Ezequiel

13 Nigruígú mbu̱júu̱ ajngóo Jeobá. Niʼthúnʼ: 2 “A̱ʼdióo xa̱biya̱, aratáríya̱ʼ dí maguáʼníí profeta bi̱ kúwá náa Israel, ga̱jma̱a̱ arathún buʼko̱ bi̱ nutariya̱ʼ* dí nakumu̱ún ikhiín: ‹Gudxawíín dí naʼthí Jeobá. 3 Rígi̱ dí naʼthí Tátá Jeobá bi̱ itháán mba̱a̱: “¡Ngíníi lá profeta skágunʼ, bi̱ nuthi rí eñún ikhiin ga̱jma̱a̱ nda̱a̱ rí ndiyáá! 4 Ikháán Israel, profeta ndrígáaʼ niguánú ninindxu̱ún xóo igi̱ bi̱ kúwá náa niguma gámbáa. 5 Ikháanʼ xágájnala náa nixkudiri̱ya̱ʼ náa xtájtsí dí niguma ga̱jma̱a̱ itsí mu muni̱i̱ náa goʼwóo Israel, mu xúʼko̱ Israel mawiji̱ má xúʼko̱ náa nuxmijná náa mbiʼi ndrígóo Jeobá”. 6 “Ndi̱ya̱a̱ rí niwasngájmala* dí minduwaʼ ga̱jma̱a̱ nitaríya̱ʼla rí minduwaʼ, jngrui̱gala ru̱ta̱ ‹Rígi̱ nindxu̱u̱ ajngóo Jeobá›, maski ajndu Jeobá na̱nguá nikuʼmáanʼla, ga̱jma̱a̱ asndu nugua̱ʼti̱i̱nla rí mambanúu rí nu̱tala. 7 Minduwaʼ rí niwasngájmala mbu̱ya̱a̱ ga̱jma̱a̱ minduwaʼ rí nitaríya̱ʼla, índo̱ nitaríya̱ʼla: ‹Rígi̱ nindxu̱u̱ ajngóo Jeobá›, maski ajndu ikhúún nda̱a̱ rí ni̱tala”›.

8 ‹Ikha jngóo rígi̱ dí naʼthí Tátá Jeobá bi̱ itháán mba̱a̱: “‹Numuu dí ikháanʼla ni̱tala rí minduwaʼ ga̱jma̱a̱ minduwaʼ rí niwasngájmala mbu̱ya̱a̱›, eʼthí Tátá Jeobá bi̱ itháán mba̱a̱”. 9 Ga̱jma̱a̱ ñawúnʼ ma̱ni̱ rí mumíniiʼ profeta buʼko̱ bi̱ nduyáá rí nawasngájmún rí minduwaʼ ga̱jma̱a̱ bi̱ nutari̱ya̱ʼ rí minduwaʼ. Xákúwá náa majñu̱únʼ xa̱bu̱ bi̱ naku̱mu̱ʼ ka̱ñu̱u̱n, ni má xágumaraʼmáʼ mbiʼñún náa kiʼnirámáʼ mbiʼñún bi̱ kúwá náa goʼwóo Israel, ni má xátangi̱ín náa ku̱ba̱ʼ Israel, ga̱jma̱a̱ ikháanʼla mu̱ʼgua̱nú mbu̱ya̱a̱ dí ikhúún nindxu̱ʼ Tátá Jeobá bi̱ itháán mba̱a̱. 10 Mbá xúgíʼ rúʼko̱ marigá, numuu rí ikhiin nini̱ rí xa̱bu̱ xuajñunʼ magajnuríñu̱u̱nʼ índo̱ nithi “¡Rígá dí tsímáá!”, mú rí phú gajkhun nda̱a̱ dí tsímáá. Índo̱ mbáa naʼni pared dí wabaʼ, ikhiin nuxtajmáá idiʼ›.*

11 Bi̱ nuxtajmáá idiʼ náa pared, arathún dí mangajxi̱i̱. Ma̱ʼkha̱ mbá ruʼwambiʼ, maxnúu eʼtsí* ga̱jma̱a̱ ma̱ʼkha̱ mbá giñámbiʼ dí maʼni gámbáa. 12 Ga̱jma̱a̱ índo̱ pared gájngajxi̱i̱, murajxa̱la: ‹Náá ni̱jkha̱ idiʼ dí nigu̱u̱ rá.›

13 Ikha jngóo rígi̱ dí naʼthí Tátá Jeobá bi̱ itháán mba̱a̱: ‹Índo̱ gákásnga̱ñu̱ʼ ma̱ni̱ rí maxnúu giñámbiʼ, índo̱ gákiʼnún ma̱ni̱ rí maxnúu ruʼwambiʼ ga̱jma̱a̱ ma̱ni̱ rí maxnúu eʼtsí mu ma̱ni̱ gámbáa pared numuu dí ra̱ʼkhá tháán ekiʼnún. 14 Majkúmigu̱u̱ pared dí ikháanʼla nixtajmáá idiʼ, ga̱jma̱a̱ ma̱ni̱ rí mangajxi̱i̱, i̱ndó rajkhúu wájun gáni̱. Índo̱ gáguma gámbáa xuajin, ikháanʼ makhañála awúu̱n ga̱jma̱a̱ mu̱ʼgua̱nú mbu̱ya̱a̱la dí ikhúún nindxu̱ʼ Jeobá›.

15 ‹Índo̱ gáxidíjmuu xúgíʼ rí nakásngañu̱ʼ náa pared ga̱jma̱a̱ náa tsu̱du̱ún bi̱ nixtajmáá idiʼ, mathu̱u̱n: “Nándáa pared ga̱jma̱a̱ ndawi̱i̱n bi̱ nixtajmáá idiʼ ma̱ngaa. 16 Profeta bi̱ kúwá náa Israel nindáti̱gi̱i̱n, bi̱ nutari̱ya̱ʼ ga̱jma̱a̱ numuu Jerusalén ga̱jma̱a̱ bi̱ nuthi rí nawasngájmún mbuyáá dí tsímáá índo̱ nda̱a̱ dí tsímáá”›, eʼthí Tátá Jeobá bi̱ itháán mba̱a̱.

17 Ikháán a̱ʼdióo xa̱biya̱, atañún wa̱ʼxa̱ʼ* bi̱ kúwá náa xuajñanʼ bi̱ mbaʼ nuthi̱í dí nutari̱ya̱ʼ ga̱jma̱a̱ aratáriya̱ʼ dí maguáʼníí. 18 Arathún: ‹Rígi̱ dí naʼthí Tátá Jeobá bi̱ itháán mba̱a̱: “¡Ngíníi lá gu̱ʼu̱ bi̱ nurugui̱i̱n xa̱bu̱ xóo ru̱gui̱i̱n ñu̱ʼu̱ índo̱ nuxmí xtíin dí natra̱ʼa̱ náa ñawúúnʼ* ga̱jma̱a̱ nuni̱ xtíin dí nagrigu edxu̱ún dí mixtiʼkhu mba̱ʼu̱! Lá kuwáanʼ rurugui̱i̱n xa̱bu̱ xuajñunʼ xóo ru̱gui̱i̱n ñu̱ʼu̱ ga̱jma̱a̱ nuʼgími̱jna̱ rí mu̱ni̱ káwumíjnála ráʼ. 19 Ga̱jma̱a̱ kááʼ nguéjma̱* cebada ga̱jma̱a̱ mbá nguáthá xuíʼtóo pan mutsijmún náa majñu̱u̱ʼ xuajñunʼ dí muradíin bi̱ xáʼyóoʼ dí makhañún ga̱jma̱a̱ dí muniʼñúúnʼ rí makuwá bi̱ xáʼyóoʼ rí makuwá ráʼ. Xígi̱ kaʼnii eni̱la índo̱ nu̱ni̱ nduwaaʼ xuajñunʼ dí naʼdxawuun nduwaʼ rí nu̱tala”›.

20 Ikha jngóo rígi̱ dí naʼthí Tátá Jeobá bi̱ itháán mba̱a̱: ‹Ikháanʼla gu̱ʼu̱, nawi̱yu̱ʼ eʼni xtíin dí najmala mu murugui̱i̱n xa̱bu̱ xóo ru̱gui̱i̱n ñu̱ʼu̱, maxkuʼtuwíi náa ñawúúnʼ ga̱jma̱a̱ ma̱ni̱ káwíin bi̱ ikháanʼla kuwáanʼ rurugui̱i̱n xóo ñu̱ʼu̱. 21 Maxkuʼtuwíi xtíin dí trámáʼ edxu̱ún ga̱jma̱a̱ ma̱ni̱ káwíin xa̱bu̱ xuajñunʼ náa ñawánla, ikhiin ni xánindxu̱ún bi̱ maʼngala murugui̱i̱n, ga̱jma̱a̱ ikháanʼla mu̱ʼgua̱nú mbu̱ya̱a̱ rí ikhúún nindxu̱ʼ Jeobá. 22 Numuu rí ni̱nila rí makáwabiinʼ bi̱ míjíinʼ ga̱jma̱a̱ nduwaʼ rí nuthu̱nʼla índo̱ ikhúún na̱nguá xtáá ra̱ni̱ rí mumíniiʼ ikhiin, ga̱jma̱a̱ nixnu̱u̱nla tsiaki̱i̱ bi̱ ra̱míjíinʼ mu xúniña̱a̱n runi̱ dí ra̱májánʼ mu makuwá má xúʼko̱. 23 Ikha jngóo gu̱ʼu̱, ni xúya̱a̱la itháan dí mawasngájmala rí nduwaʼ, ni má ni xúya̱a̱ dí marigá nda̱wa̱á, ga̱jma̱a̱ ikhúún ma̱ni̱ káwíin xa̱bu̱ xuajñunʼ náa ñawánla, ga̱jma̱a̱ ikháanʼla mu̱ʼgua̱nú mbu̱ya̱a̱ rí ikhúún nindxu̱ʼ Jeobá›”.