Ra̱ʼkhá tháán gíʼdoo numuu muʼni ga̱jma̱a̱ muñewa̱a̱n náa nagimbáanʼ

Maski ajndu ndiyóoʼ mbújkha̱a̱ ga̱jma̱a̱ niʼni mingíjyúuʼ mu magumaa templo náa Israel, xa̱bu̱ israelitas niñajunʼ ga̱jma̱a̱ gagi (1 Cr 29:2-9; 2 Cr 6:7, 8). Rí xú káʼnii niñawa̱a̱n templo nisngajma xóo embáxu̱u̱n gajmiún Dios (2 Re 22:3-6; 2 Cr 28:24; 29:3). Rí mbiʼi xúgi̱, ikháanʼ bi̱ ni̱ndxu̱lú cristianos najmulú mbiʼi ndrígúlú ga̱jma̱a̱ tsiakii mu muʼni ga̱jma̱a̱ muʼni kaʼwi̱i̱ ma̱ngaa muʼni̱i̱ náa nachúu guʼwá náa nagimbáanʼ ga̱jma̱a̱ náa naguaʼdáá Asambleas. Xúgíʼ rúʼko̱ nindxu̱u̱ mbá rí xóo mbuʼyamajkuíí Dios. Lá ragájkhun dí ra̱ʼkhá tháán májánʼ muñambáá gajmiúlú Jeobá xúgi̱ kaʼnii ráʼ. (Sl 127:1; Rev 7:15).

XÚ GÁNDOO GÚÑAMBÁÁ RÁ.

• 

  Gíʼmaa muʼni kaʼwi̱i̱ xúgíʼ índo̱ gájngoo reunión. Maski ajndu i̱ndó náa niguaʼún.

• 

  Gíʼdoo numuu muñambáá náa awan dí nigájnuu mu maguma kaʼwi̱i̱ ga̱jma̱a̱ miʼni̱i̱ náa nichúu guʼwá náa nagimbáanʼ. Á mu kúwi̱i̱n mbaʼin bi̱ muñambáá itháan ra̱mingíjyúuʼ miʼni ñajunʼ ga̱jma̱a̱ naguma itháan gagi (lv ináa 92 kutriga̱ 18).

• 

  Ma̱ndoo muxná donación. Jeobá nadxuu índo̱ nuxná mbújkha̱a̱ ga̱jma̱a̱ xúgíʼ a̱jkiu̱lú, maski ajndu “ajma mbuka ri lakin” dí na̱nguá gíʼdoo wéñuʼ numuu (Mr 12:41-44).

• 

  Á mu naʼngo̱o̱, ma̱ndoo muñambáá náa naguma ga̱jma̱a̱ náa miʼni̱i̱ guʼwá rí najmaa mu mbiʼyamajkuíí Jeobá. Mu matiembáá tséyóoʼ má majmañaaʼ matani guʼwá.