Atatsíñáminaʼ rí Jeobá mambáyaaʼ índo̱ naratájkáan

Jeobá naʼni rí Ajngáa dí májánʼ maʼga̱nú asndu náa a̱jkiu̱u̱n xa̱bu̱ (1Co 3:6-9). Ikha jngóo á mu nandulú rí magajnúu májánʼ ñajunʼ rí kuaʼdáálu rí mbuʼñíinʼ xa̱bu̱, ndayóoʼ rí makumulú kuʼyáá Jeobá rí ikhaa má gámbáyulú ga̱jma̱a̱ mambáyúu bi̱ nuʼsngáá.

Arathá mbájmbu. Atanda̱ʼa̱a̱ Jeobá rí mambáyúu bi̱ narasngáá mu maʼngo̱o̱ maraʼnuu xkujndu xóo índo̱ tsíñún guyáá bi̱ kúwíin náa goʼwóo ga̱jma̱a̱ mu maʼngo̱o̱ maraʼnuu dí ikhaa narikhoo (Flp 1:9, 10). Atanda̱ʼa̱a̱ Jeobá rí maxnáaʼ ikha espíritu santo, náa xúgíʼ rí natatsaʼwáminaʼ ga̱jma̱a̱ rí natani (Lu 11:13). Aratháán xóo maʼtájkháan bi̱ narasngáá ga̱jma̱a̱ aratháán rí magíʼ maʼni. Aratájkáan gajmaaʼ ma̱ngaa atríyaʼ mbiʼyuu.

NDA̱WA̱Á RÍ NITAYÁÁ VIDEO RÍ MUʼSNGÚÚN XA̱BU̱ NAʼNI RÍ MAKUWÁANʼ GAGI. GUNIʼÑÁÁʼ RÍ JEOBÁ MAMBÁYULÚ: MUʼTÁJKÁAN, ATRIʼÑA̱A̱ GRAXE̱ RÍGI̱:

• Ndiéjunʼ rí ndiyóoʼ maʼngo̱o̱ Rita índo̱ naʼnigajmaa jma̱a̱ Coral xá.

• Xú káʼnii nimbáyúu Rita dí naʼthí náa 1 Corintios 3:6 rá.

• Ndiéjuunʼ niʼni Rita mu mambáyúu Coral rá.