Kíxnuu 9

Xa̱bi̱i̱ Dió giʼdo rí manindxu̱u̱n mikaʼwun

Ndíjkha giʼmáanʼ makuwanʼ mikaʼwu ga̱jma̱a̱ xúgíʼ rí gu̱ʼni̱. (1)

Ndíí eyoo gaʼthi rí makuwanʼ mikaʼwu rí xú mbuʼyamajkuí Dió. (2)

Rí xú eʼni manindxu̱u̱ kaʼwu. (3)

Rí nuʼtháán a̱jkiu̱lúʼ manindxu̱u̱ kaʼwu rá. (4)

Rígáá rí makuwanʼ kaʼwu. (5)

Náa la biʼyaa ajngáa dí ragiʼmaa muʼthá rá. (6)

1. Jeobá Dió nindxu̱u̱ mikaʼwii. Ikhaa giʼthu̱u̱n rí xa̱bi̱i̱ manindxu̱u̱n mikaʼwun rí xú mbuyamajkuí, rí guni, mundxaʼwamijna̱ rí kaʼwu, ga̱jma̱a̱ rí xú mukuwíín (1 Pedro 1:16). Muʼni mbá sieki̱i̱ wéñuʼ mú makuwanʼ má xúʼkhii̱n mikaʼwanʼ náa iduu Dió. Kuwánʼ náa mbó numbaa xkawiʼ. Ikhaa má mangoo, kuaʼda xkujndu dí raʼkhí rí najma̱a̱ náa ikháanʼ dí nuʼnimijna̱ gajmiulúʼ. Mú ragiʼmaa muʼniskidimijná.

2. Mikaʼwu rí mbuʼyamajkuí Dió: Ámu nandulúʼ muʼni ñajunʼ Jeobá, nangua xú mura̱jtu̱mijná ná nimbáá kiʼsngáá, kustumbre ndrigóó kamba̱a̱ dí ragajkhun. Kuaʼda rí magajnáanʼ náa kamba̱a̱ rí tseʼsngáá gajkhun mangoo ajndu nimbá chiʼgi̱ʼ má xumbayíí (2 Corintios 6:14-18; Rí huasjŋgajma Juan 18:4). Ámu najmañulúʼ rí gajkhun ga̱jma̱a̱ numuu Dió, giʼmáanʼ muñeumijna̱ mú xuninduwánʼ bí nusngáá dí ragajkhun (2 Juan 10, 11).

3. Rí xú eʼni ganindxu̱u̱ mikaʼwu: Jeobá nandoo rí xa̱bi̱i̱ ikhaa manindxu̱u̱n xó kristiano gajkhun xúgíʼ mbiʼi (1 Pedro 2:12). Ikhaa ndaʼyoo xúgíʼ rí eʼni, ajndu rí nuʼni nguʼwáa (Hebreos 4:13). Ragiʼmáanʼ muʼni rí xkawiʼ ajndu ma eʼwáʼ dí tsejmaa náa numbaa rígi̱ (1 Corintios 6:9-11).

4. Mikaʼwu gundxaʼwá edxulúʼ: Ámu nuʼni majtíí edxulúʼ ku̱ma̱ dí kaʼwu, xúgíʼ rí gu̱ʼni̱ manidxu̱u̱ kaʼwu (Filipenses 4:8). Ámu nundxaʼwáa edxulúʼ má xúʼkhii̱n rí xkawiʼ wéñuʼ, ajndu maʼgakaguanʼ muʼni dí raʼkhí (Mateo 15:18-20). Kuaʼda rí muʼnigaʼduun xúgíʼ rí nakujmaa rí maʼni tsagoo edxulúʼ. Ámu nuʼniga̱jma̱a̱ Ajngáa raunʼ Dió, muʼni majtíí edxulúʼ ga̱jma̱a̱ ku̱ma̱ rí kaʼwu.

5. Mikaʼwu rí xú mukuwan: Ikháanʼ rí kristiano ñajunluʼ rí nuʼni xtiʼkuriyaaʼ Dió, kuaʼdaluʼ rí makuwanʼ mikaʼwu náa xuyuluʼ xó má náa xtiñulúʼ. Giʼmáanʼ mujñáa ñawunluʼ ámbá nijkua gumixulúʼ mangoo nákha xó tsephiʼtsu, nákha xó tserugualuʼ ganitsu. Ámu guʼwá náa kuwánʼ nda̱a̱ náa muʼgua gumixulúʼ, guʼdu rí nimixulúʼ (Deuteronomio 23:12, 13). Xaʼniulu wéñuʼ nandii ámu rí nakuwanʼ mikaʼwu. Guʼún kristiano giʼdo rí marigá mikaʼwu mangoo xarigá katoo ajndu má awu̱u̱n xó má rexa̱a̱. Giʼmín rí mugi̱ʼ mbóó xkrida májánʼ náa xuajñún.

6. Rí guʼtá manindxu̱u̱ mikaʼwu: Xa̱bi̱i̱ Dió giʼmín muti má xúʼkhii̱n rí gajkhun. Bí mixtujtiin xataʼan náa Reino ndrigóó Dió (Efesios 4:25; Rí huasjŋgajma Juan 21:8). Bí kristiano tsethi ajngáa xkawiʼ. Tsedxuun ajndu má tsethi ajngáa mbi̱ji̱ rí tsejmaa. Núkhu kujmiin májánʼ náa eñajunʼ, náa guʼwá kiʼsngáá, xúʼkhii̱n má náa xujñún numuu rí ajngáa mikaʼwu eti (Efesios 4:29, 31; 5:3).

[Xtiʼkhu rí na̱ʼkha̱ náa ináa 18 ga̱jma̱a̱ 19]

Xa̱bi̱i̱ Dió giʼmín makuwíín mikaʼwu ga̱jma̱a̱ xúgíʼ rí guni