A̱jma̱ xnuʼndaa ndrígóo Faraón

NAKRÚJNGOO a̱jma̱ tsiguʼ, José xóó xtáa náa guʼwá e̱jua̱nʼ. Bi̱ naxná copa xóó tsirmáʼáan a̱jkiu̱u̱n kaʼyoo José. Ikhú mbóo mbruʼun Faraón nagiʼdoo a̱jma̱ xnuʼndaa rí phú kiejunʼ, ma̱ngoo naraximínáʼ káʼnii eyoo gáʼthi. Lá natayáá rí xtáa raʼgu xáʼ. I̱mba̱ néjtsuu Faraón nandxaʼwún bi̱ najmañún wéñuʼ ga̱jma̱a̱ naʼthúún rí nigundaa. Mú ikhiin na̱nguá ejmañún gutan káʼnii eyoo gáʼthi nájma̱ xnuʼndoo.

Bi̱ naxná copa ajndu ndiʼkhún ermáʼáan a̱jkiu̱u̱n kaʼyoo José. Naʼthúu̱n Faraón: ‹Índo̱ ikhúúnʼ nixtáá náa guʼwá e̱jua̱nʼ ikhí nixtáa mbáa xa̱bu̱ bi̱ najmañuu ndaʼyoo káʼnii eyoo gáʼthi xnuʼndaa›. Faraón naʼni rí José magajnáa nacha̱ náa guʼwá e̱jua̱nʼ.

Faraón naʼthúu̱n José rí nigundaa: ‹Ndi̱ñu̱u̱n juwiin xede̱ e̱ʼgú mba̱ʼu̱u̱n, mitsiʼñíin. Ikhú ndi̱ñu̱u̱n juwiin xede̱ e̱ʼgú bi̱ i̱ndó itsu̱ún. Ga̱jma̱a̱ bi̱ i̱ndó itsu̱ún bugi̱ niʼphu̱u̱n bi̱ mba̱ʼu̱u̱n›.

‹Raga̱jma̱ xnuʼndoʼ ndi̱yo̱o̱ juwan iña rí nigu májánʼ ga̱jma̱a̱ dí nikhi̱i̱ rí nigaja̱a̱ náa mbó ixu̱u̱. Ikhú ndi̱yo̱o̱ juwan iña rí na̱nguá nigu májánʼ tsígoʼ ga̱jma̱a̱ nijndoʼ. Ma̱ngaa iña rí na̱nguá nigu májánʼ nigíʼdu̱u̱ ni̱ʼphu̱ náa juwan iña rí nixná májánʼ tsígoʼ.›

José naʼthúu̱n Faraón: ‹Ikhaa má eyoo gáʼthi nájma̱ xnuʼndaa. Bi̱ juwiin xede̱ e̱ʼgú bi̱ mba̱ʼu̱u̱n ga̱jma̱a̱ juwan iña dí nigiʼdoo májánʼ tsígoʼ nandoo gáʼthi juwan tsiguʼ, ga̱jma̱a̱ juwiin xede̱ bi̱ i̱ndó itsu̱ún ga̱jma̱a̱ juwan iña dí na̱nguá nigiʼdoo májánʼ tsígoʼ nandoo gáʼthi imbá juwan tsiguʼ. Juwan tsiguʼ gáʼni dí marigá wéñuʼ ganitsu náa Egipto. Nda̱wa̱á marigá imbá juwan tsiguʼ rí ni xárígá wéñuʼ ganitsu›.

Ikha jngó, José naʼthúu̱n Faraón: ‹Atayááʼ mbáa xa̱bu̱ bi̱ najmañuu wéñuʼ ga̱jma̱a̱ atagíʼ rí maguxi̱i̱ ganitsu juwan tsiguʼ rí marigá wéñuʼ. Ikhú ní xákhañun xa̱bu̱ ga̱jma̱a̱ ewiʼ rí maʼni imbá juwan tsiguʼ rí ní xáʼni wéñuʼ ganitsu›.

Faraón nanigu̱ʼ rí nutháán. Ma̱ngaa nagíiʼ José mu maguxi̱i̱ ganitsu. Ikhú José niʼni ragajmi̱i̱n bi̱ nigiʼdoo wéñuʼ numuu náa Egipto.

Migiñuʼ tsiguʼ nda̱wa̱á, dí nirígá ewiʼ, José ndaʼñún tikhun xa̱bu̱ bi̱ naguwáʼ. Lá natayáá tsíin ni̱ndxu̱ún ráʼ. ¡Ikhiin ñajúnʼ 10 a̱ngui̱i̱n José bi̱ guanii! Jacob anu̱ún nikuʼmiin náa Egipto numuu rí na̱jkha̱ rámbá ganitsu ndrígu̱ún náa xuajin Canaán. José naninuʼ a̱ngui̱i̱n, mú ikhiin túniʼniʼ ikhaa. Lá natayáá náa numuu ráʼ. Numuu rí José nikhi̱i̱ má itháan, ga̱jma̱a̱ kagíiʼ mbá xtíin rí mbá nutu kayuʼ.

José narmáʼáan a̱jkiu̱u̱n rí nákha ikhaa ni̱ndxu̱u̱ dxámá lájuiin nigundaa rí a̱ngui̱i̱n naguwáʼ gúsmbati̱gu̱u̱n náa ikhaa. Lá narmáʼáan a̱jkia̱nʼ rí nitraxnuu ga̱jma̱a̱ numuu rúʼko̱ ráʼ. Ikha jngó José ndaʼyoo rí Dios ni̱ndxu̱u̱ bi̱ nikuʼmaa náa Egipto, ga̱jma̱a̱ mbóo numuu májánʼ. Ndiéjunʼ lá eʼni José ku̱ma̱ʼ ikháánʼ rá. Guʼyáá.