Gajmañaaʼ marataráʼa májánʼ: Índo̱ naratá náa interfono

Ndíjkha rí gíʼdoo wéñuʼ numuu. Dí muʼtáraʼa náa interfono o intercomunicador [nindxu̱u̱ ajua̱nʼ dí gíʼmaa náa goʼwóo xa̱bu̱ mu maratamíjná ga̱jma̱ʼ], naʼni mamiñulúʼ dí muʼthá ikhí. Ndiéjunʼ gándoo gúʼni mu dí rígi̱ xáʼni rí muniʼñáʼ ruʼtáraʼa ga̱jma̱a̱ xúgíʼ a̱jkiu̱lú o ga̱jma̱a̱ gagi rá. Garmáʼáan a̱jkia̱nʼ rí tikhun xa̱bu̱ i̱ndó maguánu mudxawíín ajngáa rí májánʼ ga̱jma̱a̱ mbóo interfono (Rom. 10:14). Gajkhun má rí nguáná nindoo nijuiʼtaraʼa májánʼ wéñuʼ xúgi̱ kaʼnii (atayáá Anuario 2011, ináa 65 ga̱jma̱a̱ 66, ma̱ngaa Anuario 2000, ináa 54, kutriga̱ 3). Gi̱jyooʼ rígá tikhuu rí xóo ma̱ndoo matani.

Xú káʼnii gúʼni:

Atani májáánʼ mbá presentación rí xájyúuʼ wéñuʼ ga̱jma̱a̱ ataniraʼmáʼ mu ma̱ndoo matraxnuu índo̱ gárata náa interfono. Rígi̱ mambáyaʼ maʼni gakhii a̱jkia̱nʼ. Atagíʼdi̱i̱ marata̱ náa numuu dí xtaa ikhí. Aratháán ga̱jma̱a̱ mbiʼyuu xa̱bu̱ á mu nakujmaa náa interfono. Nákha xóó tsédxúuʼ, aratháán rí nandaʼ matatsiʼñáʼ mbá revista o i̱mba̱ i̱yi̱i̱ʼ. Aratháán rí ma̱ndoo maraxna̱a̱ o matatsiʼñáʼ náa xkrugoo.
Xáku̱ma̱ʼ rí xándoo matani. Atanduʼwá ga̱jma̱a̱ atani ñawáanʼ asndu xó má xtiejún raratámíjná ga̱jma̱ʼ xa̱bu̱.
Arathá xó má egu̱ʼwa̱nʼ tani ga̱jma̱a̱ xámiñaʼ. Atani rí mawán kaʼwu ga̱jma̱a̱ gakhii gárata. Xádxúʼ rañajún índo̱ gárata ga̱jma̱a̱ xárata nacha̱ wéñuʼ.
Atatsaʼwá májánʼ edxa̱ʼ dí gátani. Náa guʼwá mba̱ʼu̱ dí rígá mbóo interfono náa gíʼdoo mbaʼa timbre, mbáa itháan májánʼ gáʼni dí muʼdi̱i̱ a̱jma̱ o ajtsú timbre, guʼniraʼmáʼ ga̱jma̱a̱ guʼguaaʼ. Mbáa bi̱ kuwa ikhí mamiñún á mu nawanulúʼ mba̱yu̱ʼ wéñuʼ mu muʼdi̱i̱ mámbá timbre ndrígóo apartamento.

Atagíʼ matani rígi̱ rí mbá gu̱nʼ:

Náa nunigajmaa mbá guʼwíin guriyaʼ awan mu mutamijná xó má gúthi náa interfono mú xúyamijná bi̱ muni rígi̱.