Hulda nigiʼdoo rí nindoo

Á mu ikháánʼ nidxu̱ʼ náa mbá chíʼgíiʼ isla rí mbiʼyuu Sangir Besar (Indonesia) nákha nguáthá tsiguʼ wapháá, mbáa mataxkamiin mbá ajtsíin a̱ngiu̱lú gu̱ʼu̱ náa playa. Xa̱bu̱ bi̱ kúwá náa isla rúʼko̱, nduñún a̱ngiu̱lú bugi̱ xóo bi̱ numbáñún eʼwíinʼ mu majmañún rí naʼthí náa Biblia, mu na̱nguá etaraʼa náa playa. Á mu xúʼko̱ ndiéjunʼ eni̱ xá.

Ginii rí nuni̱, najngún náa lamáa nduya̱ʼ itsí mba̱ʼu̱ xóo mba̱a̱ pelota dí fúbol wáa káʼnii, nurawíi asndu náa rawuunʼ playa. Nda̱wa̱á natri̱gi̱i̱n náa mbá chíʼgíiʼ xílí ixi̱ ga̱jma̱a̱ nutáá itsí rúʼko̱ ga̱jma̱a̱ martillo rí asndu naʼni itháán chíʼgíiʼ xóo mbá xndú. Nda̱wa̱á nurajthi̱i̱ náa mbá balde ga̱jma̱a̱ nutsimáán náa escalera rí maguáanʼ asndu náa guʼwún. Nurajxi̱i̱ itsí náa mbá guxta̱a̱ mba̱a̱. Nda̱wa̱á kayuuʼ nguáthá carro na̱jkha̱ kagu̱u̱ guxta̱a̱ rúʼko̱, ga̱jma̱a̱ najmúún itsí náa muni carretera.

Mbáa dí ikhaa ndxájulú a̱ʼgu̱ bugi̱ mbiʼyuu Hulda. Ikhaa nañajunʼ itháán náa playa ki xóo eʼwíinʼ a̱ngui̱i̱n. Rí mbújkha̱a̱ rí nada̱a̱ʼ ga̱jma̱a̱ numuu rí nagujua̱ itsí, nambáñúún bi̱ kúwá náa goʼwóo. Mú rí xúgi̱ nandoo majmuu mbújkho̱o̱ mu ma̱ʼtsi̱ i̱mba̱: Mbá tablet mu xúʼko̱ ma̱ndoo mato̱ʼo̱o̱ náa JW Library^®. Hulda ndaʼyoo rí video ga̱jma̱a̱ i̱ʼwáʼ rí na̱ʼkha̱ náa aplicación rúʼko̱, mambáyúu mu maʼtáraʼa itháán májánʼ ga̱jma̱a̱ mikro̱ʼo̱o̱ dí naʼthí náa Biblia.

Náa mbá gu̱nʼ tikhu, Hulda niñajunʼ a̱jma̱ hora xúgíʼ miʼcha̱. Itsí rí ikhaa niʼngo̱o̱ niʼthóo niʼni majthíí náa mbá carro chíʼgíiʼ. Xúʼko̱ káʼnii niʼni rí niʼngo̱o̱ niʼtsi mbá tablet.

Huldá naʼthí: “Gajkhun má dí niʼni néʼngo̱ʼ ga̱jma̱a̱ nagúnʼ numuu dí nithóo itsí. Mú índo̱ niʼngo̱o̱ nitsi tablet ga̱jma̱a̱ ndi̱yo̱o̱ rí ma̱ndoo majmuʼ mu xúʼko̱ ma̱ndoo mataráʼaʼ itháán májánʼ ga̱jma̱a̱ manirataminaʼ reunión, xúʼko̱ nimbumaaʼ dí nagúnʼ”. Ma̱ngaa niʼthí dí tablet nimbáyúu wéñuuʼ índo̱ niʼni nandii, numuu rí xúgíʼ ñajunʼ ndrígóo Dios dí nuʼni náa congregación, nuʼni náa zoom. ¡Nadxulú wéñuuʼ dí Hulda nigiʼdoo dí ikhaa nandoo!