Cornelio nagruigú xi̱ʼ kaʼwu

Náa Cesarea, nixtáa mbáa oficial bi̱ nigiʼdoo wéñuʼ numuu bi̱ kayá edxu̱u̱ náa soldados bi̱ kuwa náa Roma, bi̱ nigumbiʼyuu Cornelio. Maski ajndu na̱nguá ninindxu̱u̱ judío, mú ikhiin ndiyamajkuíí. Ikhaa ninindxu̱u̱ mbáa xa̱bu̱ bi̱ naxná rí gíʼdoo, numuu rí naʼni mbaʼa rí májánʼ ga̱jma̱a̱ numún xa̱bu̱ bi̱ migíníi. Cornelio niʼnimbo̱o̱ kaʼyoo Jeobá ga̱jma̱a̱ naʼthá kháñuu má xúʼko̱. Mbóo mbiʼi mbáa ángel nikujmaa náa ikhaa ga̱jma̱a̱ niʼthúu̱n: “Dios niʼdxuun rí niratájkáan. Ataxúʼmiin xa̱bia̱ʼ náa xuajen Jope, náa xtáa Pedro, mu muthán rí ma̱ʼkha̱ gáʼyaaʼ”. Cornelio núkhu nikuʼmiin ajtsíin xa̱bu̱ náa Jope, rí naʼni mbá 50 kilómetros rí mitsínguánʼ rí naguanúu xígií náa sur.

Mú náa Jope, Pedro nigiʼdoo mbá visión. Ndiʼñún xujkhúʼ rí bi̱ judíos ragíʼmaa muphu̱u̱n. Nda̱wa̱á niʼdxuun mbá aʼwá rí niʼthúu̱n rí mikhu̱u̱n. Pedro táʼndoo ga̱jma̱a̱ niʼthí: “Nimbá miʼtsu na̱nguá nikhuuʼ mbáa xujkhúʼ bi̱ mitsagaa”. Aʼwá niriʼñuu: “Xárata rí xujkhúʼ bugi̱ mitsagiin, rí xúgi̱ Dios naʼthí rí ni̱ndxu̱ún mikaʼwun”. Aʼwá ma̱ngaa niʼthúu̱n: “Wájun ajtsíin xa̱bu̱ náa riejuanʼ, ayuʼ gátañu̱u̱n”. Pedro ni̱jkha̱ ga̱jma̱a̱ niraxu̱u̱n xa̱bu̱ náa numuu niguwáʼ. Ikhiin niriʼña: “Nikuʼmáanʼxu Cornelio, mbáa oficial ndrígu̱ún soldados bi̱ nakha náa Roma. Nandoo rí mi̱dxa̱ʼ náa goʼwóo náa Cesarea”. Pedro niʼthún xa̱bu̱ rí maguanún ikhí mbruʼun rúʼko̱. I̱mba̱ néjtsuu, ni̱jkha̱ gajmíi̱n náa Cesarea. Tikhun a̱ngiu̱lú bi̱ kuwa náa Jope mangiin nigún.

Índo̱ Cornelio ndiʼyoo rí ni̱jkha̱nú Pedro, nismbátigo̱o̱. Mú Pedro niʼthúu̱n: “Añajún. Ikhúúnʼ ni̱ndxu̱ʼ mbáa xa̱bu̱ xóo ikháánʼ. Dios niʼthúnʼ rí ma̱ʼkhá náa guʼwáaʼ, maski ajndu judíos tsetuʼuxu náa guʼwún bi̱ raʼkhíin judíos. Rí xúgi̱ arathúnʼ, náa numuu nitanda̱ʼa̱ ma̱ʼkhá gáyaaʼ”.

Cornelio niʼthúu̱n Pedro: “Naʼni mbá a̱jkhu̱ mbiʼi rí nitha kháñuu Dios, ga̱jma̱a̱ mbáa ángel niʼthúnʼ rí matha̱nʼ mi̱dxa̱ʼ. Mbá péñu, arasngúxu rí naʼthí Jeobá”. Pedro niriʼña̱a̱: “Rí xúgi̱ nakroʼoʼ rí Dios tsiraʼwíin xa̱bu̱, ikhaa nagruigúun xúgínʼ bi̱ gáʼnduun mbuyamajkuíí”. Pedro niʼsngúún mbaʼa ga̱jma̱a̱ numuu Jesús. Ikhú Cornelio ga̱jma̱a̱ bi̱ kuwa ikhí nindrigú xi̱ʼ kaʼwu ga̱jma̱a̱ nijngún iyááʼ.