Náa mbá cuarto rí kúgoo

NDA̱WA̱Á rí Pedro ga̱jma̱a̱ Juan nagájni̱i̱n náa iñaʼ rí nijnguáan Jesús, María naguanúu mbáwíi ikhí ga̱jma̱a̱ nagíʼdu̱u̱ nambiyaʼ. ¡Ikhú nayexi náa awúun iñaʼ ga̱jma̱a̱ ndaʼñún a̱jmi̱i̱n ángeles! Ikhiin nuraxi̱i̱: ‹Náa numuu rí natambiyaʼ rá.›

María nariʼña: ‹Nigún ku̱ya̱a̱ Señor ndrígóʼ, ga̱jma̱a̱ tséyóo náa nigún gúniñaʼ›. Ikhú natanga̱a̱ ga̱jma̱a̱ ndaʼyoo mbáa xa̱biya̱. Ikhaa naraxu̱u̱: ‹Tsáa tayáaʼ rá.›

María nakumu̱u̱ rí xa̱biya̱ buʼko̱ ñajunʼ jardinero bi̱ ni̱jkha̱ kayáa Jesús. Ikha jngó naʼthúu̱n: ‹Á mu rí ikháánʼ ni̱dxu̱ʼ jcháa, arathun náa ni̱dxu̱ʼ gátatsiʼñánʼ›. Mú xa̱biya̱ bugi̱ nindxu̱u̱ Jesús. Ikhaa nánguá nindxu̱u̱ xóo nákha ginii ikha jngó María nánguá niʼni nuwiinʼ. Mú índo̱ ikhaa naʼthúu̱n ga̱jma̱a̱ nambiʼyuu, María ndaʼyoo rí ikhaa nindxu̱u̱ Jesús. Ikhaa nagáyúu mu maʼthúún discípulos: ‹¡Ndi̱yo̱o̱ Señor!›.

Ikhaa má mbiʼi rúʼko̱ índo̱ rí a̱jmi̱i̱n discípulos kuwa ragún náa xuajin lájuíin rí nagumbiʼyuu Emaus, mbáa xa̱biya̱ naxkamiin náa kamba̱a̱. Discípulos kuwa gíná wéñuʼ numuu rí nikháñu Jesús. Mú nákha kuwa ragún, xa̱biya̱ bugi̱ naʼthúún mbaʼa rí xtáa raʼthí náa Biblia ikhú ikhiin naʼni̱i̱n a̱jkiún. Nda̱wa̱á kayuʼ, índo̱ ikhiin nawajun mu muphiʼtsu, nájmi̱i̱n discípulos nduyáá rí xa̱biya̱ bugi̱ nindxu̱u̱ Jesús. Ikhú Jesús nánguá kujmaa, ga̱jma̱a̱ ikhiin natangi̱i̱n náa xuajin Jerusalén mu mutún apóstoles.

Nákha xtáa rarígá rúʼko̱, Jesús nasngájmaminaʼ náa Pedro ma̱ngaa. Eʼwíínʼ apóstoles nakuwa gagi wéñuʼ índo̱ nudxun rígi̱. Ikhú nájmi̱i̱n discípulos buʼko̱ nagún náa xuajin Jerusalén ga̱jma̱a̱ ikhí exkamiin apóstoles. Nutún rí Jesús nisngájmaminaʼ náa kamba̱a̱. Índo̱ ikhiin kuwa ruti rígi̱, lá natatsaʼwáminaʼ ndiéjunʼ ñajunʼ dí narígá ráʼ.

Atayáá náa kiʼniriyaʼ. Jesús nasngájmaminaʼ náa cuarto, maski ajndu kúgoo xkrugua. ¡Ra̱ʼkhá tháán kuwa gagi discípulos! ¡Ra̱ʼkhá tháán májánʼ dí nirígá nákha ikhú! Rí xúgi̱, lá ma̱ndoo matraxnuu nguáthá nutu nisngájmaminaʼ Jesús ráʼ. Lá witsu nutu ráʼ.

Apóstol bi̱ nagumbiʼyuu Tomás na̱nguá xtáa gajmíi̱n eʼwíínʼ discípulos índo̱ Jesús nasngájmaminaʼ. Ikha jngó, discípulos nutháán: ‹¡Ndiya̱a̱xu Señor!›. Mú Tomás naʼthí rí ndayóoʼ mbaʼyoo ikhaa mu maʼnimbo̱o̱. Migiñuʼ mbiʼi nda̱wa̱á discípulos kuwa mbu̱júu̱ náa mbá cuarto dí kúgoo, rí xúgi̱ Tomás xtáa ikhí. Mbá nacha̱ Jesús nakujmaa ikhí. Rí xúgi̱ Tomás naʼnimbo̱o̱.