GRAXE̱ RÍ NAXTIʼÑA̱A̱ NÁA BIBLIA

Náa numuu rí gíʼmaa muʼni ku̱ma̱a̱ rí nikháñu Jesús rá.

Mbóó nduʼ kuwa xa̱bu̱ bi̱ xúgíʼ raza ga̱jma̱a̱ kuwa gagi náa ku̱ba̱ʼ nuxi̱ʼ rí marigá ndawaa — Xú káʼnii gandoo gakuwaanʼ nda̱wa̱á rí nikháñu Jesús rá. (Isaías 25:8; 33:24)

Rí nikháñu Jesús ninindxu̱u̱ mbá rí nigiʼdoo itháan numuu, ga̱jma̱a̱ numuu rígi̱ xa̱bu̱ ma̱ndoo muguaʼdáá mbu̱júu̱ rí ninimbáti̱ga̱. Xa̱bu̱ tagumaa mu maʼni dí ra̱májánʼ, ní má rí maʼniuu nandii o makhañúu (Génesis 1:31). Mú, aʼkhá nito̱ʼo̱o̱ náa numbaaʼ ga̱jma̱a̱ numuu timbáa xa̱biya̱, Adán. Jesús nixnáximinaʼ mu maʼni káwáanʼ náa aʼkhá ga̱jma̱a̱ rí nakháñulú. (Atraxnuu Mateo 20:28 ga̱jma̱a̱ Romanos 6:23.)

Dios nisngájma rí nandoo kaʼyulúʼ wéñuʼ rí asndu nikuʼmaa A̱ʼdióo mu makhañúu náa tsu̱du̱u̱ Ku̱ba̱ʼ ga̱jma̱a̱ numulúʼ (1 Juan 4:9, 10). Jesús niʼthún xa̱bi̱i̱ rí muniku̱ma̱a̱ rí nikháñu ga̱jma̱a̱ mbá chíʼgíʼ pan ga̱jma̱a̱ vino. Rí muʼni rígi̱ mámbá tsiguʼ nindxu̱u̱ mbá rí xú káʼnii ma̱ndoo maraxna̱a̱ núma̱aʼ Dios ga̱jma̱a̱ náa A̱ʼdióo numuu rí nisngajma rí nandún kuyulúʼ. (Atraxnuu Lucas 22:19, 20.)

Tsáa gíʼmaa mikhu pan ga̱jma̱a̱ maga̱a̱n vino rá.

Timbá miʼtsú rí Jesús niʼthún xa̱bi̱i̱ muniku̱ma̱a̱ rí nikháñu, niʼthún ga̱jma̱a̱ numuu mbá rí nimbánuu (Mateo 26:26-28). Rí nimbánuu rígi̱ nimbaʼtoo xóo mbá xkrugua mu ikhiin ga̱jma̱a̱ eʼwíínʼ xa̱bu̱ ma̱ndoo mani̱ndxu̱ún reyes ga̱jma̱a̱ ndxajkun gajmiún Jesús mekhuíí. Mbaʼin wéñuʼ xa̱bu̱ muniku̱ma̱a̱ rí nikháñu Jesús mú nguéjmi̱i̱n dí ikhiin mu̱phu̱ pan ga̱jma̱a̱ muwa̱a̱n vino. (Atraxnuu Revelación 5:10.)

Naʼni a̱jma̱ míí tsiguʼ rí Jeobá xtáa raraʼwíin bi̱ mani̱ndxu̱ún reyes gajmiún A̱ʼdióo (Lucas 12:32). Itháan mbaʼin bi̱ makuwá náa tsu̱du̱u̱ Ku̱ba̱ʼ kíxniin bi̱ magúun mekhuíí. (Atraxnuu Revelación 7:4, 9, 17).

Á mu nandaʼ ma̱ta̱ya̱a̱ itháan. Atayáá rí eʼthí kíxnuu náa folleto Ajngáa rí májánʼ na̱ʼkha̱ náa Dios, rí nini bi̱ nutaraʼa numuu Jeobá

Ma̱ngaa rígá náa jw.org/jw-tln