Isaías
30 “¡Ngíníi lá e̱ji̱n bi̱ gújkhúʼ a̱jkiu̱ún, eʼthí Jeobá,
bi̱ nunimbaníí awan dí raʼkháa ndrígóʼ ikhúún,
bi̱ nambánúún,* mú raʼkháa xóo ikhúún nandoʼ,
nuxudamíjna̱ itháan aʼkhá ki xóo dí nini̱ má!
2 Asndu tsérajxuʼ índo̱ naguájtan Egipto,
mu dí mumbayumíjná* náa faraón
ga̱jma̱a̱ mumbayumíjná náa agoo xkamijxoo Egipto.
3 Mú dí mambáyala faraón mani̱ndxu̱u̱ mbá dí maʼni mati̱ya̱la,
ga̱jma̱a̱ dí mumbayumíjná náa agoo xkamijxoo Egipto, maʼni dí magajnúu majkuala.
4 Numuu dí príncipes ndrígiu̱ún kúwá náa Zoan,
ga̱jma̱a̱ bi̱ nagún kuñu̱u̱n ajngáa niguánú náa Hanés.
5 Xúgíinʼ ikhiin mati̱ñu̱u̱nʼ
gáʼni mbá xuajin dí nda̱a̱ dí ejmaa,
numuu dí tsémbáñún,
i̱ndó naʼni dí mati̱ñu̱u̱nʼ ga̱jma̱a̱ magajnúu majkhún”.
6 Rígi̱ nindxu̱u̱ dí najuiʼthá maguáʼníí xujkhúʼ bi̱ kúwá náa sur:
Náa ku̱ba̱ʼ dí rígá tsingíná ga̱jma̱a̱ gamiéjunʼ,
mbaaʼ náa kúwá león, león bi̱ nundxa̱ʼwa̱,
a̱bu̱nʼ mbiiʼ ga̱jma̱a̱ a̱bu̱nʼ bi̱ na̱jkha̱ náa inuu giñánʼ,
muda gágún dí gíʼdoo numuu náa tsu̱du̱ún búrru
ga̱jma̱a̱ i̱ʼwáʼ dí guáʼdáá mudra̱ma̱ʼ náa ndi̱jtsu̱ún camellos.
Mú xúgíʼ rígi̱ xámbáñún xa̱bu̱ xuajin.
7 Numuu dí na̱nguá gíʼdoo numuu dí nambáñúún Egipto.
Ikha jngóo ni̱xna̱ mbiʼyuu “Rahab,* bi̱ naguanúu wíí”.
8 “Dí xúgi̱ ayu̱u̱ʼ, ataniraʼmáʼ náa inún ikhiin náa mbá xajpa paska
ga̱jma̱a̱ ataniraʼmáʼ náa mbá libro,
mu xúʼko̱ majmaa nda̱wa̱á
ga̱jma̱a̱ xúʼko̱ makujmaa dí ikhúún ni̱tha̱.
9 Numuu dí nindxu̱u̱ mbá xuajin dí tséʼnimbo̱o̱, e̱ji̱n bi̱ nuni̱ nduwaʼ,
e̱ji̱n bi̱ tsíñún gúdxawíín xtángoo* ndrígóo Jeobá.
10 Ikhiin nuthúún videntes* ‹Xúya̱a̱la›
ga̱jma̱a̱ nuthúún xa̱bekha bi̱ nduyáá dí nawasngájmún* ‹Xútuxu̱ dí niwasngájmala dí nindxu̱u̱ gajkhun.
Gu̱tuxu̱ ajngáa dí maʼni maʼdxuxu, gu̱taríya̱ʼ dí nduwaʼ dí maʼni maʼdxuxu.
11 Gu̱ni̱ tsíngumi̱jna̱la náa kamba̱a̱, gagajnúriyala náa kamba̱a̱.
Guniʼñááʼ rutsijii náa inuxu̱ʼ bi̱ Kaʼwii náa Israel›”.
12 Rígi̱ dí naʼthí bi̱ Kaʼwii náa Israel:
“Numuu dí ikháanʼla ni̱ni̱ gaʼduunʼ ajngáa rígi̱,
niku̱ma̱laʼ kuya̱a̱ dí ragájkhun ga̱jma̱a̱ nini̱mba̱la rí nduwaʼ,
ga̱jma̱a̱ numbayúmíjná ikhí,
13 dí raʼkhí eni̱la nindxu̱u̱ xóo mbá xtájtsí dí gíʼdoo tsúwáʼ,
xóo mbá xtájtsí mitsídánʼ dí na̱jkha̱ níjní ga̱jma̱a̱ itháán mangajxi̱i̱.
Mbá nacha̱ ga̱jma̱a̱ nda̱a̱ tsu̱ma̱ gájngudiri̱ga̱a̱.
14 Mawiʼtáa xóo mbá rayaʼ mba̱a̱ dí naʼni xa̱bu̱ bi̱ naʼni daan,
majmigu̱u̱ dí asndu nimbá xuíʼtóo
ni xájmaa mu muri̱ya̱ʼ ga̱jma̱a̱ chámbuʼ
ni má muri̱ya̱ʼ ga̱jma̱a̱ iyaʼ náa najnumaʼan”.*
15 Numuu dí rígi̱ nindxu̱u̱ dí naʼthí Tátá Jeobá bi̱ itháán mba̱a̱, bi̱ Kaʼwii náa Israel:
“Á mu natangáanʼla náa ikhúún ga̱jma̱a̱ naʼngo̱o̱ a̱jkia̱la nugua̱ʼthu̱nʼ, makáwáanʼla,
muguaʼdáá tsiaki̱i̱ á mu tsénimiñúmíjnála ga̱jma̱a̱ nakumalaʼ kuyoʼ”.
Mú ikháanʼla na̱nguá nindala.
16 Ikháanʼla ni̱tha̱: “¡Na̱nguá! ¡Mu̱ga̱yúxu gajmiúxu wáyú!”.
Májánʼ, ikháanʼ magayála.
“¡Magayála gajmiála wáyú bi̱ nagáñún nacha̱!”.
Májánʼ má, xúʼko̱ nacha̱ gágáñún bi̱ muxkala.
17 Mil maguíʼiin náa inuu mbáwíí,
ikháanʼla magayála gúni̱ mbá witsiin
asndu índo̱ dí gáwanáa náa ikháanʼla mani̱ndxu̱u̱ xóo poste dí frígu náa inuu kúbá,
xóo mbá poste rí nindxu̱u̱ tsinaʼ dí mbuyáá dí frígu náa inuu bíjní.
18 Mú Jeobá naʼngo̱o̱ a̱jkiu̱u̱n nagi̱ʼthu̱u̱n mu masngájmala dí májáanʼ a̱jkiu̱u̱n,
ga̱jma̱a̱ matujxu̱u̱ mu masngájmala dí nagáwíinʼ a̱jkiu̱u̱n kaʼyala.
Numuu dí Jeobá nindxu̱u̱ mbáa Dios bi̱ naʼni dí májánʼ.
Gagi kúwá mbá xúgíinʼ bi̱ ra̱ʼkhá tháán eguáʼthi̱i̱n ikhaa.
19 Índo̱ xuajin gáxtáa náa Sion, náa Jerusalén, ikháán ni xátambi̱ya̱ʼ. Índo̱ gátanda̱ʼa̱ dí mixtambáyáaʼ, ikhaa masngájmaaʼ dí májáanʼ a̱jkiu̱u̱n, mariʼñaaʼ índo̱ gáʼdxawaanʼ. 20 Maski ajndu Jeobá makuʼma gamiéjunʼ náa ikháán rí nindxu̱u̱ xóo ganitsu ga̱jma̱a̱ dí matamíniiʼ rí nindxu̱u̱ xóo iyaʼ, ikhaa bi̱ Najmañuu Naʼsngáa, ni xárkaʼwuminaʼ. Ma̱ta̱ya̱a̱ ga̱jma̱a̱ idaaʼ bi̱ Najmañuu Naʼsngáa. 21 Á mu dí nagájnuri̱ya̱a̱ʼ náa ñawún májáanʼ o náa ñawún xti̱ya̱a̱ʼ, matadxawíín ajngáa rígi̱ náa kidxaaʼ: “Rígi̱ nindxu̱u̱ kamba̱a̱. Ayuʼ ikhí”.
22 Matani̱ gachíí plata dí kagui̱i̱n xándiáaʼ bi̱ nigumawíin, ma̱ngaa oro dí kagu̱u̱ xtiʼkhuu dí niguma ga̱jma̱a̱ ajua̱nʼ.* Mataxidíin xóo índo̱ natada̱ʼ xtíin dí najmuu a̱ʼgu̱ índo̱ nagajtaa eʼdiuu ga̱jma̱a̱ marathu̱u̱n xándiáaʼ “¡Aʼguala kaníí!”. 23 Dios maʼni dí maxnúu ruʼwa náa mbaaʼ dí nitadu mu makráʼáan tsígáʼ, ganitsu dí gájma̱a̱ náa mbaaʼ dí nitadu mani̱ndxu̱u̱ mba̱a̱ ga̱jma̱a̱ miʼtsí.* Mbiʼi rúʼko̱ xediaaʼ makuiʼtsu náa mbaaʼ dí ma̱ja̱nʼ. 24 Xedi̱ ga̱jma̱a̱ búrru bi̱ nuñejunʼ náa mbaaʼ mu̱phu̱ rajxa̱ dí kanda̱wo̱o̱ʼ xkáʼ dí nigájnáa* náskoo. 25 Mbiʼi dí maguma gámbíin, índo̱ gájngudiri̱ga̱ torre, marigá iyaʼ náa xúgíʼ kúbá ga̱jma̱a̱ náa mbá xúgíʼ bíjní mitsídánʼ. 26 Mbiʼi dí Jeobá gáʼni thanuu náa nigawúúnʼ* xa̱bu̱ xuajñuu ga̱jma̱a̱ maʼni mandáa náa dí ikhaa má niʼni gawúúnʼ índo̱ nixnún, agiuuʼ gu̱nʼ dijndii mambiʼii xóo a̱jkha̱ʼ ga̱jma̱a̱ agiuuʼ a̱jkha̱ʼ mambiʼi mbá juwan nuthu itháan, xóo aguʼ dí nambiʼi náa mbá juwan mbiʼi.
27 ¡Atayáá! Mbiʼyuu Jeobá na̱ʼkha̱ ragi̱ʼi̱ mitsínguánʼ,
asndu nakha dí nakásngañu̱u̱ʼ, ma̱ngaa kúgoo ga̱jma̱a̱ du̱u̱n skuniʼ.
Náa rawuunʼ rígá dí nakásngañu̱u̱ʼ
ga̱jma̱a̱ raju̱u̱n nindxu̱u̱ xóo aguʼ mba̱a̱.
28 Tsiaki̱i̱* ndrígóo Dios nindxu̱u̱ xóo mbá yambo̱o̱ dí nakráʼáan asndu náa aphuu,
maʼbatiguíin xa̱bu̱ xuajin ga̱jma̱a̱ mbá criba dí naʼni gámbáa,*
xa̱bu̱ xuajin matra̱ʼa̱ freno rawúúnʼ mu maguwíin náa kamba̱a̱.
29 Ajmúú dí nuni̱la mani̱ndxu̱u̱ xóo ajmúú dí nuni̱ mbruʼun
índo̱ mbáa naʼnirataminaʼ* mu maʼga ndxa̱a̱,
ra̱ʼkhá tháán gáʼdxuu a̱jkiu̱u̱n
xóo eʼni mbáa bi̱ kayá* flauta ejkha̱
náa kúbá ndrígóo Jeobá, náa Tsíñu ndrígóo Israel.
30 Jeobá maʼni dí mawán aʼwóo dí mitsaanʼ*
ga̱jma̱a̱ maʼni rí makujmaa ñawúunʼ dí nakásngañu̱u̱ʼ,
náa riʼyu̱u̱ aguʼ dí mba̱a̱,
náa ruʼwambiʼ, índo̱ naguájthan a̱jkhu̱u̱n* ga̱jma̱a̱ náa eʼtsí.
31 Ga̱jma̱a̱ numuu aʼwóo Jeobá, Asiria mamiñúu,
maxnúu ga̱jma̱a̱ xkuíyá.
32 Mámbá índo̱ Jeobá gáxnúu Asiria
ga̱jma̱a̱ xkuíyá dí maʼni mamínuuʼ
mawán aʼwóo panderetas ga̱jma̱a̱ arpas,
índo̱ xtáa rakujxi̱ ñawúunʼ mu maxnún ga̱jma̱a̱ náa nuxmijná.
33 Numuu dí rígá má xawii mbaaʼ* náa maguma gámbáa,
ma̱ngaa rígá má xawii náa makhañúu rey.
Niʼni itháan mi̱jnu̱ʼ ga̱jma̱a̱ itháan ma̱ja̱nʼ náa magíʼ aguʼ,
rígá aguʼ ga̱jma̱a̱ ra̱ʼkhá tháán mbaʼa ixi̱.