Ndayóoʼ rí xa̱bu̱ guanii muxna ikha

TSÁA GÍʼMAA MAXNÚN IKHA E̱JÑA̱ʼ RÁ.

E̱ji̱n ndayóoʼ rí xa̱bu̱ guanii muxnún ikha ga̱jma̱a̱ xtágabu, ga̱jma̱a̱ anu̱ún phú kaʼñún muni rígi̱. Mú eʼwíínʼ xa̱bu̱ guanii ma̱ndoo mumbañún e̱jña̱ʼ.

NDÍJKHA GÍʼDOO NUMUU RÁ.

Náa mbaʼa xuajen, jiáma tsekuwa mba̱yu̱ʼ mbiʼi gajmiún xa̱bu̱ guanii. Atatsaʼwáminaʼ rígi̱:

• E̱ji̱n nakuwa itháan mba̱yu̱ʼ náa escuela, náa kuwa itháan bi̱ nunigajmaa ki xóo bi̱ nusngáa o eʼwíínʼ xa̱bu̱ guanii.

• Índo̱ natangi̱i̱n guʼwún nda̱wa̱a̱ nimbáa numuu rí anu̱ún kuwa ruñajunʼ.

• Náa mbá i̱yi̱i̱ʼ nasngájma rí náa Estados Unidos, e̱ji̱n bi̱ guáʼdáá 8 asndu 12 tsigúnʼ nakuwa ruyáá majun horas rí mbá mbiʼi aparatos electrónicos.a

Náa libro Hold On to Your Kids (Xátatsiʼñúʼ e̱jña̱ʼ) naʼthí: “Jiáma ga̱jma̱a̱ wa̱ʼxa̱ʼ nánguá eyaridúún anu̱ún, bi̱ nusngúún o eʼwíínʼ ni má tséndu̱ʼu̱u̱n xtágabu, rí nuni [...] nuraxu̱u̱n eʼwíínʼ jiáma bi̱ mbóó má tsigúnʼ”.

XÓO GÁRAXNU̱U̱N IKHA

Atríyaʼ awan mu maraxtaa gajmiáanʼ e̱jña̱ʼ

IKHA RÍ NA̱ʼKHA̱ NÁA BIBLIA: “Arasngáá dxámá maʼga̱ náa kamba̱a̱ rí kaʼyoo; índo̱ gáʼni xa̱bu̱ nikhi̱i̱ xagajnúriyoʼ ikhí” (Proverbios 22:6).

Itháan májánʼ rí e̱ji̱n mbuyááʼ ikha ndrígu̱ún anu̱ún. Bi̱ nduyáá nuthi rí asndu índo̱ nanindxu̱ún jiáma ga̱jma̱a̱ wa̱ʼxa̱ʼ, e̱ji̱n buʼko̱ nduyamajkuíí itháan xtágabu ndrígu̱ún anu̱ún ki xóo rí nuxnún bi̱ nambáxu̱u̱n gajmiún. Bi̱ naʼsngáa Psicología Laurence Steinberg naʼthí náa libro ndrígóo You and Your Adolescent (Ikháán ga̱jma̱a̱ʼ a̱ʼdiáaʼ dxámá): “Índo̱ nanindxu̱ún jiáma ga̱jma̱a̱ wa̱ʼxa̱ʼ ga̱jma̱a̱ índo̱ naganuu itháan aniu̱ún xóó nusngúún rí muni”. Naʼthí xóó: “A̱ʼdiáaʼ dxámá o wáxá ndaʼyamajkhuu rí xóo tatsaʼwáá edxa̱ʼ, maski ajndu ikhaa tsíndxaʼwáminaʼ xúʼko̱, ga̱jma̱a̱ naʼdxun rí ikháán naratháán maski ajndu ikhaa tsékumu̱u̱ xúʼko̱”.

E̱jña̱ʼ nduyamajkuaʼ, ikha jngó gajmaaʼ rígi̱. Araxtaa gajmiáanʼ. Arathún rí naku̱ma̱ʼ, arasngúún rí gíʼdoo numuu ga̱jma̱a̱ arathún xóo xtaa.

Atandu̱ʼu̱u̱n xa̱bu̱ guanii rí mumbayáaʼ

IKHA RÍ NA̱ʼKHA̱ NÁA BIBLIA: “Bi̱ najngruigo̱o̱ gajmíi̱n xa̱bu̱ bi̱ nundxa̱ʼwa̱a̱ májánʼ edxu̱ún, xúʼko̱ má gándxa̱ʼóo májánʼ edxu̱u̱ ma̱ngaa” (Proverbios 13:20).

Lá kuwa xa̱bu̱ guanii bi̱ ma̱ndoo muxnáá a̱ʼdiáaʼ mbá xkri̱da májánʼ ráʼ. Lá rígá rí ma̱ndoo matani mu a̱ʼdiáaʼ mambaxúu gajmíi̱n xa̱bu̱ buʼko̱ ráʼ. Xúʼko̱, mú tsíyoo gáʼthi rí ikháán matatsiʼñáʼ rí ikhaa maʼtáñajunʼ a̱ʼdiáaʼ. Rí mambáyaaʼ mbáa xa̱bu̱ nikhi̱i̱, mbáa bi̱ xáʼni gawúunʼ a̱ʼdiáaʼ mayambáá mu majuiʼsngáá májánʼ. Náa Biblia naʼthí rí asndu dxámá Timoteo nimbáyúu rí nimbáxu̱u̱ ga̱jma̱a̱ apóstol Pablo, asndu índo̱ nikhi̱i̱ itháan, ga̱jma̱a̱ rí Pablo nimbáyúu rí nimbáxu̱u̱ ga̱jma̱a̱ Timoteo (Filipenses 2:20, 22).

Rí mbiʼi xúgi̱, mbaʼin bi̱ kuwa mbá guʼwíin nánguá kuwa jnduʼ numuu rí xiʼñúnʼ, amún o eʼwíínʼ bi̱ kuñún kuwa mitsínguánʼ wéñuʼ. Á mu xúʼko̱ kuwáanʼ, ataniminaʼ rí e̱jña̱ʼ majmañún náa eʼwíínʼ xa̱bu̱ guanii mu muguaʼdáá cualidad rí nanigua̱ʼ ikháán.