Xtátsí ndrígóo Jerusalén

Tsiguʼ kidíiʼ. Nehemías ninindxu̱u̱ mbáa israelita bi̱ nixtáa náa xuajen Susa rí kaʼyoo xuajen Persia. Ikhaa ninindxu̱u̱ mbáa ñumbáá ndrígóo rey Artajerjes. Mbóo mbiʼi, ndxájuu Nehemías ni̱ʼkha̱ kayóo mbá ajngáa dí ra̱májánʼ: “Israelitas bi̱ nitangi̱i̱n náa Jerusalén na̱nguá kaxtiewu̱u̱n májánʼ. Xtátsí ga̱jma̱a̱ xkrugua ndrígóo xuajen rí babilonios nini gámbáa taguma̱a̱”. Nehemías nixtáa gíná wéñuʼ. Nindoo mambáñun, ikha jngó niʼtákáñuu Dios mu rey maniñuʼ maʼga̱a̱ náa Jerusalén.

Nda̱wa̱á, rey ndiʼyoo rí Nehemías xtáa gíná. Niʼthúu̱n: “Nimbá miʼtsú tséyááʼ xúgi̱ kaʼnii. Ndiéjunʼ tagíʼnii rá.” Nehemías niriʼña̱a̱: “Xuajñuʼ, Jerusalén, niguma gámbáa, xú káʼnii rí xáxtáá gíná rá.” Rey niraxu̱u̱: “Ndiéjunʼ gándoo mani mu mambáyaʼ rá.” Ikhú, Nehemías niʼtájkáan mañúú. Nda̱wa̱á niʼthí: “Atani mbá péñu, atatsíñuʼ maʼgáaʼ Jerusalén mu mani̱i̱ xtátsí”. Rey Artajerjes niniñuʼ maʼga̱. Ma̱ngaa nimbáyúu mu nda̱a̱ rí gagiʼnuu náa kamba̱a̱ rí gáʼga. Ma̱ngaa, nigíʼ xóo gobernador náa Judá ga̱jma̱a̱ nixnúu xajpa mu maʼni xkrugua ndrígóo xuajen.

Índo̱ Nehemías ni̱jkha̱nú náa Jerusalén, ni̱jkha̱ gáʼyoo xú káʼnii kri̱ga̱ xtátsí. Nda̱wa̱á nigímbíin ndxajkun ga̱jma̱a̱ Xa̱bu̱ Ñajunʼ ma̱ngaa niʼthúún: “Raʼkhí kayuʼ rígi̱. Gíʼmáanʼ muñajunʼ”. Xa̱bu̱ xuajen nindúún maguma xúʼko̱ ga̱jma̱a̱ nini̱i̱ xtátsí.

Tikhun xa̱bu̱ sia̱nʼ ndrígu̱ún israelitas nitsijmiin ga̱jma̱a̱ nithi: “Asndu mbáa e̱gi̱ ma̱ndoo maʼni gámbáa xtátsí rí kuwa runi̱i̱”. Mú bi̱ nuñajunʼ túdxawiin ga̱jma̱a̱ niñajunʼ má xúʼko̱. Nigún ruxuxi xtátsí ga̱jma̱a̱ ni̱jkha̱ raʼni mitsídaanʼ ga̱jma̱a̱ niwi̱ji̱ gujkhuʼ.

Ikhú, mbaʼin xa̱bu̱ sia̱nʼ náa mixtiʼkhu xuajen nithi rí magún guxmijná mbá nacha̱ náa Jerusalén. Bi̱ judíos nidxawíín, ga̱jma̱a̱ nimiñun wéñuʼ. Mú Nehemías niʼthí: “Xamiñala. Jeobá xtáa ga̱jma̱á nindxu̱lu”. Ga̱jma̱a̱ nigruigi̱i̱n bi̱ muyejngoo mu muñewu̱u̱n xa̱bu̱ bi̱ nuñajunʼ. Ikha jngó xa̱bu̱ sia̱nʼ na̱nguá niʼngo̱o̱ muxnún.

Xtátsí ga̱jma̱a̱ xkrugua niguáxi índo̱ nirámáʼ mbá 52 mbiʼi. Mu muni ndxo̱o̱, Nehemías ni̱ʼkha̱ kagu̱u̱n levitas náa Jerusalén. Nigruigi̱i̱n a̱jma̱ grupo bi̱ muni ajmúú. Esdras ni̱jkha̱ náa mbá grupo, ga̱jma̱a̱ Nehemías ni̱jkha̱ náa i̱mba̱ grupo. Nitsimún náa escaleras náa Xkrugua ndrígóo iyaʼ. Nda̱wa̱á, mámbá grupo ni̱jkha̱ tsu̱du̱u̱ xtátsí náa mbájndi xuajen. Nagún rundiyíí trompetas, címbalos ga̱jma̱a̱ arpas, ga̱jma̱a̱ nuni ajmúú náa Jeobá, asndu índo̱ nigimbíin náa templo. Xa̱bekha, gu̱ʼu̱ ga̱jma̱a̱ e̱ji̱n nixnaxi̱ tsigijñaʼ náa Jeobá ga̱jma̱a̱ niniriyaʼ ndxa̱a̱. Nidxún wéñuʼ rí asndu mitsínguánʼ ewáán aʼwún.