Guʼtáraʼa ga̱jma̱a̱ xúgíʼ a̱jkiu̱lú rí gajkhun ga̱jma̱a̱ numuu Jesús

Á mu najmañulúʼ nuʼthúún eʼwíínʼ rí gajkhun ga̱jma̱a̱ numuu Jesús, maʼni rí muʼtáraʼa ga̱jma̱a̱ xúgíʼ a̱jkiu̱lú. Jesús nindxu̱u̱ xóo mbá itsí rí nigi̱ʼi̱ ginii kayuʼ náa phú ni̱ʼkha̱ rí ma̱ndoo muguaʼdáá fe (Efes. 2:20). Á mu raʼkháa ikhaa, xándoo makuwáanʼ kámuu mbiʼi (Hech. 4:12). Ikha jngó, gíʼdoo wéñuʼ numuu mbuʼyáá xúgiáanʼ dí Dios najmiuu Jesús mu maʼnimbánuu rí eyoo maʼni. Kiʼsngáa minduwaʼ ga̱jma̱a̱ numuu Jesús rí tséʼkha̱ náa Biblia, naʼni rí mbaʼin xa̱bu̱ majngawi̱i̱n ga̱jma̱a̱ asndu maʼni rí xakanun dí eʼthí Dios maxnún nda̱wa̱á bi̱ naguáʼdáá fe náa Jesús. Rí muʼtáraʼa ga̱jma̱a̱ xúgíʼ a̱jkiu̱lú rí gajkhun maxkaxáanʼ mumbañún xa̱bu̱ bi̱ májánʼ a̱jkiu̱ún mu maguánu mbuyáá xú kaʼnii phú gajkhun nindxu̱u̱ Jesús, dí xú káʼnii embáxu̱u̱ májánʼ ga̱jma̱a̱ Dios ga̱jma̱a̱ xú káʼnii eyambáá ikhaa mu mambanúu rí eʼthí maʼni Jeobá. Ikha jngó, guʼtáraʼa ga̱jma̱a̱ xúgíʼ a̱jkiu̱lú rí gajkhun ga̱jma̱a̱ numuu Jesús índo̱ gáʼni Conmemoración.