Jesús naʼsngáa náa mbá kúbá

ATAYÁÁ Jesús gíiʼ gi̱i̱. Xtáa raʼsngúún xúgínʼ xa̱bu̱ bugi̱ náa mbá kúbá ndrígóo Galilea. Bi̱ trigi̱i̱n mijngii náa gíiʼ ikhaa, ñajúnʼ discípulos ndrígóo. Ikhaa niraʼwíín náa ikhiin mbá 12 bi̱ manindxu̱ún apóstoles. Apóstoles ñajúnʼ discípulos kiejunʼ ndrígóo Jesús. Lá natayáá xú káʼnii mbiʼñún xáʼ.

Ikhiin nagumbiʼñún Simón Pedro ga̱jma̱a̱ Andrés bi̱ ñajúnʼ ka̱nikhiin. Santiago ga̱jma̱a̱ Juan, mangiin ñajúnʼ ka̱nikhiin. Ma̱ngaa xtáa imba̱a̱ apóstol bi̱ nagumbiʼyuu Santiago, ga̱jma̱a̱ xtáa imba̱a̱ bi̱ nagumbiʼyuu Simón. Kuwa a̱jmi̱i̱n apóstoles bi̱ nagumbiʼñún Judas. Mbáa ñajunʼ Judas Iscariote, ga̱jma̱a̱ xtáa imba̱a̱ Judas bi̱ najmaʼniiʼ xóo Tadeo. Ma̱ngaa xtáa Felipe ga̱jma̱a̱ Natanael (bi̱ najmaʼniiʼ xóo Bartolomeo), ma̱ngaa xtáa Mateo ga̱jma̱a̱ Tomás.

Nda̱wa̱á rí nigájni̱i̱n náa Samaria, Jesús nagíʼdu̱u̱ naʼtaraʼa timbá nutu: ‹Reino bi̱ xtáa mekhuíí ni̱ʼkha̱nú má›. Lá natayáá tsáa ñajunʼ reino buʼko̱ ráʼ. Ikhaa ni̱ndxu̱u̱ phú gajkhun Xa̱bu̱ Ñajunʼ ndrígóo Dios. Jesús ñajunʼ rey ndrígóo. Ikhaa gáʼtañajunʼ asndu mekhuíí ga̱jma̱a̱ ma̱ʼkha̱ kayóo rí tsímáá náa tsu̱du̱u̱ Ku̱ba̱ʼ. Reino ndrígóo Dios maʼni̱i̱ xúgíʼ numbaaʼ mbá Ku̱ba̱ʼ mitsaan.

Gi̱i̱ Jesús xtáa raʼsngúún xa̱bu̱ ga̱jma̱a̱ numuu reino. Ikhaa naʼthí: ‹Xúgi̱ gíʼmaa mutajkháanla. Anaxo rí xtaa mekhuíí, gaguma mba̱a̱ nambiʼyaʼ. Ga̱ʼkha̱ rí naratáñajunʼ. Gambanúu xóo rí nandaʼ ikháánʼ, xóo má rí nambánuu mekhuíí, xúʼko̱ má gambánuu náa tsu̱du̱u̱ Ku̱ba̱ʼ gi̱i̱ ma̱ngaa›. Mbaʼin xa̱bu̱ nuxna mbiʼí tsajkhun rígi̱ ‹Rí niʼtájkháan Señor›. Eʼwíínʼ nutháán ‹Padrenuestro›. Lá ma̱ndoo marata̱ xúgíʼ ráʼ.

Jesús ma̱ngaa xtáa raʼsngúún xa̱bu̱ rí xú káʼnii gíʼmaa manindxu̱ún gajmiún eʼwíínʼ. Naʼthí: ‹Ataniu̱u̱n eʼwíínʼ xóo rí nandaʼ muniaʼ ikháánʼ›. Lá tsínigua̱ʼ índo̱ nuniaʼ rí májánʼ eʼwíínʼ ráʼ. Ikha jngó gíʼmaa rí manindxu̱lúʼ májánʼ xa̱bu̱ náa eʼwíínʼ. Lá ragájkhun dí ra̱ʼkhá tháán májánʼ gaʼni náa tsu̱du̱u̱ Ku̱ba̱ʼ mitsaan índo̱ xúgínʼ xa̱bu̱ guni rígi ráʼ.