Atayáá á mu gajkhun

Dí narígá

Mbaʼa nuthu nuthi dí ragájkhun ikha jngó mbaʼin xa̱bu̱ nundxa̱ʼwa̱a̱ edxu̱ún dí raʼkhí ga̱jma̱a̱ numún eʼwíinʼ. Mbá xkri̱da:

Tikhun bi̱ kuya̱ edxu̱u̱ náa ñajunʼ nakumu̱ún rí gu̱ʼu̱ xájmiin gúni májánʼ ñajunʼ, náa ndayóoʼ tsiakii o náa ndayóoʼ majmúún májánʼ edxu̱ún.
Bi̱ nazis nini tsu̱di̱i̱n judíos rí ikhiin nirajkua̱a̱ thana náa puzu rí kajni̱ʼ iyaʼ mu muni marigá nandii.
Mbaʼin xa̱bu̱ nakumu̱ún rí kúwá ngíná ga̱jma̱a̱ rí nakiʼníin má xúʼko̱ bi̱ ni̱ndxu̱ún chíjmáa, bi̱ tsedxawíín, bi̱ tségún o bi̱ guaʼdáá i̱ʼwáʼ nandii.

Bi̱ nunimbu̱ún eʼni ajngáa xóo rúʼko̱ nakumu̱ún dí gajkhun má nindxu̱u̱ xóo nundxaʼwamíjná, ma̱ngaa nuthi rí bi̱ nuni gaʼduunʼ ajngáa rúʼko̱ nuthi rí tséyáá mbá kayuʼ.

Ikha rí na̱ʼkha̱ náa Biblia

“Ra̱májánʼ nindxu̱u̱ dí mbáa xa̱bu̱ xágiʼdoo ku̱ma̱” (PROVERBIOS 19:2).

Ndiéjunʼ eyoo gáʼthúu̱n rá. Á mu na̱nguá eʼyáá xúgíʼ dí gajkhun, muʼni dí rakáʼyoo. Á mu na̱nguá eʼyáá xóo phú nindxu̱u̱ i̱ndó má nuʼnimbulú dí nuthíí xa̱bu̱ maʼni rí mundxa̱ʼwa̱a̱ dí raʼkhí edxu̱lúʼ ga̱jma̱a̱ numún eʼwíinʼ.

Naʼthí náa Biblia rí gíʼmaa mundxaʼwamíjná dí raʼkhí xóo kiexu̱u̱n xa̱bu̱ ráʼ.

Tikhun nuthi rí náa Biblia naʼthí rí gíʼmaa mundxaʼwamíjná dí raʼkhí xóo kiexu̱u̱n xa̱bu̱. Mú, ndiéjunʼ phú eʼthí náa Biblia rá.

Xúgiáanʼ ikháanʼ mbóó má náa niguwaʼlu. Dios “niʼnii mbáwíi xa̱bu̱ rí maruiʼti̱i̱n mbá xúgínʼ xa̱bu̱ mu makuwá náa xúgíʼ tsu̱du̱u̱ ku̱ba̱ʼ” (Hechos 17:26).
Dios nandoo kaʼñún xúgínʼ. “Dios tsiraʼwíin xa̱bu̱, ikhaa nagruiguíin bi̱ namiñun kuyáá ga̱jma̱a̱ bi̱ nuni rí májánʼ, tséʼniuu asndu náá má xuajñún” (Hechos 10:34, 35).
Dios ndaʼyoo xóo phú ni̱ndxu̱ún raʼkháa xóo kujmiin rí mbajníí. “Xa̱bu̱ i̱ndó ndaʼyoo rí inuu, mu Jeobá ndaʼyoo a̱jkiu̱u̱n” (1 Samuel 16:7).a

a Náa Biblia naʼthí rí Dios mbiʼyuu Jeobá.

Xóo nayambáá ma̱ta̱ya̱a̱ dí gajkhun

Índo̱ nuniʼnííʼ gajkhun mbáa xa̱bu̱, xúʼnimbulu índo̱ nuthi rí mindu̱wa̱ʼ ga̱jma̱a̱ numuu ikhaa. Índo̱ najkuánú nduʼyáá dí ragájkhun nindxu̱u̱ dí nithi numún tikhun xa̱bu̱, rúʼko̱ gáʼni dí xúʼnimbulú nacha̱ índo̱ nuthi dí raʼkhí ga̱jma̱a̱ numún eʼwíinʼ.

Xkri̱da ndrígu̱ún tikhun: Yovitsa (Sureste ndrígóo Europa)

Yovitsa, bi̱ niʼthá náa artículo ginii, ikhaa niʼdxawuun má xúʼko̱ asndu nákha chíʼgíʼ dí nithi xa̱bu̱ bi̱ kúwá náa mijngii xtáa, rí nithi náa tele dí raʼkhí ga̱jma̱a̱ numún xa̱bu̱ bi̱ tsíñún gúñún. Ikhaa naʼthí. “Ikhúún nindxaʼwamínaʼ dí raʼkhí ga̱jma̱a̱ numún ga̱jma̱a̱ asndu niwiyuʼ kañun xa̱bu̱ buʼko̱. Niku̱mu̱ʼ rí kaʼyoo má madxaʼwamínaʼ xúʼko̱ ga̱jma̱a̱ numún”.

“Mú nákha ninindxu̱ʼ soldado ndiyóoʼ maxtáá gajmíi̱n ikhiin. Mañu ni̱jkhá raniʼniunʼ. Asndu nigíʼdu̱u̱ nijmañuʼ ajngún ga̱jma̱a̱ madxawun ajmúú dí nanigu̱u̱nʼ mudxawíín ikhiin. Niniguʼ maxtáá gajmíi̱n ikhiin ikhú ni̱jkha̱ raxtiʼkhuu xóo nidxaʼwamínaʼ ga̱jma̱a̱ numún ikhiin. Migamíi maʼni rí matatsaʼwamínáʼ mbu̱júu̱ dí raʼkhí ga̱jma̱a̱ numún eʼwíinʼ. Ikha jngó na̱nguá e̱yo̱o̱ noticia náa nuta numún ikhiin ni má na̱nguá eyoo película o i̱ʼwáʼ náa nuta numún ikhiin. Ikhúún nda̱yo̱o̱ dí índo̱ natatsaʼwáminaʼ dí raʼkhí ga̱jma̱a̱ numún eʼwíinʼ maʼni dí makiʼnán ga̱jma̱a̱ dí mawiyaaʼ xtañún”.

Rí ma̱ndoo matani

Xáta̱ya̱a̱ rí xúʼko̱ ni̱ndxu̱ún xúgínʼ. Maski ajndu nuthi dí raʼkhí ga̱jma̱a̱ numún tikhun bi̱ kúwá náa mbá xuajen, raʼkháa rúʼko̱ eyoo gáʼthí rí xúgínʼ ni̱ndxu̱ún xúʼko̱.
Atatsaʼwáminaʼ rí na̱nguá má tayáá xúgíʼ ga̱jma̱a̱ numún eʼwíinʼ.
Atayáá náa naʼthí dí gajkhun mu ma̱ta̱ya̱a̱ xóo phú nindxu̱u̱.