Rí na̱jkha̱ inún Romanos

6 Lá xúgi̱ ma̱ndoo muʼthá rí gíʼmáanʼ mu̱ʼni̱ má xúʼko̱ aʼkhá mu Dios masngájmulú má xúʼko̱ rí májánʼ wéñuuʼ a̱jkiu̱u̱n* ráʼ. 2 ¡Na̱nguá! Numuu rí ikháanʼ nikháñulú náa majñu̱u̱ʼ aʼkhá, xú káʼnii gándoo gákuwáánʼ má xúʼko̱ náa aʼkhá rá. 3 O lá tséya̱a̱la rí xúgiáánʼ bi̱ nijngúlú iyááʼ ga̱jma̱a̱ rí xúgi̱ kuwáánʼlú mbóó jnduʼ gajmiúlú Cristo Jesús, ma̱ngaa nijngúlú iyááʼ mu makuwáánʼ mbóó jnduʼ gajmiúlú náa nikháñuu xáʼ. 4 Nijuiʼdiáan’* gajmiúlú ikhaa numuu rí nijngúlú iyááʼ mu makuwáanʼ mbóó gajmiúlú náa nikháñuu, xó má Cristo nitujxi̱i̱ náa majñúnʼ wajinʼ ga̱jma̱a̱ tsiakii ndrígóo Anu̱u̱, xúʼko̱ má mangáanʼ, mú i̱mba̱ núthu xóo gákuwáánʼ. 5 Á mu kuwáánʼ mbóó gajmiúlú náa nikháñuu, xúʼko̱ má kuwáánʼ mbóó gajmiúlú náa nigabi̱i̱.* 6 Numuu rí ikháánʼlú ndu’yáá dí xóo kaʼniáanʼlú nákha ginii nijuiʼdujmaa ga̱jma̱a̱ Jesús, mu xúʼko̱ tsiakii ndrígóo aʼkhá dí rígá náa xuyulúʼ mandáti̱ga̱a̱, xúʼko̱ muniʼñááʼ rani̱ndxu̱lú ñumbáá ndrígóo aʼkhá. 7 Numuu rí índo̱ mbáa na̱jkha̱nú nakháñuu ikhú najngudi̱i̱ aʼkhúun.

8 Ma̱ngaa á mu nikháñulú gajmiúlú Cristo, nuʼnimbulú ma̱ngaa rí makuwáánʼ gajmiúlú ikhaa. 9 Numuu rí nduʼyáálú dí Cristo nitujxi̱i̱* náa majñúnʼ wajinʼ ní xátanga̱a̱ makhañúu; rí nakháñulú nánguá eʼtáñajunʼ náa ikhaa. 10 Numuu rí índo̱ nikháñuu, nikháñuu mbóó miʼtsú asndu kámuu mbiʼi mu maʼnijngudi̱i̱ aʼkhá, mú rí xúgi̱ xtáa mu maʼni rí nandoo Dios. 11 Xúʼko̱ má mangáanʼla, gu̱ya̱a̱la asndu xóo rí nikháñala náa majñu̱u̱ʼ aʼkhá, mú kuwáanʼla ga̱jma̱a̱ numuu Dios ma̱ngaa numuu Cristo Jesús.

12 Ikha jngóo, xúniʼñááʼla dí aʼkhá maxtáa raʼtáñajunʼ má xúʼko̱ náa xuyala rí nakháñuu dí naʼni muni̱ dí nagua̱ʼa̱ xuyala. 13 Ni má xúxnajxí xuyala náa aʼkhá xóo mbá rí majmala mu̱ni̱ dí ra̱májánʼ. Guxnajximíjnála náa Dios xóo bi̱ nikháñún nákha ginii mu rí xúgi̱ nigabiáanʼ* ga̱jma̱a̱ guxnajxí xuyala náa Dios xóo mbá rí majmala mu mu̱ni̱ rí májánʼ. 14 Ragíʼmaa maʼtáñajuanla aʼkhá, numuu rí ikháanʼ na̱nguá kuwáanʼ náa majñu̱u̱ʼ xtángoo, kuwáanʼ ga̱jma̱a̱ numuu rí májánʼ wéñuuʼ a̱jkiu̱u̱n* Dios maski ajndu rakáʼyala.

15 Lá ga̱jma̱a̱ numuu rí kuwáánʼ náa majñu̱u̱ʼ rí májánʼ wéñuuʼ a̱jkiu̱u̱n Dios* raʼkháa náa majñu̱u̱ʼ xtángoo, ikha jngóo ma̱ndoo muxuʼdámíjná aʼkhá ráʼ. ¡Na̱nguá! 16 Lá na̱nguá e̱ya̱a̱ rí á mu nuxnaxímíjná mani̱ndxa̱la ñumbáá, nani̱ndxa̱la ñumbáá ndrígóo mbáa bi̱ nunimbala kuya̱a̱, tséʼniuu má á mu náa aʼkhá rí na̱jkha̱ kaguáanʼ makhañála, o náa rí munimbala rí maʼga kaguáanʼ mani̱ndxa̱la xa̱bu̱ jmbii rá’. 17 Mú nuxnáalú núma̱aʼ Dios numuu rí maski ajndu ikháanʼ nini̱ndxa̱la ñumbáá ndrígóo aʼkhá, mú ninimbala ga̱jma̱a̱ xúgíʼ a̱jkia̱la xó má kiʼsngáa dí nindrígúla. 18 Xúʼko̱, numuu rí nikáwáanʼla náa aʼkhá ga̱jma̱a̱ nijkhuanú nini̱ndxa̱la ñumbáá ndrígóo rí jmbu. 19 Numuu rí nindxa̱la xa̱bu̱ aʼkhá, ikha jngóo na̱tala ajngáa rí mikrua̱ʼa̱la. Xó má nixnajxí xuyala mu mani̱ndxu̱u̱ ñumbáá náa rí mitsaga ga̱jma̱a̱ rí munila dí ra̱májánʼ, xúʼko̱ má xúgi̱ guxnajxí xuyala mu mani̱ndxu̱u̱ ñumbáá ndrígóo rí jmbu mu munila rí mikaʼwu. 20 Numuu rí nákha nindxa̱la ñumbáá ndrígóo aʼkhá na̱nguá má eyála mu̱ni̱ rí jmbu.

21 Mú ndiéjunʼ ejma̱a̱ dí nuni̱la nákha ikhú dí xúgi̱ naʼni mati̱ya̱la rá. Rí na̱jma̱a̱ nindxu̱u̱ rí maʼga kaguáanʼ makhañála. 22 Mú dí xúgi̱ ikháanʼla nikáwáanʼla náa majñu̱u̱ʼ aʼkhá ga̱jma̱a̱ nini̱ndxa̱la ñumbáá ndrígóo Dios, ga̱jma̱a̱ rígi̱ naʼni rí mani̱ndxa̱la mikaʼwáanʼ, ma̱ngaa rígi̱ maʼni rí makuwáanʼla kámuu mbiʼi. 23 Rí naguma numa̱a̱ ga̱jma̱a̱ aʼkhá nindxu̱u̱ rí nakháñulú, mú, rí naxnúlú Dios nindxu̱u̱ rí makuwáanʼ kámuu mbiʼi ga̱jma̱a̱ numuu Cristo Jesús, bi̱ ni̱ndxu̱u̱ Tátá ndrígúlú.