Gambaxáʼ gajmiáanʼ xúgínʼ

Dí narígá

Á mu tsíyulú mambájxu gajmiúlú bi̱ nundxa̱ʼwáá edxu̱lúʼ dí raʼkhí ga̱jma̱a̱ numún, maʼni dí xáʼndulú guʼñún nditháan. Á mu nambájxu gajmiúlú i̱ndó bi̱ ni̱ndxu̱ún xóo ikháanʼ, maʼni makumulúʼ dí xóo nundxa̱ʼwa̱míjna̱, dí nakumulú ga̱jma̱a̱ dí xóo nuʼni nindxu̱u̱ itháan májánʼ.

Ikha rí na̱ʼkha̱ náa Biblia

“Gurmbáʼtaa a̱jkia̱lá” (2 CORINTIOS 6:13).

Ndiéjunʼ eyoo gáʼthúu̱n rá. Ajngáa a̱jkiu̱lú ma̱ngaa nandoo gáʼthúu̱n xóo ni̱ndxu̱lú ga̱jma̱a̱ xóo eku̱mu̱lú. Á mu káaʼ nandulú kuʼñúún xa̱bu̱ bi̱ ni̱ndxu̱ún xóo ikháanʼ, maʼni rí xurmbáʼtaa a̱jkiu̱lú. Mu xagíʼnulú xúʼko̱, gíʼmaa mambáxulu gajmiúlú mixtiʼkuiin xa̱bu̱.

Rí nayambáá mataʼñíinʼ eʼwíinʼ bi̱ mambaxáʼ gajmiáanʼ

Índo̱ nuniʼníiʼ májánʼ mbáa, na̱jkuánu nakru̱ʼu̱lú itháan májánʼ xóo jnii. Ma̱ngaa índo̱ nugíʼdi̱i̱ nambájxu gajmiúlú nduʼyáá rí nindxu̱u̱ xó má ikháanʼ. Nandulú kuʼyáá itháan, ma̱ngaa índo̱ ikhaa xtáa gíná o xtáa gagi xúʼko̱ má kuwáanʼ mangáanʼ.

Guʼyáá xkri̱da ndrígóo Nazaré, ikhaa nákha ginii nindxa̱ʼwáminaʼ dí raʼkhí ga̱jma̱a̱ numún bi̱ naguwáʼ i̱mba̱ níʼkhá. Ikhaa naʼthí: “Nixtáá ga̱jma̱a̱ niñajunʼ gajmíi̱nʼ ikhiin mba̱yu̱u̱ʼ mbiʼi. Ikhú ni̱jkhánú niniʼniúúnʼ rí ni̱ndxu̱ún mixtiʼkuiin kayuʼ xóo nithu̱nʼ ga̱jma̱a̱ numún. Índo̱ nambáxa̱ʼ gajmiáanʼ xa̱bu̱ bi̱ naguwáʼ i̱mba̱ níʼkhá najmañaaʼ dí xárata numún ga̱jma̱a̱ naʼni rí maʼndaaʼ xtañún ma̱ngaa ma̱ta̱ya̱a̱ rí guaʼdáá numún”.

Rí ma̱ndoo matani

Ataniminaʼ maratamíjná gajmiáanʼ xa̱bu̱ bi̱ naguwáʼ i̱mba̱ xuajen, bi̱ mixtiʼkhu xóo kaʼniún o bi̱ nuthi i̱ʼwáʼ ajngáa. Náa numuu tsítani rígi̱ rá.

Arathún dí muthán ga̱jma̱a̱ numún.
Arathún magún guphiʼtsu ga̱jma̱a̱ nindxa̱a̱ʼ.
Atadxawíín dí gúthanʼ ga̱jma̱a̱ numún, ma̱ngaa atayáá ndiéjunʼ dí itháan gíʼdoo numuu eyáá ikhiin.

Á mu natagímináʼ makruaʼaʼ ndiéjunʼ niguaʼnii, makruaʼaʼ itháan xtañún ga̱jma̱a̱ rúʼko̱ gáʼni dí matriʼkui̱i̱ xóo ekuma̱a̱ʼ ga̱jma̱a̱ numún.

Xkri̱da ndrígu̱ún tikhun: Sookammah ga̱jma̱a̱ Kandasamy (Canadá)

“Ndijáanʼxu náa Sudáfrica nákhi nirígá apartheid. Xa̱bu̱ ndiyóoʼ makuwíin gajmiún i̱ndó bi̱ raza ndrígu̱ún. Rúʼko̱ niʼni dí nindxa̱ʼwa̱míjna̱ dí raʼkhí ga̱jma̱a̱ numún i̱ʼwáʼ raza. Na̱nguá kúwáanʼxu ga̱jma̱a̱ tséniguxu wáa gúñún xa̱bu̱ miʼxíin numuu rí ikhiin nuniuxu xóo bi̱ nditháan nda̱a̱ numún. Nákha ikhú nikumuxu rí ikháanʼxu na̱nguá endxa̱ʼwamíjna dí raʼkhí ga̱jma̱a̱ numún eʼwíinʼ, i̱ndó nikumuxu rí ikhiin nindxa̱ʼwa̱míjna̱ dí raʼkhí ga̱jma̱a̱ numuxu”.

“Mu muriʼkhui̱i̱ xóo nikumuxu, nigíʼdi̱i̱ nimbáxu gajmiúxu xa̱bu̱ bi̱ mixtiʼkhu náa eguwáʼ. Índo̱ nigíʼdi̱i̱ nimbáxu gajmiúxu̱ bi̱ miʼxíin, nijkuánu ndi̱ya̱a̱ di na̱nguá má mixtiʼkuáanʼxu wéñuʼ. Xúgiáanʼxu nuraʼníí ikháá má xkujndu ga̱jma̱a̱ kúwi̱i̱n xóo má ikháanʼxu”.

“Asndu nithu̱u̱nxu xa̱bu̱ gajmii bi̱ miʼxíin makuwá ga̱jma̱a̱ nindxuxu nguáthá mbayuuʼ. Nijkuánuxu niniʼnúnʼ májánʼ ga̱jma̱a̱ tájyúuʼ nimbáxuxu. Rúʼko̱ niʼni dí ní xundxaʼwamíjnaxu dí raʼkhí ga̱jma̱a̱ numún xa̱bu̱ bi̱ miʼxíin”.