Dios nakudaminaʼ maxná mbá Ku̱ba̱ʼ mitsaan

MBÁA xúgi̱ kaʼnii xkridoo ku̱ba̱ʼ rí Dios nisngájmuu gaʼyee Isaías. Isaías nixtáa nda̱wa̱á rí nixtáa Jonás.

Ku̱ba̱ʼ mitsaan nandoo gáʼthi “ixi̱ ri̱ʼi̱”. Lá naʼni marmáʼáan a̱jkia̱nʼ mbá rí nitayáá má gi̱i̱ ráʼ. Xúʼko̱, ixi̱ ri̱ʼi̱ mitsaan rí Dios niʼni náa maxtáa Adán ga̱jma̱a̱ Eva, lá ragájkhun ráʼ. Mú, lá marigá rígi̱ náa xúgíʼ tsu̱du̱u̱ Ku̱ba̱ʼ ráʼ.

Jeobá niʼthúu̱n Isaías gaʼyee ndrígóo rí maʼnirámáʼ rí xú káʼnii gaʼni ku̱ba̱ʼ mitsaan nuxi̱ʼ rí wíji̱ ma̱ʼkha̱ náa makuwá xa̱bu̱ xuajñu ndrígóo Dios. Niʼthí: ‹I̱ña̱ʼ ga̱jma̱a̱ mugu̱ makuwá mbá tsímáá xúgínʼ. E̱jín xédé ga̱jma̱a̱ león lájuíin muphiʼtsu mbá kambáxu̱u̱n, ga̱jma̱a̱ e̱ji̱n lájuíin muñewu̱u̱n. Asndu ada̱ lájuíin bi̱ gáʼtsíin náa mijngii kriga̱a̱ a̱bu̱nʼ mbiiʼ nda̱a̱ rí gágíʼnuu›.

Mbaʼin nuthi: ‹Mbáa xáʼga̱nú marigá xúʼko̱ kaʼnii. Narígá má xúʼko̱ dí ra̱májánʼ o tsingíná náa tsu̱du̱u̱ ku̱ba̱ʼ, ga̱jma̱a̱ marigá má xúʼko̱›. Mú, atatsaʼwáminaʼ, xú káʼnii ninindxu̱u̱ náa nixná Dios maxtáa Adán ga̱jma̱a̱ Eva rá.

Dios niʼni rí Adán ga̱jma̱a̱ Eva makuwá náa ku̱ba̱ʼ mitsaan. I̱ndó numuu dí túnimbu̱u̱n náa Dios ikha jngó ninimbáti̱ga̱ ku̱ba̱ʼ mitsaan náa makuwá, ga̱jma̱a̱ nigún raganuu, ikhú nikháñun. Dios nakudaminaʼ maxnún xa̱bu̱ bi̱ nandún kuyáá xúgíʼ rí niʼnimbáti̱ga̱ Adán ga̱jma̱a̱ Eva.

Náa nuxi̱ʼ ku̱ba̱ʼ mitsaan rí wíji̱ ma̱ʼkha̱, ní xárígá nimbá o nditháan dí raʼkhí o dí maʼni gachúu ku̱ba̱ʼ. Marigá káxi̱ rí tsímáá. Xúgínʼ xa̱bu̱ ní xuguaʼdáá nandii ga̱jma̱a̱ makuwá gagi xóo má nindoo Dios maʼni asndu nákha ginii. Nda̱wa̱á gájmañuluʼ xú káʼnii gaʼni Dios rígi̱.