Isaías
65 “Niniʼñáminaʼ rí mbuñúunʼ bi̱ tsérajxi ga̱jma̱á numuʼ,
niniʼñáminaʼ rí muxkamún bi̱ tséñúuʼ
ga̱jma̱a̱ xa̱bu̱ xuajin bi̱ tségriga̱a̱ mbiʼyuʼ, ni̱thu̱u̱n: ‹¡Gi̱i̱ xtáá, gi̱i̱ xtáá!›.
2 Xúgíʼ mbiʼi nikruíya̱ʼ ñawúnʼ náa xuajin rí kúwá xa̱bu̱ bi̱ gújkhúʼ a̱jkiu̱ún
ga̱jma̱a̱ bi̱ najngrui̱gu̱u̱n náa kamba̱a̱ dí ra̱májánʼ,
bi̱ nu̱ni̱ rí nandún ikhiin.
3 Mbá xuajin rí asndu tséti̱yu̱u̱ʼ rí naʼni gawúnʼ má xúʼko̱,
naxnájxi̱ tsigijñaʼ náa jardín* ga̱jma̱a̱ narkúní tsigijñaʼ náa tsu̱du̱u̱ ladrillos.
4 Tri̱gi̱i̱n náa majñuuʼ iñá wajinʼ
ga̱jma̱a̱ naguanún náa rí ngo̱ʼo̱o̱* rí mbruʼun,
naʼphu̱ xuyuuʼ a̱ga ga̱jma̱a̱ náa xúbu̱ún kajni̱ʼ yaʼdiun rí tsaga.
5 Nuthi: ‹Aguanáaʼ má náa xtiajún, ga̱jma̱a̱ xádxáʼ kanuu itháán,
numuu rí ikhúún itháán kaʼwún ki xóo ikháán›.*
Ikhiin nu̱ni̱ rí makiʼnún má xúʼko̱, xó mbá aguʼ rí nakha xúgíʼ mbiʼi.
6 ¡Guya̱a̱la! Kiʼniraʼmáʼ náa ikhúún, xáguanuʼ wíí,
ma̱ni̱ numi̱ín rí kaʼñúún muda̱a̱ʼ,
ma̱ni̱ numi̱ín kájxi̱* rí kaʼñúún muda̱a̱ʼ.
7 Ga̱jma̱a̱ numuu rí nakiéʼkala ma̱ngaa rí nikiéʼkhúún wajin xiʼñála”, eʼthí Jeobá.
“Ga̱jma̱a̱ numuu dí nurkuní tsigijñaʼ náa kúbá ga̱jma̱a̱ dí ni̱ni̱ gawúnʼla náa bíjní,
ginii ma̱ni̱ numala kájxi̱* xó má kaʼyoo muda̱a̱la”.
8 Rígi̱ dí naʼthí Jeobá:
“Ikháá má xóo índo̱ mbáa ndaʼyoo mbá juáyúu uva náa ma̱ndoo maríya̱ʼ vino nuxi̱ʼ
ga̱jma̱a̱ naʼthí, ‹Xátaxidíí numuu rí magajnúu mbá rí májánʼ* ikhí›,
xúʼko̱ gáni̱ ikhúún gajmíʼ xa̱bi̱ʼ, xáni̱ gámbíin xúgíinʼ.
9 Ma̱ni̱ rí ma̱ʼkha̱ mbáa náa Jacob
ga̱jma̱a̱ ma̱ni̱ rí ma̱ʼkha̱ mbáa náa Judá bi̱ magruigúu kúbá ndrígóʼ,
ga̱jma̱a̱ bi̱ niraʼwi̱i̱n mudrigúu dí rígá náa ku̱ba̱ʼ rúʼko̱,
ga̱jma̱a̱ xa̱bi̱ʼ makuwá ikhí.
10 Rígi̱ dí muguánú mbuyáá xa̱bu̱ xuajñunʼ bi̱ nduñúunʼ,
Sarón maʼga̱nú mani̱ndxu̱u̱ mbá mbaaʼ náa rígá rajxa̱ dí mu̱phu̱ mugu̱
ga̱jma̱a̱ mata* Acor mani̱ndxu̱u̱ náa mbuya̱a̱ jxu̱ún xedi̱.
11 Mú ikháanʼ nindxa̱la bi̱ nuniʼñúʼ ikhúún bi̱ nindxu̱ʼ Jeobá,
bi̱ nambumala kuya̱a̱ kúbá ndrígóʼ rí kaʼwu,
ikháanʼla bi̱ nutsruiguii náa mesa dios bi̱ naʼni marigá Májánʼ Suerte*
ga̱jma̱a̱ bi̱ nuxíñánʼ náa copa vino rí kanda̱wo̱o̱ʼ mu maga̱a̱n dios bi̱ naʼthí rí Maguáʼníí.
12 Ikha jngóo niraʼwi̱i̱ dí muradiáanʼ ga̱jma̱a̱ espada
ga̱jma̱a̱ mbá xúgiáanʼ ikháanʼ musmbatíga̱la mu muradiáanʼ,
numuu dí ikhúún nindxa̱ʼwa̱la mú ikháanʼ túriʼña,
nitala, mú ikháanʼ túdxawíín,
ni̱nila má xúʼko̱ dí ra̱májánʼ náa iduʼ ga̱jma̱a̱ niraʼwi̱i̱ mu̱ni̱ rí ikhúún tsénigu̱ʼ”.
13 Ikha jngóo rígi̱ dí naʼthí Tátá Jeobá bi̱ itháán mba̱a̱:
“¡Guya̱a̱la! Xa̱bi̱ʼ muphiʼtsu, mú ikháanʼ maxkidxala.
¡Gu̱ya̱a̱la! Xa̱bi̱ʼ muwa̱a̱n, mú ikháanʼ makándawala.
¡Gu̱ya̱a̱la! Xa̱bi̱ʼ maʼdxúún, mú ikháanʼ matiyala.
14 ¡Gu̱ya̱a̱la! Xa̱bi̱ʼ mundxa̱ʼwa̱ gagi numuu rí tsímáá e̱ʼni̱ a̱jkiu̱ún,
mú ikháanʼ mundxa̱ʼwa̱ numuu rí na̱ʼkhu̱ a̱jkia̱la
ga̱jma̱a̱ mumbi̱ya̱ʼ numuu rí kuwáanʼ ngíná.
15 Ikháanʼ muniʼñááʼ mbiʼyala mu majmúún bi̱ niraʼwi̱i̱n mu mutasrígú ga̱jma̱a̱,
Tátá Jeobá bi̱ itháán mba̱a̱ magudiáanʼ mámbáa dí ikháanʼ,
mú xa̱bi̱i̱ maxnún imbo̱o̱ mbiʼñún,
16 numuu rí asndu tsáá bi̱ gáʼndoo maguma tsajkurámaaʼ náa tsu̱du̱u̱ ku̱ba̱ʼ,
maʼni tsajkurámaaʼ Dios bi̱ gajkhun,*
ga̱jma̱a̱ asndu tsáá bi̱ gáxná ajngóo náa tsu̱du̱u̱ ku̱ba̱ʼ,
maxná ajngóo náa Dios bi̱ gajkhun,
numuu rí xóo nimínuuʼ nákha ginii mambumuu, marigá ngu̱ʼwa̱á náa iduʼ.
17 ¡Gu̱ya̱a̱la! Ma̱ni̱* nuxi̱ʼ mekhu ga̱jma̱a̱ mbá nuxi̱ʼ ku̱ba̱ʼ,
ga̱jma̱a̱ xúgíʼ dí nirígá nákha ginii ni xármáʼáan a̱jkia̱la
ga̱jma̱a̱ ni xáʼni gawúunʼ a̱jkia̱la.
18 Ikha jngóo gaʼdxalá ga̱jma̱a̱ gakuwáánʼ gagi kámuu ga̱jma̱a̱ numuu rí ma̱ni̱.
Numuu rí, ¡gu̱ya̱a̱la!, rí gáni̱ náa Jerusalén maʼni rí maʼdxa̱lá
ma̱ngaa rí gáni̱ ga̱jma̱a̱ numún xa̱bu̱ bi̱ kúwá ikhí, maʼni rí makuwáanʼ gagi.
19 Maʼdxuʼ ga̱jma̱a̱ numuu Jerusalén, ma̱ngaa maʼdxuʼ ga̱jma̱a̱ numuu xuajñunʼ,
ni xáwáán itháán ikhí dí numbi̱ya̱ʼ ni má dí nundxa̱ʼwa̱ ga̱jma̱a̱ numuu rí numíniiʼ”.
20 “Ikhí nánguá makuwá ejín dxáñáʼ bi̱ makuwá káaʼ nguáthá mbiʼi,
ni má xáxtáa mbáa xa̱bu̱ nikhi̱i̱ bi̱ makhañúu káaʼ tikhu xa̱bu̱ú.
Numuu rí bi̱ gákháñuu índo̱ gagiʼdoo 100 tsiguʼ majuiʼyáá rí nindxu̱u̱ káaʼ mbáa dxámá.
Ga̱jma̱a̱ bi̱ naʼni aʼkhá majuiʼtásríguíi tséʼniuu á mu gíʼdoo 100 tsiguuʼ.*
21 Munila guʼwá ga̱jma̱a̱ makuwáanʼ ikhí,
mudula ixi̱ uva ga̱jma̱a̱ muphula xndúu.
22 Xúnila guʼwá mu eʼwíinʼ makuwá,
ni má xúphu̱ eʼwíinʼ rí gúdu̱u̱,
numuu rí xóo mba̱yu̱u̱ʼ rígá mbá ixi̱, xúʼko̱ mba̱yu̱u̱ʼ gakuwá xa̱bu̱ xuajñunʼ
ga̱jma̱a̱ bi̱ ikhúún niraʼwi̱i̱n makuwá gagi wéñuuʼ ga̱jma̱a̱ numuu ñajunʼ ndrígu̱ún.
23 Xúñajunʼ ndíí, ni má xáguwáʼ kudiin e̱ji̱n mu mumíniiʼ náa numbaaʼ,
ikhiin gajmiún e̱jñu̱ún mani̱ndxu̱ún bi̱ Jeobá niʼni tsajkurámiinʼ.
24 Nákha ikhiin xóó tséndxa̱ʼwo̱ʼ, ikhúún mariʼñúún,
nákha ikhiin xóó kúwá ruthi, ikhúún madxawúún.
25 Lobo* ga̱jma̱a̱ mugu̱ muphiʼtsu mbóó,
león mikhu ra̱jxa̱ xó má e̱ʼkhu̱ mbáa xedi̱,
ga̱jma̱a̱ a̱bu̱nʼ mi̱khu̱ yujndaʼ.
Xúni̱ gachíí nimbá, ni má xúni̱ gámbáa nimbá náa mbá xúgíʼ kúbá ndrígóʼ rí kaʼwu”, eʼthí Jeobá.