i̱.
Matujxu̱u̱n magún ga̱jma̱a̱ xpíjpiúún xóo ejkha̱ mbáa bi̱yú.
Magáñún, mú xágiinʼ,
majngruigu̱u̱n, mú xáʼni néʼngu̱u̱n”.