Ezequiel

43 Ikhú xa̱biya̱ ni̱jkha̱ kañún xígií náa xkrugua dí gíʼma náa xígií nagájnuu a̱jkha̱ʼ.* 2 Ikhí ndi̱yo̱o̱ agiuuʼ Dios ndrígóo Israel dí na̱ʼkha̱ xígií náa nagájnuu a̱jkha̱ʼ, aʼwóo Dios nawáán xóo ewáán iyaʼ rí xkujyuʼ ga̱jma̱a̱ náa ku̱ba̱ʼ nixpíbínʼ. 3 Dí niwasngájmuʼ* rígi̱ nindxu̱u̱ ikháá má xóo dí niwasngájmuʼ índo̱ níʼkhá* gáni̱ gámbáa xuajin, nakujmaa dí nindxu̱u̱ ikháá má xóo rí ndi̱yo̱o̱ náa mijngii rawuunʼ mañu Kebar ga̱jma̱a̱ nismbatígo̱ʼ asndu mbayííʼ.

4 Ikhú agiuuʼ Jeobá nito̱ʼo̱o̱ náa xkrugoo guʼwá dí gíʼma xígií náa nagájnuu a̱jkha̱ʼ. 5 Ikhú mbá tsiaki̱i̱ dí kaʼwu* ni̱ʼkha̱ kañún náa rexo̱o̱ guʼwá dí awúún ga̱jma̱a̱ ndi̱yo̱o̱ dí agiuuʼ Jeobá dí naxpíbínʼ nirígá náa xúgíʼ guʼwá. 6 Nda̱wa̱á nidxawuun dí mbáa niʼthí asndu náa awúún guʼwá, ikhú xa̱biya̱ ni̱ʼkha̱ ga̱jma̱a̱ niwi̱ji̱ náa níjniúʼ. 7 Niʼthúnʼ:*

“A̱ʼdióo xa̱biya̱, gi̱i̱ nindxu̱u̱ náa gíʼ xíliúʼ* rí natañájunʼ, ma̱ngaa náa nasngutámáʼ rajkúʼ, gi̱i̱ náa maxtáá asndu kámuu náa majñu̱únʼ xa̱bu̱ xuajñunʼ Israel. Bi̱ kúwá náa goʼwóo Israel ni xátangi̱ín muni̱ tsagáá mbiʼyuʼ rí kaʼwu, ni má ikhiin ni má reyes ndrígu̱ún, ni xúni̱ gachíí mbiʼyuʼ rí mbuyamajkún eʼwíinʼ dioses* ga̱jma̱a̱ wajñúúnʼ reyes ndrígu̱ún. 8 Índo̱ nigíʼ riejuun xkrugún náa níjniúu riejuun xkrugoʼ ga̱jma̱a̱ índo̱ nitsuaʼan xi̱gu̱u̱ xkrugún náa níjniúu xi̱gu̱u̱ xkrugoʼ káaʼ naguanúu imbóó pared dí narui̱ʼta̱a̱ guʼwúxu, índo̱ ikhiin nini̱ xúgíʼ enii rí mitsaga nisngajma̱ rí tséyamajkuíí mbiʼyuʼ rí kaʼwu, ikha jngóo índo̱ nikásngañuʼ ni̱ni̱ gámbíin. 9 Dí xúgi̱, guniña̱a̱ʼ ruyamajkhún eʼwíinʼ dioses ga̱jma̱a̱ guni̱ tsíngu̱u̱n wajñúúnʼ reyes ndrígu̱ún náa ikhúún ga̱jma̱a̱ ikhúún maxtáá náa majñu̱únʼ ikhiin asndu kámuu.

10 Ikháán a̱ʼdióo xa̱biya̱, arathún bi̱ kúwá náa goʼwóo Israel xú káʼnii nindxu̱u̱ guʼwá náa nduyamajkuíí Dios, mu xúʼko̱ ikhiin matiñu̱u̱n ga̱jma̱a̱ numuu rí nikiéʼkhúún ga̱jma̱a̱ ikhiin mbuyáá xú káʼnii kri̱ga̱.* 11 Á mu nati̱ñu̱u̱nʼ ga̱jma̱a̱ numuu xúgíʼ dí ikhiin nini̱, atasngájmún xtiʼkhuu guʼwá, xóo niguma, riejuun náa nagajni̱ín ga̱jma̱a̱, ma̱ngaa náa natu̱ʼu̱u̱n ga̱jma̱a̱. Atasngájmúún xúgíʼ xtiʼkhuu, ikha, awan ga̱jma̱a̱ xtángoo dí rígá ikhí. Ataniraʼmáʼ xúgíʼ náa inún ikhiin mu xúʼko̱ mbuyáá xúgíʼ xtiʼkhuu ga̱jma̱a̱ munimbáníí ikha. 12 Rígi̱ nindxu̱u̱ xtángoo dí rígá náa guʼwá dí nduyamajkuíí Dios: Xúgíʼ ku̱ba̱ʼ dí rígá mbájndi náa kúbá dí mitsídánʼ nindxu̱u̱ kaʼwu. Xúʼko̱, rígi̱ nindxu̱u̱ xtángoo dí rígá ikhí.

13 Rí xúgi̱ masngajmáaʼ xóo nixtagiéwan náa nutsikarámáʼ tsigijñaʼ, nixtagiéwan ikháá má xóo nixtagiéwan guʼwá náa nduyamajkuíí Dios.* Rajkhúu dí gíʼ, rí mitsídánʼ naʼni 50 centímetros* ga̱jma̱a̱ xúʼko̱ má dí fríyo̱o̱ʼ. Dí kri̱ga̱ rawuunʼ naʼni 22 centímetros* rí ma̱ja̱nʼ. Rígi̱ nindxu̱u̱ rajkhúu náa nutsikarámáʼ tsigijñaʼ. 14 Asndu náa rajkhúu dí gíʼ mbayííʼ asndu náa dí maʼni raga̱jma̱ piso naʼni mbá metro* ga̱jma̱a̱ dí fríyo̱o̱ʼ náa rawuunʼ dí ma̱ja̱nʼ naʼni 50 centímetros. Náa raga̱jma̱ piso asndu náa nagi̱ʼdu̱u̱ dí maʼni ajtsú piso, dí mitsídánʼ naʼni a̱jma̱ metro* ga̱jma̱a̱ dí fríyo̱o̱ʼ náa rawuunʼ dí ma̱ja̱nʼ naʼni 50 centímetros. 15 Náa rí iwáá piso, náa dí grígu aguʼ, rí mitsídánʼ naʼni a̱jma̱ metro ga̱jma̱a̱ náa mámbá eskíniu̱u̱ trámáʼ chi̱ji̱ʼ. 16 Náa dí grígu aguʼ rígi̱ nindxu̱u̱ cuadrado, dí mbaʼ naʼni majun metro* ga̱jma̱a̱ xúʼko̱ má dí ma̱ja̱nʼ. 17 Náa mbá nájkhu̱ níjniúu dí maʼni ragajtsú piso, dí mbaʼ naʼni juwan metro* ga̱jma̱a̱ xúʼko̱ má dí ma̱ja̱nʼ ma̱ngaa, dí fríyo̱o̱ʼ náa rawuunʼ dí ma̱ja̱nʼ naʼni 25 centímetros,* ga̱jma̱a̱ náa rajkhúu dí timbá piso dí fríyo̱o̱ʼ náa rawuunʼ dí ma̱ja̱nʼ naʼni 50 centímetros.

Ga̱jma̱a̱ escalera dí natsimuu náa nuxnajxi̱ tsigijñaʼ naʼni inuu xígií náa nagájnuu a̱jkha̱ʼ”.

18 Ikhú niʼthúnʼ: “A̱ʼdióo xa̱biya̱, rígi̱ dí naʼthí Tátá Jeobá bi̱ itháán mba̱a̱: ‹Rígi̱ nindxu̱u̱ awan dí gíʼmaa munimbáníí índo̱ gáguma náa mikarámáʼ tsigijñaʼ mu xúʼko̱ muxnajxi̱ tsigijñaʼ dí nakarámáʼ ikhí ma̱ngaa muxtijyáá ga̱jma̱a̱ eʼdi›.

19 ‹Maraxniu̱u̱n mbáa a̱ʼdá xédí ndxajkun levitas mu muxnajxi̱ tsigijñaʼ ga̱jma̱a̱ numuu aʼkhá. Bugi̱ nindxu̱ún bi̱ naguwáʼ náa Sadoc, bi̱ nuxuʼmamijná náa ikhúún mu muni̱ ñajunʼ, eʼthí Tátá Jeobá bi̱ itháán mba̱a̱. 20 Mu maguma kaʼwi̱i̱ ga̱jma̱a̱ majngudi̱i̱ aʼkhúun náa nakarámáʼ tsigijñaʼ, mbi̱ya̱ chíʼgíiʼ* eʼdiuu ga̱jma̱a̱ mataxtajmáá náa mbá a̱jkhu̱ chi̱jyu̱u̱ʼ dí nakarámáʼ tsigijñaʼ, náa mbá nájkhu̱ eskíniu̱u̱ dí náa nakarámáʼ tsigijñaʼ ma̱ngaa náa mbájndi rawuunʼ. 21 Nda̱wa̱á ayi̱ jcháa a̱ʼdá xédí mu mikhaa náa rígá guʼwá rí nduyamajkuíí Dios, náa niguma mu mixnájxi̱ tsigijñaʼ ga̱jma̱a̱ numuu aʼkhá, náa rexo̱o̱ guʼwá. 22 Índo̱ gáʼni raga̱jma̱ mbiʼi maraxnajxíi mbáa chivátu* bi̱ májáanʼ xóo tsigijñaʼ ga̱jma̱a̱ numuu aʼkhá, ga̱jma̱a̱ ndxajkun muni̱ kaʼwi̱i̱ aʼkhúun náa nuxnajxi̱ tsigijñaʼ, xó má nini̱ kaʼwi̱i̱ aʼkhúun índo̱ nixnajxi̱i̱ a̱ʼdá xédí›.

23 ‹Índo̱ gámbáaʼ ratani̱ kaʼwi̱i̱ aʼkhúun ikhú maraxnaxíi mbáa a̱ʼdá xédí bi̱ májáanʼ ga̱jma̱a̱ mbáa mugu̱ e̱jmba̱a̱ bi̱ májáanʼ. 24 Maraxnajxíin náa Jeobá ga̱jma̱a̱ ndxajkun muxtajmii idú ga̱jma̱a̱ nda̱wa̱á muxnajxi̱i̱n xóo tsigijñaʼ gamajkhu dí nakarámáʼ náa inuu Jeobá. 25 Mbá xmáná maraxnajxíin xóo tsigijñaʼ dí najuixnájxi̱ mámbá mbiʼi ga̱jma̱a̱ numuu aʼkhá, maraxnajxíi mbáa chivátu, mbáa a̱ʼdá xédí, mbáa mugu̱ e̱jmba̱a̱, maraxnaxíin xujkhúʼ bi̱ míjíinʼ. 26 Mbá xmáná ikhiin muni̱ jngudi̱i̱ aʼkhúun náa nakarámáʼ tsigijñaʼ, muni̱ kaʼwi̱i̱ ga̱jma̱a̱ muni̱ ndxo̱o̱. 27 Índo̱ gárámuuʼ dí mbá xmáná, ga̱jma̱a̱ índo̱ gágíʼdu̱u̱ dí maʼni migiñuʼ mbiʼi, ikhú ndxajkun xúgíʼ mbiʼi muxnajxi̱ tsigijñaʼ ndrígu̱ún* dí nakarámáʼ ga̱jma̱a̱ tsigijñaʼ rí tsímáá* ga̱jma̱a̱ ikhúún maxtáá gagi ga̱jma̱á nindxa̱la›, eʼthí Tátá Jeobá bi̱ itháán mba̱a̱”.