Kíxnuu 6

¡Rígá mijngii ku̱ba̱ʼ mitsaan!

Xúgíʼ rí xtáa raríga̱ tsu̱du̱u̱ numbaa nasngájma rí ku̱ba̱ʼ mitsaan rígá mijngii. Biblia niʼthi ajndu nákhi wajiuʼ rí mbuʼyáa mbiʼi miʼskhaa índo̱ ku̱ba̱ʼ mitsaan wi̱ji̱ ma̱ʼkha̱nú. Rí xúgi̱ kuwanʼ mbiʼi ríʼkhín. Rígi̱ nindxu̱u̱ tikhuu rí Biblia niʼthi marigá:

Agu̱ʼ mba̱ʼu̱. «Numuu rí matuxu̱u̱ mbá numbaa masañuʼ ga̱jma̱a̱ imbá numbaa, xúʼkue̱ má matuxu̱u̱ mbá xuajin rí mba̱a̱ masañuʼ ga̱jma̱a̱ imbá xuajin rí mba̱a̱.» (Mateo 24:7.) Nimbánuu rí kiʼtáriyaʼ. Ndu nákha tsiguʼ 1914 niríga̱ a̱jma̱ agu̱ʼ mba̱ʼu̱ xúgíʼ numbaa xúʼkhii̱n máʼ iʼwaaʼ agu̱ʼ ma̱jkha̱ʼ. Ra̱ʼkhá tháán mbíʼín wéñuʼ xa̱bu̱ ekañún ikhí.

Narígá nandii ndu náa. «Marigá nandii jndo náa u» (Lucas 21:11). Ngu nirígá tsinaʼ rígi̱ rá, naríga̱ má. Cáncer, nandii rí naxnún náa ámiún, teʼdii, nuxi̱ʼ numixúnʼ, sida mangoo iʼwaaʼ nandii egudiin mbíʼín wéñuʼ xa̱bu̱.

Nda̱a̱ wéñuʼ ganitsu. Xúgíʼ numbaa kúwi̱i̱n xa̱bu̱ bí nangua guaʼda rí muphu. Mbíʼín wéñuʼ xa̱bu̱ ekañún ga̱jma̱a̱ ewiiʼ xúgíʼ tsiguʼ. Rígi̱ nindxu̱u̱ imbo̱o̱ tsinaʼ rí ku̱ba̱ʼ mitsaan xtáa mijngii. Ná ajngáa raunʼ Dió naʼthi: «Ga marigá ewiiʼ» (Marcos 13:8).

Gaʼxma. «Jame triga̱ náa rí mapu gake̱ maʼxma.» (Mateo 24:7.) Rígi̱ mangoo nimbánuu rí mbiʼi xúgi̱. Ra̱ʼkhá tháán mbíʼín wéñuʼ xa̱bu̱ ekañún ga̱jma̱a̱ numuu gaʼxma ajndu nákha tsiguʼ 1914.

Xa̱bu̱ ra̱míjínʼ. Xa̱bu̱ murí makuwa xa̱bu̱ su mundxaʼjuamijná índo̱ jma̱a̱ numuu ikhíínʼ u mangoo jma̱a̱ manigu̱nʼ wéñuʼ mbújkha̱a̱. Ga itháan muni rí manigu̱nʼ ikhíínʼ wi xuni rí mbuyaʼe Dió. E̱ji̱n jma̱a̱ maxunimbu̱u̱n kuñú ana̱ ñi (2 Timoteo 3:1-5). Lá nangua kúwi̱i̱n wéñuʼ xúʼkhii̱n xa̱bu̱ xúgi̱ rí. Tseyamajkuíí Dió mangoo nuniu̱n wéñuʼ dí raʼkhí bí nandun ma̱jma̱ñún ga̱jma̱a̱ numuu ikhaa.

Delito. Mangoo marigá «rí phú xogi̱ʼ rí ra̱mejanʼ» (Mateo 24:12). Mbáá xúʼkhii̱n má tayaa mangáanʼ rí naríga̱ wéñuʼ dí ra̱májánʼ mbiʼi xúgi̱, ra̱ʼkháa xó iʼwaaʼ tsiguʼ. Ajndu náa kuwa xa̱bu̱ bí nuniku̱ʼwáʼ, nunindu̱wa̱ʼ nuniu̱n dí ra̱májánʼ eʼwíínʼ xa̱bu̱.

Xúgíʼ rígi̱ nasngájma rí Reino ndrigóó Dió xtáa mijngii. «Xkuaʼnii máʼ mangaa, xí ndu̱ya̱a̱la naríga̱ rí nithalaʼ jáma̱á: gu̱ya̱álaʼ rí inumáʼ na̱gi̱ʼdu̱u̱n naʼthán ñajon Ana̱ʼlóʼ Mikuíí» (Lucas 21:31, Ajngáa noxeʼ rí niʼtháán SA̱N LÚKA̱S). Mú, káʼnii lá nindxu̱u̱ Reino ndrigo̱o̱ Dió. Ikhaa nindxu̱u̱ náa eʼthá ñajunʼ Dió bí xtáa mekuíí ikhaa maʼni̱i̱ numbaa mbó ku̱ba̱ʼ mitsaan. Reino ndrigóó Dió maʼnigambíín xúgínʼ xa̱bu̱ ñajunʼ bí kuwa xúgi̱ (Mateo 6:10).