Ezequiel

1 Nákha tsiguʼ 30, dí maʼni witsu mbiʼi náa a̱jkhu̱ igu̱nʼ, índo̱ ikhúún xtáá gajmíʼ xa̱bu̱ xuajin bi̱ ni̱jkha̱ kiʼdiin, índo̱ xtáá náa rawuunʼ mañu Kebar, nimbaʼtoo mekhu ga̱jma̱a̱ ikhú nigíʼdu̱u̱ ndi̱yo̱o̱ rí nisngájmuʼ* Dios. 2 Índo̱ naʼni witsu mbiʼi dí gu̱nʼ rúʼko̱, índo̱ naʼni witsu tsiguʼ dí ni̱jkha̱ kiʼyáa rey Joaquín, 3 Ezequiel* a̱ʼdióo ndxajkun Buzí nigruigú ajngóo Jeobá náa mijngii rawuunʼ mañu Kebar, náa ku̱bu̱únʼ caldeos. Ikhí tsiaki̱i̱ ndrígóo Jeobá* nirígá náa ikhaa.

4 Índo̱ xtáá ra̱yejxi̱, ndi̱yo̱o̱ mbá giñámbiʼ rí na̱ʼkha̱ xígií náa norte, ga̱jma̱a̱ mbá du̱u̱n skuniʼ ma̱ngaa mbá aguʼ dí gíʼdoo riʼyu̱u̱* ga̱jma̱a̱ mbá aguʼ dí nambiʼi gakhi̱i̱ náa mbájndi. Náa tapo̱o̱ aguʼ rígá mbá dí xóo ajua̱nʼ xngiyaʼ* kaʼnii. 5 Ga̱jma̱a̱ náa awúu̱n nakujmaa mbá rí xóo náa nakujmiin a̱jkhui̱i̱n ángeles,* xúgíinʼ ikhiin nakujmiin xóo mbáa xa̱bu̱ numbaaʼ. 6 Mámbáa gíʼdoo a̱jkhu̱ inuu ga̱jma̱a̱ a̱jkhu̱ xpíjpiúu. 7 Jmbu rajkúún ga̱jma̱a̱ xóo tsójoo a̱ʼdá xédí kaʼnii dí rajkú paskún. Rajkúún nambiʼi xóo cobre dí xngiyaʼ. 8 Náa mbá nájkhu̱ níjñún guáʼdáá ñawúúnʼ xóo ñawúunʼ xa̱bu̱ juáʼwíi náa agoo xpíjpiúún, ga̱jma̱a̱ mbá nájkui̱i̱n guáʼdáá inún ga̱jma̱a̱ guáʼdáá xpíjpiúún. 9 Nawa̱a̱ xpíjpiúún. Índo̱ nagún tséngutuíʼíin, mámbáa na̱jkha̱ mbájmbu.

10 Xígi̱ kaʼnii inún: Mámbáa bi̱ mbá a̱jkhui̱i̱n gíʼdoo inuu xóo inuu mbáa xa̱biya̱ ga̱jma̱a̱ xóo inuu león náa ñawún mújúunʼ, ga̱jma̱a̱ mámbáa gíʼdoo inuu xóo inuu xedi̱ náa ñawún xti̱yu̱u̱ʼ. Mámbáa bi̱ mbá a̱jkhui̱i̱n gíʼdoo inuu xóo inuu bi̱yú. 11 Xígi̱ kaʼnii inún. Xpíjpiúún juáʼwíi rijma̱a̱. Mámbáa rí ikhiin gíʼdoo a̱jma̱ xpíjpiúu rí nawa̱a̱ ga̱jma̱a̱ a̱jma̱ dí nuruguáá ga̱jma̱a̱ xuñúúnʼ.

12 Mámbáa na̱jkha̱ mbájmbu, náa má tsiaki̱i̱ ndrígóo Dios naʼniún rí magún. Índo̱ nagún tséngutuíʼíin. 13 Ángeles nakujmiin xóo chámbuʼ rí mijkha, ga̱jma̱a̱ dí xóo ixi̱ náa grígu aguʼ naʼbajngaa náa majñu̱únʼ ángeles, nangujuíi dí naxpíbínʼ náa aguʼ. 14 Xóo naxpíbínʼ kujmiin ángeles índo̱ nagún ga̱jma̱a̱ índo̱ naguwáanʼ.

15 Índo̱ xtáá rayejxu̱u̱n ángeles, ndi̱yo̱o̱ dí mbayííʼ rígá mbá dí xóo llanta dí ajua̱nʼ kaʼnii náa mámbá níjniúu mámbáa ángel bi̱ a̱jkhu̱ inuu. 16 Llántóo ga̱jma̱a̱ dí xóo kaʼnii niguma nakujmaa rí nambiʼi xóo crisólito, mbrígúú mbá nájkhu̱. Dí xóo nakujmaa ga̱jma̱a̱ xóo niguma nakujmaa dí awúu̱n llanta rígi̱, gídáʼ i̱mba̱ llanta.* 17 Índo̱ nagún, ma̱ndoo magún asndu náá má rí mbá a̱jkhu̱ níjniúu ga̱jma̱a̱ tséngutuíʼíin índo̱ nagún. 18 Dí mitsídánʼ llántóo naʼni dí maguanáaʼ tsiánguá, mbá a̱jkhu̱ llanta tima iduu náa mbájndi. 19 Índo̱ ángeles nagún, llanta na̱jkha̱ xó má egún, índo̱ ángeles natujxu̱u̱n mbayííʼ, llanta ma̱ngaa nagi̱jxi̱. 20 Ikhiin nagún asndu náá má tsiaki̱i̱ ndrígóo Dios naʼniún rí magún, tséʼniuu má asndu náá ejkha̱ tsiaki̱i̱ ndrígóo Dios. Llanta nagi̱jxi̱ índo̱ ikhiin natujxu̱u̱n numuu dí tsiaki̱i̱ ndrígóo Dios dí rígá náa ángeles* rígá náa llanta ma̱ngaa. 21 Índo̱ ikhiin nagún, llanta ma̱ngaa na̱jkha̱, ga̱jma̱a̱ índo̱ ikhiin naguájun, llanta ma̱ngaa naguájun, llanta nagi̱jxi̱ índo̱ ikhiin natujxu̱u̱n, numuu dí tsiaki̱i̱ ndrígóo Dios dí rígá náa ángeles rígá náa llanta ma̱ngaa.

22 Náa edxu̱ún ángeles rígá mbá piso dí xngiyaʼ xóo hielo ga̱jma̱a̱ ra̱ʼkhá tháán mitsaanʼ.* Rígi̱ rígá náa tsu̱du̱u̱ edxu̱ún. 23 Náa agoo piso dí kaʼmáʼ, jmbu frúwan xpíjpiúún mbá náa níjniúu i̱mba̱a̱. Mámbáa gíʼdoo a̱jma̱ xpíjpiúu dí narugoo ga̱jma̱a̱ níjniúu xuyuuʼ ga̱jma̱a̱ a̱jma̱ dí narugoo ga̱jma̱a̱ náa i̱mba̱ níjniúu. 24 Índo̱ nidxawuun aʼwóo xpíjpiúún, nawáán xóo ewán iyaʼ rí xkujyuʼ, xóo ewán aʼwóo bi̱ gíʼdoo xúgíʼ tsiaki̱i̱. Índo̱ nagún, nawáán xóo ewán egún soldados. Índo̱ naguájun nuxruigúu xpíjpiúún.

25 Nawáán mbá aʼwá náa tsu̱du̱u̱ piso dí rígá náa tsu̱du̱u̱ edxu̱ún. (Índo̱ naguájun nuxruigúu xpíjpiúún). 26 Náa tsu̱du̱u̱ piso dí kaʼmáʼ náa tsu̱du̱u̱ edxu̱ún, rígá mbá dí xóo itsí zafiro, dí xóo xílí* náa nutañajunʼ kaʼnii. Náa rí mitsídánʼ, náa xílí rí nutañajunʼ grígu mbáa bi̱ xóo xa̱bu̱ numbaaʼ kaʼnii. 27 Ndi̱yo̱o̱ mbá rí nambiʼi xóo ajua̱nʼ rí naxpíbínʼ, xóo mbá aguʼ rí nagájnuu náa dí xóo smídúu kaʼnii náa xígií rijma̱a̱, ga̱jma̱a̱ xígií náa agoo smídúu ndi̱yo̱o̱ mbá dí xóo aguʼ kaʼnii. Náa mbájndi ikhaa nambiʼi 28 xóo mbáa takua̱ya̱ʼ náa du̱u̱n mbiʼi dí naxnúu ruʼwa. Xúʼko̱ kaʼnii nindxu̱u̱ aguʼ dí nambiʼi náa mbájndi gíʼ. Nakujmaa xóo aguʼ rí naxpíbínʼ ndrígóo Jeobá. Índo̱ ndi̱yo̱o̱ nismbatígo̱ʼ mbayííʼ ga̱jma̱a̱ nigíʼdu̱u̱ nidxawuun aʼwóo mbáa rí naʼthí.