Kíxnuu 11

Gunigaʼduun kamba̱a̱ rí tseʼsngáá gajkhun

Gixa̱a̱ gajmíín xa̱bu̱ wéñiʼ ndrigio̱o̱ tsíñún muʼni ñajunʼ Dió. Ikhíínʼ nugi̱ʼ rí murajñún xúgínʼ xa̱bu̱ náa Dió. Xú káʼnii eni xá. Mbó rí najmún kamba̱a̱ rí naʼsngáá dí ragajkhun (2 Corintios 11:13-15). Nindxu̱u̱ kamba̱a̱ ndu̱wa̱ʼ ámu tseʼsngáá rí gajkhun dí rígá náa Biblia. Kamba̱a̱ ragajkhun nindxu̱u̱ xó mbújkha̱a̱ dí ragajkhun: ndu xó gajkhun tayaa mú nda̱a̱ kayuuʼ numuu. Ajndu ma̱ʼga̱ kaguanʼ maguaʼda wéñuʼ ajngáá.

Kamba̱a̱ ragajkhun nangua xú manigu̱ʼ Jeobá, Dió bí naʼthi má xúʼkhii̱n rí gajkhun. Índo̱ Jesús nixtáa náa tsu̱du̱u̱ ku̱ba̱ʼ, mbá chimbaʼín xa̱bu̱ bí nigun ginuu nisngúún eʼwíínʼ xa̱bu̱ ga̱jma̱a̱ numuu Dió ikhíínʼ nigi̱ʼ muxiyáá Jesús. Ikhíínʼ nindxa̱ʼwa̱mijna̱ rí xú eyamajkuíí Dió ikhaa phú jmbuu. Nithi: «Mbáwii ana̱ʼxuʼ kuaʼda, ikhaa suʼkui ñajunʼ Dió». Mú, lá ikhaa kayuuʼ nindxa̱ʼó edxu̱u̱ Jesús rí. Nangua. Ikhaa niriʼña: «Gixa̱a̱ ñajunʼ ana̱ʼla jalaʼ» (Juan 8:41, 44). Rí mbiʼi xúgi̱, mbíʼín xa̱bu̱ ekumún rí kuwa nduyamajkuíí Dió, mú bí phú nuniñajunʼ ikhaa má Gixa̱a̱ gajmíín xa̱bu̱ wéñiʼ ndrigio̱o̱ (1 Corintios 10:20).

Xó mbóó ixi̱ ni̱ʼga̱ ra̱májánʼ xndúú exná, xúʼkhii̱n máʼ xa̱bu̱ ra̱míjínʼ nagajnun náa kamba̱a̱ náa tsesngáá rí gajkhun. Ná numbaa kajtíí wéñuʼ xkujndu numuu rí nuni dí ra̱májánʼ xa̱bu̱. Rígá aʼkhá rí nuxuda̱mi̱jna̱ mbáá aʼgu̱ ga̱jma̱a̱ mbáá xa̱biya̱, nuxmijná, naríga̱ tsiku̱wa̱ʼ na̱jma̱gíníín wéñuʼ xa̱bu̱, nuradíín xa̱bu̱, nutsijmin gu̱ʼu̱. Mbíʼín xa̱bu̱ bí nuni xúgíʼ rígi̱ naguun mbóó kamba̱a̱, mú kamba̱a̱ rígi̱ tseʼniún muni rí májánʼ. Ámu nuniñanʼ runi xúgíʼ dí ra̱májánʼ mandoo mambaxún májánʼ gajmiún Dió (Mateo 7:17, 18).

Kamba̱a̱ rí tseʼsngáá gajkhun naʼsngúún xa̱bu̱ rí mugrígi̱i̱n xándú. Dió naʼtulúʼ dí ragiʼmáanʼ mugrígi̱i̱n xándú. Rígi̱ rí májánʼ. Lá maniguluʼ rí mbáá xa̱bu̱ maʼtamijna ga̱jma̱a̱ xtiʼkhuluʼ, rígáá ikháanʼ ajndu tseʼtulu. Lá mandoo mambaxa̱ʼ májánʼ jma̱ʼ xa̱bu̱ bu̱ʼkhi̱ rí. Nangua, xandoo kha. Jeobá nandoo rí xa̱bu̱ muthán ikhaa minaʼ, ra̱ʼkháa rí muthán mbáá xándú ajndu má mbóó xtiʼkhu rí nangua eʼya (1 Corintios 10:14).

Kamba̱a̱ dí ragajkhun naʼsngáá rí májánʼ mataxiyáá imba̱a̱ xa̱bu̱ ámu naríga̱ agu̱ʼ. Jesús niʼthi rí bí nambaxu̱u̱n májánʼ gajmiún Dió ki̱nikhiin gaʼndun kuyamijná. Tseradíín xa̱bu̱ bí nandulúʼ kuʼñún (Juan 13:35). Ajndu má ra̱májánʼ mataxiyáá xa̱bu̱ bí naʼni dí ra̱májánʼ. Índo̱ nigun xa̱bu̱ bí sia̱nʼ gajmíín Jesús gura̱jtu̱wiin, ikhaa taniñunʼ rí xa̱bi̱i̱ bí nagun ki̱dxu̱ʼ muruguambayíí muxmijna̱ jma̱a̱ numuu (Mateo 26:51, 52).

Kamba̱a̱ rí naʼsngáá dí ragajkhun naʼsngúún xa̱bu̱ rí bí nuni dí ra̱májánʼ majmagíníín náa agu̱ʼ mikhíín. Mú, náa ajngáa raunʼ Dió naʼsngáá rí aʼkhá na̱jkha̱ kaguanʼ makañulúʼ (Romanos 6:23). Jeobá naʼni a̱jkiu̱u̱n kaʼñún xúgínʼ. Lá maʼni gíníín xa̱bu̱ kámuu mbiʼi mbáá Dió bí nandoo kaʼyulúʼ rí. Xáʼni xúʼkhii̱n xka. Náa ku̱ba̱ʼ mitsaan maríga̱ mbóó kamba̱a̱ gú, kamba̱a̱ rí enigu̱ʼ Jeobá (Ri huasjŋgajma Juan 15:4). Xúgíʼ iʼwaaʼ kamba̱a̱ rí nusngáá ndu̱wa̱ʼ ndrigóó Gixa̱a̱ mandáti̱ga̱a̱.