Xa̱bu̱ nuni̱ mbá torre dí mitsidanʼ wéñuʼ

NINÚJNGOO mbaʼa tsiguʼ. E̱ji̱i̱n Noé niguáʼdiin mbaʼin e̱ji̱n. E̱ji̱n bige̱ niguanii niguáʼdiin itháan e̱ji̱n. Nacha̱ nikúwi̱i̱n mbaʼin xa̱bu̱ náa tsu̱du̱u̱ Ku̱ba̱ʼ.

Nemrod aʼdá xiñii ege Noé ninindxu̱u̱ mbáa dí ikhiin. Ra̱májánʼ a̱jkiu̱u̱n Nemrod naguguin xujkhúʼ ma̱ngaa nagudíin, xúʼko̱ má eʼni gajmíi̱n xa̱bu̱. Ma̱ngaa Nemrod ninindxu̱u̱ rey mu maʼtáñajúúnʼ eʼwíínʼ xa̱bu̱. Dios tániguʼ kaʼyoo Nemrod.

Nákha ikhú mbóó ajngáa ethi xúgínʼ xa̱bu̱. Nemrod nindoo magiʼdiin mbó nduʼ xa̱bu̱ mu ma̱ndoo maʼtáñajúúnʼ. Ikha jngó, lá natayáá ndiéjunʼ niʼni xáʼ. Niʼthún muni̱ mbá xuajin, ga̱jma̱a̱ dí ikhí má gúní mbá torre rí mitsidánʼ wéñuʼ. Agoo gi̱i̱ náa kiʼniriyaʼ nakujmiin xa̱bu̱ bi̱ nuni̱ tabique.

Jeobá Dios tániguʼ torre rígi̱. Ikhaa nindoo rí xa̱bu̱ magajnún mu makuwíin náa xúgíʼ tsu̱du̱u̱ Ku̱ba̱ʼ. Mú ikhiin nithi: ‹¡Guʼgua̱! Gu̱ʼni̱ mbá xuajin ga̱jma̱a̱ mbá torre rí mitsidánʼ wéñuʼ rí martumuu asndu náa mekhu. ¡Ikhú majmaʼniáanʼlú wéñuʼ!›. Nindúún rí mbiʼyamajkhúún ikhiin raʼkháa Dios.

Ikha jngó Dios niʼni rí xa̱bu̱ muniñaʼ runi torre rígi̱. Lá natayáá xú káʼnii niʼni xáʼ. Niʼni rí mbá náchaa, xa̱bu̱ muthi mixtiʼkhu ajngáa, nánguá ethi mbó ajngáa. Nánguá ekru̱ʼu̱u̱n rí etamijná ka̱nikhiin. Ikha jngó xuajin rúʼko̱ nigumbiʼyuu Babel o Babilonia rí nandoo gáʼthi “Nijngriʼin”.

Rí xúgi̱ xa̱bu̱ nigi̱ʼdi̱i̱ nigájnun náa Babel. Xa̱bu̱ bi̱ nuthi mbó ajngáa nigún gakúwi̱i̱n mbóó náa i̱ʼwáʼ Ku̱ba̱ʼ.