Xuajñu Dios nagájnuu náa Babilonia

ITHÁÁN manújngoo a̱jma̱ tsiguʼ asndu nákha xa̱bu̱ medos ga̱jma̱a̱ xa̱bu̱ persas nitu̱ʼu̱u̱n gúxnamijná náa Babilonia. ¡Ga̱jma̱a̱ atayáá rí xtáa rarígá xúgi̱! Xúʼko̱, israelitas kuwa ragájnun náa Babilonia. Xú káʼnii nikáwíín rá. Tsáa niniñúúnʼ magúun rá.

Ciro, rey ndrígóo Persia niniñúúnʼ magúun. Mba̱yu̱ʼ tsiguʼ nákha xóó tsígumaa Ciro, Jeobá niʼni rí Isaías xa̱bu̱ gaʼyee ndrígóo maʼnirámáʼ rígi̱ ga̱jma̱a̱ numuu: ‹Matani̱ rí eyoʼ ikhúúnʼ matani̱. Maguanúu kambaʼta xkrugua mu ma̱ndoo mataʼaʼ maraxnamíjna ga̱jma̱a̱ xuajin›. Ga̱jma̱a̱ xúʼko̱ niʼni Ciro rí nito̱ʼo̱o̱ náa Babilonia. Mbruʼun nitu̱ʼu̱u̱n xa̱bu̱ medos ga̱jma̱a̱ xa̱bu̱ persas náa xuajin náa xkrugua rí niguanúu kambaʼta.

Mú Isaías xa̱bu̱ gaʼyee ndrígóo Jeobá niʼthí ma̱ngaa rí Ciro makuʼma maguma̱a̱ mbu̱júu̱ Jerusalén ga̱jma̱a̱ templo ndrígóo. Lá nixná rey Ciro xtángoo rígi̱ ráʼ. Xúʼko̱. Rígi̱ ñajunʼ rí niʼthún israelitas: ‹Guʼgua̱ náa Jerusalén, ga̱jma̱a̱ guni̱i̱ ikhí templo ndrígóo Jeobá Dios ndrígalaʼ›. Ga̱jma̱a̱ ikhaa rígi̱ rí nuni̱ israelitas.

Mú raʼkháa xúgínʼ israelitas bi̱ kuwa náa Babilonia nandoo nagún mitsinguánʼ wéñuʼ, rí asndu maguanu Jerusalén. Ra̱ʼkhá tháán mitsinguánʼ guanúu rí mi̱dxu̱ʼ, naʼni mbá 800 kilómetros, ga̱jma̱a̱ phú mbaʼin israelitas ra̱ʼkhá tháán má ñajúúnʼ xa̱bu̱ guanuu ga̱jma̱a̱ naʼniún nandii, ikhiin ní xáʼngu̱u̱n gágun. Ma̱ngaa rígá i̱ʼwáʼ numuu. Mú bi̱ tsegun, Ciro naʼthúún: ‹Guxnu̱u̱n plata, oro ga̱jma̱a̱ i̱ʼwáʼ regalo bi̱ gátangi̱i̱n muni̱i̱ Jerusalén ga̱jma̱a̱ templo›.

Ikha jngó israelitas bi̱ natangi̱i̱n náa Jerusalén nundrigú mbaʼa wéñuʼ regalo. Ma̱ngaa Ciro naxnún rayaʼ ga̱jma̱a̱ copas rí rey Nabucodonosor niguwíi náa templo ndrígóo Jeobá índo̱ niʼni gámbáa Jerusalén. Ra̱ʼkhá tháán mbaʼa rí nagún kudúún xa̱bu̱ xuajin.

Nda̱wa̱á rí a̱jkhu̱ igu̱nʼ má kuwa ragún náa kamba̱a̱, israelitas naguanu wapha náa Jerusalén. Ninújngoo má 70 tsiguʼ asndu nákha xuajin niguámbáa, ga̱jma̱a̱ nímba̱a̱ xa̱bu̱ nánguá niguanúu náa xuajin mba̱a̱. Mú maski ajndu israelitas nitangi̱i̱n náa xuajñún, muguaʼdáá mbiʼi gakhi̱i̱ wéñuʼ, xóo má mbuʼyáá.