Lá natayáá má ráʼ.

Díí eni̱ ndxajkun ga̱jma̱a̱ eʼdiún xujkhúʼ bi̱ nuxnaxi̱i̱n náa templo nákha timbá siglo rá.

MÁMBÁ tsiguʼ ndxajkun bi̱ nikúwá náa Israel, ra̱ʼkhá tháan mbaʼin xujkhúʼ exnajxi̱i̱n xóo tsigijñaʼ náa altar ndrígóo templo. Xó má eʼthí Josefo bi̱ ndiʼyoo xóo nirígá nákha siglo timbá, dí i̱ndó náa ndxa̱a̱ pascua najuixnájxi̱i̱n itháan dí 250,000 mugu̱. Ikha jngóo ra̱ʼkhá tháan mba̱ji̱nʼ eʼdi egadíí (Lev. 1:​10, 11; Núm. 28:​16, 19). Náá enii xúgíʼ eʼdi rúʼko̱ xá.

Bi̱ ninigajma̱a̱ dí nirígá nákha wajyúuʼ niguánú ndiyáá dí náa templo ndrígóo Herodes, dí nirígá nákha tsiguʼ 70 dí niguma gámbáa, gíʼdoo náa na̱jkha̱ kúʼúun iyaʼ. Nakujmaa dí rígi̱ nijmaa mu maʼga eʼdi ga̱jma̱a̱ magadíí mitsínguánʼ.

Guʼyáá a̱jma̱ dí nijmaa mu maguma kaʼwi̱i̱ náa nixnajxi̱ tsigijñaʼ:

• Nirígá iñáʼ náa níjñúu rí nixnajxi̱ tsigijñaʼ. Náa Misná (mbá libro wayuu náa nixtagijxi̱i̱ xúgíʼ xtángoo ga̱jma̱a̱ rí nuni̱ judíos, dí nigumarámáʼ nda̱wa̱á dí tsiguʼ 200) ikhí naʼthí dí nirígá a̱jma̱ iñáʼ náa mbá esquina náa rí nixnajxi̱ tsigijñaʼ: “Eʼdiún xujkhúʼ ga̱jma̱a̱ iyaʼ dí najmaa mu mujñáa náa rí nixnajxi̱ tsigijñaʼ najkha̱a̱ náa iñáʼ ga̱jma̱a̱ nagadíi asndu náa mata dí rígá náa Cedrón” (rí niʼtájuíi Carlos del Valle).

  Dí naʼthí náa Misná ga̱jma̱a̱ numuu iñáʼ (dí nirígá náa mijngii rí nixnajxi̱ tsigijñaʼ) nambríguii ga̱jma̱a̱ dí nixka̱ma̱a̱ bi̱ nuniga̱jma̱a̱ dí nirígá nákha wajyúuʼ. Mbá libro náa na̱ʼkha̱ raʼthí xóo nikúwá judíos, ikhí naʼthí dí bi̱ nuniga̱jma̱a̱ dí nirígá nákha wajyúuʼ nixka̱ma̱a̱ dí náa mijngii templo “rígá náa na̱jkha̱ kúʼúun iyaʼ”. “Mbáa rígi̱ nijmaa mu magadíi eʼdi ga̱jma̱a̱ iyaʼ”. (Libro The Cambridge History of Judaism).

• Nirígá mbaji̱ʼ iyaʼ. Ndxajkun ndiyóoʼ majmúún mbaji̱ʼ wéñuuʼ iyaʼ mu mujñáa níxtuun náa nuxnajxi̱ tsigijñaʼ ga̱jma̱a̱ mu muni̱ kaʼwi̱i̱ náa na̱jkha̱ kúʼúun iya tsaga. Iyaʼ dí najmún ndxajkun na̱ʼkha̱ náa Jerusalén, mu ma̱ndoo maʼga̱nú asndu náa nuxnajxi̱ tsigijñaʼ nijmún ragiyaʼ ga̱jma̱a̱ i̱ʼwáʼ náa na̱jkha̱ kúʼúun iyaʼ, ikha jngóo nirígá má xúʼko̱ iyaʼ dí majmúún. Joseph Patrich bi̱ naʼniga̱jma̱a̱ dí nirígá nákha wajyúuʼ, niʼthí: “I̱ndó náa templo rígi̱ ninindxu̱u̱ náa nirígá mbaji̱ʼ iyaʼ ga̱jma̱a̱ nirígá náa nigadíi iya tsaga”.