Ezequiel

34 Nigruígú mbu̱júu̱ ajngóo Jeobá. Niʼthúnʼ: 2 “A̱ʼdióo xa̱biya̱, aratáríya̱ʼ dí maguáʼníí baxtúu bi̱ kúwá náa Israel. Aratáríya̱ʼ ga̱jma̱a̱ arathún baxtúu: ‹Rígi̱ dí naʼthí Tátá Jeobá bi̱ itháán mba̱a̱: “¡Ngíníi lá baxtúu bi̱ kúwá náa Israel, bi̱ nikúwá ruxniʼtsumijná ikhi̱ín! Lá raʼkháa mugu̱ gíʼmaa dí muxniʼtsúún baxtúu ráʼ. 3 Ikháanʼ naphula xtangún xujkhúʼ, nuguʼwánla mugu̱ún ga̱jma̱a̱ nuradíinla xujkhúʼ bi̱ itháán mbaʼwi̱i̱n, mú tséxniʼtsúúnla mugu̱. 4 Túxnu̱u̱nla tsiaki̱i̱ mugu̱ bi̱ wabiinʼ, ni má túni thanún bi̱ naʼniún nandii, ni má túmbríʼiin xtíin bi̱ nigawúúnʼ, ni má táguwa̱a̱ʼla kudiin bi̱ nigájnuriñu̱u̱nʼ, ni má túʼñíínʼ bi̱ nindáti̱gi̱i̱n, ikháanʼla ni̱ni̱ ngíníi. 5 Ikha jngóo nijuadríʼiin numuu rí ndawa̱a̱ baxtúu ndrígu̱ún, nigadríʼiin ga̱jma̱a̱ xúgíinʼ xujkhú xáná niʼphu̱u̱n. 6 Mugiu̱ʼ mbaʼ jngruámúnʼ náa kúbá ga̱jma̱a̱ náa xúgíʼ bíjní rí itháan mitsídánʼ, mugiu̱ʼ nigadríʼiin náa mbá xúgíʼ tsu̱du̱u̱ ku̱ba̱ʼ, ndawa̱a̱ tsáa mbañíinʼ ni má ndawa̱a̱ tsáa magíminaʼ maxkami̱ín.

7 Ikha jngóo ikháanʼla baxtúu, gudxawíín dí naʼthí Jeobá: 8 ‹“Xó má ikhúún gajkhun xtáá, eʼthí Tátá Jeobá bi̱ itháán mba̱a̱, ga̱jma̱a̱ numuu rí ndawa̱a̱ baxtúu ndrígu̱ún mugiu̱ʼ, niguánú ninindxu̱ún dí mu̱phu̱ xúgíinʼ xujkhú xáná, ga̱jma̱a̱ baxtúu ndrígóʼ túñíínʼ mugiu̱ʼ, nixniʼtsumijná ikhi̱ín ga̱jma̱a̱ túxniʼtsúún mugiu̱ʼ”›, 9 ga̱jma̱a̱ numuu mbá xúgíʼ rúʼko̱, ikháanʼla baxtúu, gudxawíín dí naʼthí Jeobá. 10 Rígi̱ dí naʼthí Tátá Jeobá bi̱ itháán mba̱a̱: ‹Nakiʼnún ka̱ñu̱u̱n baxtúu, mandi̱ʼi̱ín cuenta ga̱jma̱a̱ numún mugiu̱ʼ, ni xániʼñúuʼ dí muxniʼtsúún mugiu̱ʼ ga̱jma̱a̱ baxtúu ni xúxniʼtsumijná ikhi̱ín. Ma̱ni̱ káwíin mugiu̱ʼ náa rawúúnʼ ga̱jma̱a̱ ni xátangi̱ín mu̱phu̱u̱n›”.

11 Numuu dí rígi̱ dí naʼthí Tátá Jeobá bi̱ itháán mba̱a̱: “Gi̱i̱ xtáá, mínu̱u̱ʼ gáʼñíínʼ mugiu̱ʼ ga̱jma̱a̱ mañewu̱u̱n. 12 Mañewu̱u̱n mugiu̱ʼ xóo mbáa baxtúu bi̱ nixkami̱ín mugiu̱u̱ bi̱ nigadríʼiin ga̱jma̱a̱ naxníʼtsúún. Maʼkháaʼ kagui̱i̱n* náa xúgíʼ dí nigadríʼiin mbiʼi dí kambájthu̱u̱n ga̱jma̱a̱ mikína mbiʼ. 13 Magúwíin náa xuajin ga̱jma̱a̱ magímbíin, maʼkháaʼ kagui̱i̱n náa ku̱bu̱únʼ ga̱jma̱a̱ maxníʼtsúún náa kúbá dí rígá náa Israel, náa mijngii rawuunʼ mañu ga̱jma̱a̱ náa mbá xúgíʼ mbaaʼ náa kúwá xa̱bu̱ xuajin. 14 Maxnu̱u̱n mu̱phu̱ ra̱jxa̱ dí itháan májánʼ ga̱jma̱a̱ náa kúbá mitsídánʼ dí rígá náa Israel marigá ku̱ba̱ʼ náa mupi̱ʼtsu. Mubúúnʼ ikhí, náa ra̱jxa̱ dí itháán májánʼ, mu̱phu̱ ra̱jxa̱ dí itháán májánʼ dí rígá náa Israel”.

15 “Ikhúún mínu̱u̱ʼ gáxníʼtsúún mugiu̱ʼ, ga̱jma̱a̱ ikhúún mínu̱u̱ʼ gáni̱ rí mubúúnʼ, eʼthí Tátá Jeobá bi̱ itháán mba̱a̱. 16 Mbaʼin bi̱ nindáti̱gi̱i̱n, bi̱ nigadríʼiin maʼkháaʼ kagui̱i̱n, bi̱ nigawúúnʼ mambríʼiin xtíin ga̱jma̱a̱ bi̱ wabiinʼ maxnu̱u̱n tsiaki̱i̱. Mú bi̱ mba̱ʼwi̱i̱n ga̱jma̱a̱ bi̱ gújkuíinʼ ma̱ni̱ gámbíin. Manimbánuu numún ga̱jma̱a̱ ma̱ni̱ rí mumíniiʼ”.

17 Mú ikháanʼla mugiu̱ʼ, rígi̱ dí naʼthí Tátá Jeobá bi̱ itháán mba̱a̱: “Mámbáa mugu̱ gánimbánuu numuu, xúʼko̱ má mugu̱ e̱jmba̱a̱ ga̱jma̱a̱ chivátú.* 18 Lá tségiʼmala rí mu̱phu i̱ndó ra̱jxa̱ dí májánʼ dí ma̱ngaa nuxujmbíi ra̱jxa̱ dí naguanúu ráʼ. Ga̱jma̱a̱ índo̱ naguámbála nawanla iyaʼ kaʼwu, lá mbaʼyóoʼ xóó dí mu̱ni̱ jnguáʼáán rajkuála ráʼ. 19 Ga̱jma̱a̱ dí xúgi̱, mugiu̱ʼ mbaʼyóoʼ mu̱phu̱ ra̱jxa̱ dí ikháanʼ nixujmbíi ga̱jma̱a̱ mu̱wa̱a̱n iyaʼ dí ikháanʼla ni̱ni̱ jnguáʼáán rajkuála ráʼ.”

20 Ikha jngóo, rígi̱ dí naʼthúún Tátá Jeobá bi̱ itháán mba̱a̱: “Gi̱i̱ xtáá, ikhúún mínu̱u̱ʼ gánimbánuu numún mugu̱ bi̱ mbaʼwi̱i̱n ga̱jma̱a̱ mugu̱ bi̱ i̱ndó i̱tsu̱ún, 21 numuu dí ikháanʼla nurmajngui̱i̱nʼ mugu̱ ga̱jma̱a̱ níjñála, ma̱ngaa ga̱jma̱a̱ xpajpala, ga̱jma̱a̱ mbá xúgíinʼ mugu̱ bi̱ naʼniún nandii nurmajngui̱i̱nʼ ga̱jma̱a̱ chi̱jya̱la rí asndu nagadríʼiin mitsínguánʼ. 22 Ma̱ni̱ káwíin mugiu̱ʼ, ni xúphúun. Mámbáa mugu̱ gánimbánuu numuu. 23 Maʼgíiʼ náa ikhiin mbáwíí baxtúu, xa̱bi̱ʼ David ga̱jma̱a̱ ikhaa maxníʼtsúún. Ikhaa maxníʼtsúún ga̱jma̱a̱ mani̱ndxu̱u̱ baxtúu ndrígu̱ún. 24 Ga̱jma̱a̱ ikhúún, Jeobá, mani̱ndxu̱ʼ Dios ndrígu̱ún, ga̱jma̱a̱ xa̱bi̱ʼ David mani̱ndxu̱u̱ mbáa bi̱ mbayá edxu̱u̱ náa ikhiin. Ikhúún, Jeobá, ni̱tha̱ rígi̱.

25 Mambanúʼ gajmíʼ dí makuwá tsímáá ga̱jma̱a̱ ma̱ni̱ gámbíin náa ikhiin xujkhú xáná bi̱ xkawi̱i̱nʼ, mu mugiu̱ʼ nda̱a̱ gamíi gákuwá náa ku̱ba̱ʼ mijxooʼ* ga̱jma̱a̱ munuʼ náa xaxi̱. 26 Ma̱ni̱ dí ikhiin ga̱jma̱a̱ bi̱ kúwá náa mbájndi bíjní ndrígóʼ mani̱ndxu̱ún mbá dí maʼni tsajkurámiinʼ eʼwíinʼ ga̱jma̱a̱ ma̱ni̱ dí ruʼwa maxnáa mbiʼi dí gíʼmaa maxnúu. Ra̱ʼkhá tháán gáguma tsajkurámiinʼ dí mani̱ndxu̱u̱ asndu xóo ruʼwa dí naxnúu. 27 Ixi̱ dí rígá xanáá maxná xndúu ga̱jma̱a̱ náa ku̱ba̱ʼ ma̱jma̱a̱ ganitsu, ga̱jma̱a̱ ikhí nda̱a̱ gamíi gákuwá náa xuajin. Ga̱jma̱a̱ maguánú mbuyáá dí ikhúún nindxu̱ʼ Jeobá índo̱ gáxpiʼgáʼ yugo ndrígu̱ún ga̱jma̱a̱ índo̱ gáni̱ káwíin náa bi̱ nini̱ rí mani̱ndxu̱ún ñumbáá. 28 Ni xúphúun xa̱bu̱ xuajin ni má xujkhú xáná bi̱ kúwíin náa tsu̱du̱u̱ ku̱ba̱ʼ, nda̱a̱ gamíi gákuwá ga̱jma̱a̱ nimbáa ndawa̱a̱ tsáa maʼni míñúún.

29 Maxnu̱u̱n mbá ku̱ba̱ʼ dí majmaʼnuuʼ ga̱jma̱a̱ numuu rí najma̱a̱, ni xákháñún gáʼni ewiʼ náa xuajin, ni má xa̱bu̱ xuajin ni xúni̱ majti̱i̱nʼ itháan. 30 ‹Ikhú ikhiin maguánú mbuyáá dí ikhúún, nindxu̱ʼ Jeobá Dios ndrígu̱ún, xtáá gajmíʼ, ga̱jma̱a̱ bi̱ kúwá náa goʼwóo Israel, nindxu̱ún xa̱bu̱ xuajñunʼ›, eʼthí Tátá Jeobá bi̱ itháán mba̱a̱”›.

31 ‹Ikháanʼla mugiu̱ʼ, mugu̱ bi̱ ikhúún nañewu̱u̱n, xa̱bu̱ numbaáʼ nindxa̱la ga̱jma̱a̱ ikhúún nindxu̱ʼ Dios ndrígala›, eʼthí Tátá Jeobá bi̱ itháán mba̱a̱”.