Muʼni dí májánʼ ga̱jma̱a̱ gamajkhu maʼga̱nú asndu náa a̱jkiu̱ún eʼwíínʼ

Índo̱ mbáa a̱ʼgu̱ bi̱ nanindxu̱u̱ xa̱bi̱i̱ Jeobá nasngájma rí májáanʼ a̱jkiu̱u̱n, rúʼko̱ gaʼni rí ajmbio̱o̱ magruigú rí gajkhun. Mbáa rígi̱ marigá nda̱wa̱á rí ninújngoo mbayuuʼ tsiguʼ rí ikhaa nigruigú mbaʼa xkujndu (1Pe 2:21-23; 3:1, 2). Á mu ikháán xtaa ratamíniiʼ wéñuʼ, gaʼngaaʼ, atani ga̱jma̱ʼ dí ra̱májánʼ índo̱ natani rí májánʼ (Ro 12:21). Xkri̱daaʼ ndrígáʼ ma̱ndoo mayambáá wéñuʼ ki xóo ajngáa dí naratá.

Atayáá májánʼ rí ndayóoʼ bi̱ ndiyáa (Flp 2:3, 4). Gaxmiéjuanʼ xtayáá ga̱jma̱a̱ gagáwiinʼ a̱jkia̱a̱nʼ ga̱jma̱a̱ atagíʼ matanimbaníí rí kaʼyaaʼ matani. Atadxawíín rí naʼtháanʼ (Snt 1:19). Gaʼngo̱o̱ a̱jkia̱a̱nʼ xtayáá bi̱ ndiya̱a̱ ma̱ngaa aratháán ga̱jma̱a̱ májánʼ. Maski ajndu ikhaa tséʼyamajkuaaʼ ga̱jma̱a̱ tsesngájma rí nandoo kaʼyaaʼ, mú Jeobá ndaʼyamajkuu wéñuʼ tsiakii rí ikháán natani mu maraxtaa má xúʼko̱ jmbu náa ikhaa (1Pe 2:19, 20).

NDA̱WA̱Á RÍ NITAYÁÁ VIDEO JEOBÁ NAMBÁYULÚ MU MAʼNGULÚ MURAʼNÍÍ XKUJNDU, ATRIʼÑA̱A̱ GRAXE̱ RÍGI̱:

• Xú káʼnii nixtáa Grace Li nákha ndiʼkhú ninújunʼ rá.

• Dí ni̱jkha̱ kayáa mú majmañuu rí gajkhun xá.

• Ndiéjunʼ rí nimbáyúu ndxájulú Li mu maʼngo̱o̱ maraʼnuu xkujndu nda̱wa̱á rí nijngúun iyááʼ xá.

• Ndiéjunʼ rí nindo̱ʼo̱o̱ Jeobá ndxájulú Li mú maʼni ga̱jma̱a̱ numuu ajmbio̱o̱ rá.

• Ndiéjunʼ rí májánʼ wéñuʼ nigruigú ndxájulú Li ga̱jma̱a̱ numuu rí nigiʼdoo gamajkuu ma̱ngaa rí ninindxu̱u̱ májáanʼ xa̱bu̱ xá.