Mbá ganitsu nuxi̱ʼ

LÁ NATAYÁÁ ndiéjunʼ rí kuwa ruraxi̱i̱ xa̱bu̱ mbayííʼ ráʼ. Asndu xóo ajma̱ʼ kaʼnii. Miʼxá ni̱ndxu̱u̱ ga̱jma̱a̱ mbawiʼ xóo iná ma̱jkha̱ʼ. Mú raʼkháa ajma̱ʼ ñajunʼ; ni̱ndxu̱u̱ mbá rí ma̱ndoo miʼtsu.

Naʼni xóo mbá gu̱nʼ rí israelitas nigájnun náa Egipto. Kuwa náa ku̱ba̱ʼ gíná. Ikhí na̱nguá erígá wéñuʼ ganitsu, ma̱ngoo ikhiin nuxieʼkhá: ‹Itháan májánʼ niʼni á mu rí Jeobá nigudiáanʼ náa Egipto. Ikhí niphiʼtsuluʼ asndu nguátha má nindalúʼ›.

Ikha jngó Jeobá eʼthí: ‹Ma̱ni̱ rí magajtaa ganitsu asndu mekhuíí›. Ikhaa ríʼkui̱ rí eʼni. I̱mba̱ néjtsuu miʼcha̱, índo̱ rí israelitas ndiyáá rí miʼxá ni̱ndxu̱u̱ rí nikajtaa, nuraximijna̱: ‹Ndiéjunʼ ni̱ndxu̱u̱ rá.›

Moisés eʼthí: ‹Rígi̱ ni̱ndxu̱u̱ ganitsu rí Jeobá naxnala mu̱phu̱›. Xa̱bu̱ nutháán MANÁ. Maná miʼtsí xóo pan rí mbawiʼ rí naguma ga̱jma̱a̱ yááʼ.

Moisés naʼthúún xa̱bu̱: ‹Guraxi̱i̱ xóo má e̱ʼngo̱o̱ mikhu mámbáa›. Ikha jngó, mámbá miʼcha̱ nuni̱ xúʼko̱ kaʼnii. Ikhú, índo̱ A̱jkha̱ʼ naʼni mijkhariga, maná rí naguanúu mbayííʼ najuiyaaʼ.

Ma̱ngoo Moisés naʼthí: ‹Nimbáa xayéxi̱i̱ maná asndu i̱mba̱ néjtsuu›. Mú tikhuun nuni̱ xúʼko̱ kaʼnii.

Lá natayáá ndiéjunʼ erígá ikhú ráʼ. ¡I̱mba̱ néjtsuu miʼcha̱ maná rí nigixi̱i̱ najthíin ñu̱u̱ ma̱ngaa nagi̱ʼdu̱u̱ naʼni ndajtsúunʼ mixkawiʼ wéñuʼ!

Mú Jeobá naʼthí rí mbóo mbiʼi rí mbá semana muraxi̱i̱ maná rí mu̱phu̱ a̱jma̱ mbiʼi. Ikhaa rúʼko̱ rí eʼni majun mbiʼi. Ga̱jma̱a̱ Jeobá naʼthí rí muraxi̱i̱ maná asndu i̱mba̱ néjtsuu, numuu rí ní xáʼni makajtaa maná rí gáʼni juwan mbiʼi. ¡Índo̱ nuyexi̱i̱ maná asndu índo̱ naʼni juwan mbiʼi, na̱nguá ejthíin ñu̱u̱ asndu na̱nguá má eʼni ndajtsúunʼ mixkawiʼ wéñuʼ! ¡Imbo̱o̱ milagro ni̱ndxu̱u̱!

Xúgíʼ tsiguʼ rí israelitas nakuwa náa ku̱ba̱ʼ gíná, naʼphu̱ maná.