Isaías

5 Guniʼñúʼ ma̱ni̱ mbá ajmúú náa bi̱ nandoʼ ka̱yo̱o̱,

mbá ajmúú dí naʼthí ga̱jma̱a̱ numuu bi̱ nandoʼ ka̱yo̱o̱ ga̱jma̱a̱ uva dí niʼdu.

Ikhí ni̱ʼdu̱u̱ uva maña̱ʼ dí itháan májánʼ,

náa tapo̱o̱ dí kiʼdu uva nitsiji mbá torre

ga̱jma̱a̱ ikhí niʼni mbá iñáʼ náa makujmbi̱i̱ uva.

Ikhú nigiʼtu̱u̱n dí ma̱jma̱a̱ uva dí májánʼ,

mú i̱ndó uva xaná nijma̱a̱.

 3 “Xa̱bu̱ Jerusalén ga̱jma̱a̱ xa̱bu̱ Judá,

mbá péñu,* guthala tsáá gíʼdoo aʼkhúun, ikhúún ráʼ. O uva dí ni̱du̱ dxe̱ʼ.

 4 Ndiéjunʼ xóó ndiyóoʼ ma̱ni̱ ga̱jmu̱ʼ uva dí ni̱du̱

dí na̱nguá ni̱ni̱ rá.

Ikhúún nigúʼtu̱u̱n ma̱jma̱a̱ uva dí májánʼ,

náá numuu rí i̱ndó uva xaná nijma̱a̱ rá.

 5 Guniʼñúʼ ma̱ta̱la

dí gáni̱ ga̱jmu̱ʼ uva dí ni̱du,

ma̱ni̱jngudi̱i̱ gúlóo

ga̱jma̱a̱ mi̱kha̱a̱.

Ma̱ni̱jngudi̱i̱ xtájtsí dí niguma ga̱jma̱a̱ itsí,

ga̱jma̱a̱ muxujmbi̱riga̱.

 6 Ma̱ni̱ dí mani̱ndxu̱u̱ xóo mbá ku̱ba̱ʼ rí niguanáa,

nimbáa ni xáʼda̱ ni má xájmuu azadón.

Makráʼáan iná tsuwanʼ ga̱jma̱a̱ iná rí xkawiʼ,

matañájúúnʼ du̱u̱n dí xúni̱ maxnúu ruʼwa ikhí.

 7 Numuu dí ixi̱ uva ndrígóo Jeobá bi̱ naʼtáñajúúnʼ ángeles nindxu̱u̱ goʼwóo Israel,

xa̱bu̱ Judá nindxu̱ún ixi̱ uva dí ikhaa nindoo kaʼyoo.

Ikhaa nigiʼtu̱u̱n marigá dí májánʼ,

mú dí ra̱májánʼ nirígá,

nigiʼtu̱u̱n maguma rí jmbu,

mú niwáán mbá gitsaʼwá* dí ngíná”.

 8 Ma̱ʼkha̱nú mbá gamiéjunʼ náa bi̱ nuruwa̱a̱ guʼwá ga̱jma̱a̱ i̱mba̱ guʼwá,

ga̱jma̱a̱ bi̱ nuruwa̱a̱ mbaaʼ ga̱jma̱a̱ i̱mba̱ mbaaʼ,

asndu índo̱ nánguá gáʼchú

ga̱jma̱a̱ i̱ndó ikhiin kúwá náa ku̱ba̱ʼ rígi̱.

 9 Nidxawuun nixná ajngóo Jeobá bi̱ naʼtáñajúúnʼ ángeles,

mbaʼa guʼwá, tséʼniuu á mu mba̱ʼu̱ ga̱jma̱a̱ mitsaanʼ,*

maʼga̱nú mani̱ndxu̱u̱ mbá dí maʼnimíñún, ga̱jma̱a̱ ni xákúwá xa̱bu̱.

10 Mbá mbaaʼ rí mba̱a̱* náa kiʼdu uva káaʼ majma̱a̱ mbá 22 litro,*

ga̱jma̱a̱ mbá 160 kilo* tsígáʼ, káaʼ majma̱a̱ 16 kilo.*

11 ¡Ma̱ʼkha̱nú mbá gamiéjunʼ náa bi̱ nawájxu̱u̱nʼ miʼcha̱ mu mu̱wa̱a̱n iya najnga̱a̱,

naʼwa̱a̱n asndu mbruʼun, asndu índo̱ vino naʼni rí xúyáá dí gúni̱!

12 Náa ndxu̱ún guáʼdáá arpa, ajua̱nʼ dí gíʼdoo cuérdóo,

pandereta, flauta ga̱jma̱a̱ vino.

Mú na̱nguá endxaʼwamíjna̱ náa dí naʼni Jeobá,

ni má tséyáá ñajunʼ dí naʼni ga̱jma̱a̱ ñawúunʼ.

13 Ikha jngóo maʼga kiʼyá xuajñunʼ

numuu dí ragíʼdoo ku̱ma̱,

xa̱bi̱i̱ bi̱ guáʼdáá numún maxkidxu̱u̱n,

ga̱jma̱a̱ mbá xúgíinʼ xa̱bu̱ xuajñuu makándawúnʼ.

14 Ikha jngóo Iñá wajinʼ* niʼni itháan mba̱a̱,

ga̱jma̱a̱ ra̱ʼkhá tháán ma̱ja̱nʼ rawuunʼ nimbáʼtoo,

ga̱jma̱a̱ xa̱bu̱ ñajunʼ bi̱ kúwá náa Jerusalén,

rí xóo nundxa̱ʼwa̱ xa̱bu̱ bi̱ mbaʼin ga̱jma̱a̱ xa̱bu̱ bi̱ nuni̱ ndxa̱a̱, magún má tsiaki̱i̱ ikhí.

15 Ga̱jma̱a̱ xa̱bekha musmbati̱gu̱u̱n,

xa̱bekha magajtaa numún,

ga̱jma̱a̱ dí nuni̱ mbaʼumíjna̱ xa̱bu̱ magajtaa.

16 Jeobá bi̱ naʼtáñajúúnʼ ángeles maguma mba̱a̱ ga̱jma̱a̱ numuu rí májánʼ eʼni,

Dios bi̱ gajkhun, bi̱ Kaʼwii maguma kaʼwi̱i̱ ga̱jma̱a̱ numuu dí jmbu rí naʼni.

17 Ga̱jma̱a̱ e̱jín múgú muphiʼtsu náa mbaaʼ dí rígá ra̱jxa̱, náa majñu̱u̱ʼ mbaaʼ dí niguma gámbáa,

xa̱bu̱ bi̱ naguwaáʼ muphiʼtsu náa mbaaʼ rí niguanáa, náa nákha ginii kúwá xujkhúʼ bi̱ nuphiʼtsu májánʼ.

18 ¡Ma̱ʼkha̱nú mbá gamiéjunʼ náa bi̱ nuxmajtaa dí nikiéʼkhúún ga̱jma̱a̱ ñuñuu rí minduwaʼ,

ga̱jma̱a̱ aʼkhá ndrígu̱ún nuxmajtaa ga̱jma̱a̱ ñuñuu carreta,

19 bi̱ nuthi: “Gaʼcho̱o̱ maʼni ñajuunʼ,

ga̱ʼkha̱ nacha̱ mu xúʼko̱ mbuʼyáá,

gambanúu rí nandoo maʼni bi̱ Kaʼwii náa Israel,

mu xúʼko̱ mbuʼyáá xú káʼnii nindxu̱u̱”!

20 ¡Ma̱ʼkha̱nú mbá gamiéjunʼ náa bi̱ nuthi dí májánʼ nindxu̱u̱ ra̱májánʼ, ga̱jma̱a̱ dí ra̱májánʼ nindxu̱u̱ májánʼ,

bi̱ nuthi dí mikína rí mbiʼi, ga̱jma̱a̱ mbiʼi rí mikína,

bi̱ nuthi rí miʼkhu̱u̱n taun, ga̱jma̱a̱ dí taun nindxu̱u̱ miʼkhu̱u̱n!

21 ¡Ma̱ʼkha̱nú mbá gamiéjunʼ náa bi̱ nundxaʼwamíjna̱ dí ra̱ʼkhá tháán ejmañún

ga̱jma̱a̱ bi̱ naku̱mu̱ún dí nundxa̱ʼwa̱míjna̱ májánʼ!

22 ¡Ma̱ʼkha̱nú mbá gamiéjunʼ náa bi̱ najmaʼniiʼ dí naʼngu̱u̱n naʼwa̱a̱n vino,

ga̱jma̱a̱ xa̱bu̱ bi̱ najmiin nundawa̱a̱ʼ iya najnga̱a̱,

23 bi̱ nuthi dí ragíʼdoo aʼkhúun xa̱bu̱ ra̱májáanʼ, numuu dí nindrigú mbá regalo,

ga̱jma̱a̱ bi̱ tsíñún gúniu̱u̱n dí májánʼ bi̱ míjíinʼ!

24 Numuu dí xó má aguʼ na̱ʼkhu̱ ra̱jxa̱ dí nijndooʼ,

ga̱jma̱a̱ xóo iná nijndooʼ naguámbáa náa riʼyu̱u̱ aguʼ,

ajmu̱u̱ dí ra̱ʼkhá tháán mbaʼa mi̱ga̱a̱, ga̱jma̱a̱ riʼyu̱u̱ magadráʼa xóo yujndaʼ,

numuu dí nini̱ gaʼduunʼ xtángoo* ndrígóo Jeobá bi̱ naʼtáñajúúnʼ ángeles

ga̱jma̱a̱ túyamajkuíí ajngóo bi̱ Kaʼwii náa Israel.

25 Numuu dí nakásngañu̱u̱ʼ Jeobá nakha ga̱jma̱a̱ xuajñuu,

ga̱jma̱a̱ ikhaa makrui̱ya̱ʼ ñawúunʼ mu maʼni ngíníi ga̱jma̱a̱ mu maxnún.

Kúbá maʼba̱a̱n,

ga̱jma̱a̱ majnguti̱ga̱ wajñúúnʼ xóo náskha náa kamba̱a̱.

Ga̱jma̱a̱ numuu xúgíʼ rúʼko̱, dí nakásngañu̱u̱ʼ táwiji̱i̱,

fruíya̱ʼ má xúʼko̱ ñawúunʼ mu maxnún ga̱jma̱a̱.

26 Nikujxi̱ mbá tsinaʼ mu mbuyáá* xa̱bu̱ xuajin dí rígá mitsínguánʼ,

nijuíyú mu mandxaʼwún bi̱ kúwá náa naguámbári̱go̱o̱ ku̱ba̱ʼ,

ga̱jma̱a̱, ¡gu̱ya̱a̱!, nacha̱ eguwáʼ.

Cinturón dí kua̱ʼa̱n smídún, na̱nguá nijkhúu̱ʼ,

ni má na̱nguá nithu ñuñuu raxtúún.*

28 Xúgíʼ flecha ndrígu̱ún xíníʼ

ga̱jma̱a̱ xúgíʼ xkamídá ndrígu̱ún rígá xawii.

Tsújún wáñu̱ún nindxu̱u̱ xóo itsí xíníʼ dí gújkhúʼ,

ga̱jma̱a̱ llántóo carreti̱ún na̱jkha̱ nacha̱ xóo giñámbiʼ.

29 Nawáán aʼwún xóo endxa̱ʼwá mbáa león,

nundxa̱ʼwa̱ gakhi̱i̱ xóo león.*

Majmangu̱u̱nʼ ga̱jma̱a̱ murugui̱i̱n xujkhúʼ,

magún kudiin ga̱jma̱a̱ nimbáa xáʼni káwíin.

30 Mbiʼi rúʼko̱, mundxa̱ʼwa̱ náa ikhaa

xóo endxa̱ʼwá lamáa.*

Asndu tsáá bi̱ gáʼyoo ku̱ba̱ʼ mbaʼyoo dí gamíi kína kri̱ga̱,

asndu aguʼ niʼni kína niʼni du̱u̱n.