Isaías
66 Rígi̱ dí naʼthí Jeobá:
“Mekhu nindxu̱u̱ xíliúʼ* náa natañájunʼ ga̱jma̱a̱ ku̱ba̱ʼ nindxu̱u̱ náa wájun rajkúʼ.
Ikha jngóo, náá gándoo gúni̱ mbá goʼwóʼ rá.
Ga̱jma̱a̱ náá gándoo gárígá mbá náa mba̱ya̱a̱ jxu̱ʼ rá.”
2 “Ñawúnʼ niʼni xúgíʼ rígi̱,
xúʼko̱ kaʼnii ni̱jkha̱nú nirígá mbá xúgíʼ”, eʼthí Jeobá.
“Bugi̱ bi̱ ikhúún mba̱yo̱o̱:
Bi̱ nindxu̱u̱ xa̱bu̱ guabaaʼ bi̱ xtáa ngíná ga̱jma̱a̱ ndaʼyamajkuu ajngóʼ.
3 Bi̱ naxíyáa mbáa xedi̱, nindxu̱u̱ xóo bi̱ naxíyáa mbáa xa̱bu̱.
Bi̱ naxnájxi̱i̱n mugu̱ xóo tsigijñaʼ, nindxu̱u̱ xóo mbáa bi̱ naxmígáʼ aphuu xu̱wánʼ.
Bi̱ naxnájxi̱ mbá tsigijñaʼ... ¡nindxu̱u̱ xóo mbáa bi̱ naxnájxi̱ eʼdiuu a̱ga!
Bi̱ naxnájxi̱ tsigijñaʼ ndrígóo olíbano, nindxu̱u̱ xóo mbáa bi̱ ndaʼyamajkhún xándú.
Ikhiin má era̱ʼwi̱i̱ kamba̱a̱ náa magún,
ma̱ngaa nuni̱ gagimijná ga̱jma̱a̱ rí mitsaga.
4 Ikha jngóo ikhúún maraʼwi̱i̱ dí mumíniiʼ,
ga̱jma̱a̱ makuʼmá náa ikhiin dí naʼni mamiñún.
Numuu dí índo̱ ikhúún nindxa̱ʼwu̱u̱n, nimbáa táriʼña,
índo̱ ikhúún ni̱ta̱, nimbáa táʼdxuun.
Nini̱ má xúʼko̱ dí ra̱májánʼ náa iduʼ,
ga̱jma̱a̱ niraʼwi̱i̱ muni̱ rí ikhúún tsénigu̱ʼ”.
5 Gu̱dxawíín ajngóo Jeobá, ikháanʼla bi̱ ndu̱yamajkuíí ajngóo:
“A̱ngia̱la bi̱ tsíñún gúyala, bi̱ tsíñún makuwáanʼ gajmiála ga̱jma̱a̱ numuu mbiʼyuʼ,
nithi: ‹¡Gaguma mba̱a̱ Jeobá!›.
Mú ikhaa* masngájmaminaʼ ga̱jma̱a̱ ma̱ʼkha̱ kayóo rí tsímáá náa ikháanʼla,
ga̱jma̱a̱ ikhiin maguma majti̱i̱nʼ”.
6 ¡Nawáán mbá gitsaʼwá* rí na̱ʼkha̱ náa xuajin,
mbá aʼwá rí nawáán náa guʼwá rí nduyamajkuíí Dios!
Nindxu̱u̱ aʼwá rí Jeobá xtáa raʼni ngíníi xa̱bu̱ sia̱nʼ ndrígóo ga̱jma̱a̱ numuu rí nini̱.
7 Nákha xóó tséjkha̱nú magiʼdaa ada̱, ikhaa nigiʼdaa má ada̱.
Nákha xóó tséxnúu ga̱ʼkhu̱ magiʼdaa ada̱, ikhaa nigiʼdaa má mbáa dxámá.
8 Tsáá lá niʼdxawuun mbá miʼtsú xóo rígi̱ rá.
Tsáá lá ndiʼyoo xóo rígi̱ rá.
Lá ma̱ndoo magi̱ʼi̱ mbá país kááʼ mbóó mbiʼi ráʼ.
Lá ma̱ndoo magi̱ʼi̱ mbá xuajin mba̱a̱ kááʼ mbóó miʼtsú ráʼ.
Mú, Sion mbá nacha̱ nixnúu ga̱ʼkhu̱ dí magiʼdaa ada̱
ga̱jma̱a̱ ikhaa ni̱jkha̱nú nigiʼdiin e̱ji̱i̱n.
9 “Lá ma̱ni̱ rí maxnúu ga̱ʼkhu̱ mbáa a̱ʼgu̱ ga̱jma̱a̱ xáʼga̱nú maxtáa a̱ʼdióo ráʼ.”, eʼthí Jeobá.
“Lá ma̱ni̱ rí maxnúu ga̱ʼkhu̱ mu xúʼko̱ maruguáa xtíjyúu xáʼ.”, eʼthí Dios ndrígáaʼ.
10 Gaʼdxalá kuya̱a̱ Jerusalén ga̱jma̱a̱ gakuwa̱a̱nʼ gagi gajmiála,
xúgiáanʼ ikháanʼ bi̱ nandala ku̱ya̱a̱.
Gaʼdxalá gajmiála, xúgiáanʼ ikháanʼ bi̱ kuwáanʼla ngíná ga̱jma̱a̱ numuu.
11 Numuu dí xó má eʼni mbáa a̱ʼgú nikhi̱i̱ bi̱ naxníxúu a̱ʼdióo asndu magiʼmuu,
xúʼko̱ gáñewa̱a̱nʼ Jerusalén, ikháán magiʼmaaʼ
ga̱jma̱a̱ maraxtaa gagi numuu dí ikhaa niguma mba̱a̱.
12 Rígi̱ dí naʼthí Jeobá:
“Ma̱ni̱ dí ikhaa maxtáa tsímáá xóo mbá mañu,
ga̱jma̱a̱ gamajkhu dí nundrígú xa̱bu̱ xuajin mani̱ndxu̱u̱ xóo yambo̱o̱.
Ikhaa maxníxála ga̱jma̱a̱ maguraʼáanʼ,
magrua̱ʼmáanʼla náa xtiyuu* mu maʼba jngañáanʼla.
13 Xó má mbáa a̱ʼgú nikhi̱i̱ naʼni̱i̱ a̱jkiu̱u̱n a̱ʼdióo,
xúʼko̱ ikhúún gáxtáá rani̱i̱ a̱jkia̱la,
mani̱i̱ a̱jkia̱la ga̱jma̱a̱ numuu Jerusalén.
14 Ikháanʼla mbu̱ya̱a̱ rígi̱ ga̱jma̱a̱ ra̱ʼkhá tháán gáʼdxuu a̱jkia̱la,
mbayáa tsiaki̱i̱ itsala xóo mbá iná rudu̱ʼ.
Jeobá maʼni dí xa̱bi̱i̱ mbuyáá tsiaki̱i̱ ndrígóo,*
mú maʼthí pa̱jnu̱ dí mugíʼnín xa̱bu̱ sia̱nʼ ndrígóo”.
15 “Numuu rí Jeobá ma̱ʼkha̱ xóo mbá aguʼ,
ga̱jma̱a̱ cárriu̱u̱ ma̱ʼkha̱ xóo mbá giñámbiʼ,
mu xúʼko̱ maʼni mumíniiʼ ga̱jma̱a̱ numuu dí nakásngañu̱u̱ʼ,
ma̱ngaa mu maxprígún ga̱jma̱a̱ riʼyu̱u̱ aguʼ.
16 Numuu dí Jeobá majmuu aguʼ mu maʼnimbánuu numún,
xúʼko̱, majmuu espada mu maʼnimbánuu numún xa̱bu̱ numbaaʼ,*
ra̱ʼkhá tháán mbaʼin gákháñún náa ñawúunʼ Jeobá.
17 Mbá xúgíinʼ bi̱ nuni̱ ratamijná ga̱jma̱a̱ bi̱ nuni̱ kaʼwumijnáa mu matu̱ʼu̱u̱n náa jardín* náa kidxuuʼ bi̱ juáʼan tu̱mba̱a̱, bi̱ naʼphu̱ xuyuuʼ a̱ga, bi̱ naʼphu̱ xúgíʼ dí mitsaga ga̱jma̱a̱ bi̱ naʼphu̱u̱n tsijní, mbá xúgíinʼ ikhiin maguma gámbíin, eʼthí Jeobá. 18 Naniʼnúuʼ xúgíʼ rí nuni̱ ga̱jma̱a̱ dí nundxa̱ʼwa̱míjna̱, ma̱ʼkhá mu magímbíin mbá xúgíinʼ xa̱bu̱ bi̱ kúwá náa xuajin mba̱ʼu̱ ga̱jma̱a̱ bi̱ nuthi mixtiʼkhu ajngáa, ikhiin maguwáʼ ga̱jma̱a̱ mbuyáá tsiaki̱i̱ ndrígóʼ”.
19 “Matsi̱ji̱ mbá tsinaʼ náa majñu̱únʼ ikhiin, bi̱ gágáñún makuʼmíin magún náa xuajin dí na̱nguá nidxawíín ga̱jma̱a̱ numuʼ, ni má túyáá tsiaki̱i̱ ndrígóʼ: Náa Tarsis, náa Pul ga̱jma̱a̱ náa Lud, bi̱ najmún xkamídá, ga̱jma̱a̱ náa Tubal, náa Javán ga̱jma̱a̱ náa islas* dí naguanúu mitsínguánʼ, ikhiin muthi rí xóo mitsaanʼ* e̱ni̱ náa majñu̱únʼ xa̱bu̱ xuajin. 20 Rígi̱ gánindxu̱u̱ regalo dí muxnuʼ ikhúún bi̱ nindxu̱ʼ Jeobá, ikhiin maguwáʼ kudiin mbá xúgíinʼ a̱ngia̱la bi̱ kúwá náa mbá xúgíʼ xuajin, maguwáʼ kudiin náa kúbá ndrígóʼ rí kaʼwu, náa Jerusalén, maguwáʼ kudiin náa wáyú, náa carros, náa carretas rí kúgumaʼá, náa mulas ga̱jma̱a̱ náa camellos bi̱ nagún nacha̱, xóo índo̱ xa̱bu̱ Israel naguwáʼ kudúún regalo náa goʼwóʼ ikhúún bi̱ nindxu̱ʼ Jeobá rí kajkuáa náa mbá xua̱a̱ rí kaʼwu”, eʼthí Jeobá.
21 “Ma̱ngaa maraʼwi̱i̱n tikhuun dí ikhiin mu mani̱ndxu̱ún ndxajkun ga̱jma̱a̱ levitas”, eʼthí Jeobá.
22 “Numuu dí xó má nuxi̱ʼ mekhu ga̱jma̱a̱ nuxi̱ʼ ku̱ba̱ʼ dí ma̱ni̱ marigá má xúʼko̱ náa inuʼ, xúʼko̱ má mba̱yu̱u̱ʼ gákúwá bi̱ gáguwáʼ náa ikháanʼla ga̱jma̱a̱ mbiʼyala marigá má xúʼko̱”, eʼthí Jeobá.
23 “Mámbá índo̱ gági̱ʼi̱ gu̱nʼ rudiiʼ ga̱jma̱a̱ índo̱ gáʼni mbiʼi sábado
maguwáʼ mbá xúgíinʼ* musmbati̱gu̱u̱n náa inuʼ”,* eʼthí Jeobá.
24 “Magajnún ga̱jma̱a̱ mbuyáá dí jngútigi̱i̱n mbá xúgíinʼ nikháñún bi̱ nixujximíjna̱ náa inuʼ,
numuu dí ñu̱u̱ bi̱ kúwá náa ikhiin xákháñún
ga̱jma̱a̱ aguʼ dí nitsikhíin xájuíyuuʼ,
ga̱jma̱a̱ rúʼko̱ gáʼni dí mawiñu̱u̱nʼ mbá xúgíinʼ xa̱bu̱”.*