Ndiéjunʼ ñajunʼ eni bi̱ kuya̱ edxu̱u̱ náa congregación rá.

Náa organización ndrígáxoʼ ndawi̱i̱n ndxajkhun bi̱ nuni numún. Xó má niguma nákha ginii náa mámbá congregación cristiana, xúʼko̱ má ma̱ngaa xúgi̱ nuraʼwíín tikhun bi̱ muyegun edxu̱u̱ bi̱ najmañún wéñuʼ “mu mbuyaun su nacumu cuya” Dios (Hechos 20:28). Bi̱ kuya̱ edxu̱u̱ bugi̱ nindxu̱ún xa̱bekha bi̱ nambáxu̱u̱n gajmiún Dios bi̱ nuxna ikha ga̱jma̱a̱ nuñewu̱u̱n xa̱bu̱ bi̱ kuwa náa congregación, “raʼcaʼ jma siaqui, ri indo mejanʼ aʼcunʼla udicun [náa inuu Dios;] xuni xuri indo mudaʼ di-u mbuca ri indo gagui aʼcunʼla udicun” (1 Pedro 5:1-3). Ndiéjunʼ eni ga̱jma̱a̱ numulúʼ xáʼ.

Ikhiin nuñewanloʼ ga̱jma̱a̱ naxmiéjunʼ á mu rí kuwáanʼ májánʼ. Bi̱ kuya̱ edxu̱u̱ nuxnun ikha ga̱jma̱a̱ numbañún bi̱ kuwa náa congregación mu mambaxún gajmiún Dios. Ikhiin nduyáá májánʼ rí Dios má nixnún ñajunʼ rí gíʼdoo wéñuʼ numuu, ikha jngó ikhiin tsenigináanʼxo, ikhiin nuni rí makuwáanʼlo májánʼ ga̱jma̱a̱ gagi (2 Corintios 1:24). Xó má mbáa báxtúu nañewu̱u̱n májánʼ wéñuʼ mámbáa mugiu̱u̱, bi̱ kuya̱ edxu̱u̱ naxmiéjunʼ mu muniʼnuʼ mámbíin bi̱ ñajunʼ xa̱bi̱i̱ Dios (Proverbios 27:23).

Nusngúxoʼ xú káʼnii munixo rí nandoo Dios. Mámbá xmáná bi̱ kuya̱ edxu̱u̱ gajkuáa ñawúunʼ rí miʼsngáa májánʼ náa nagimbáanʼxo, rígi̱ nambáyaxoʼ mu maʼni itháan gujkhuʼ fe ndrígáxoʼ (Hechos 15:32). Xa̱bekha bugi nutaraʼa ga̱jma̱á nindxaxoʼ ma̱ngaa nusngúxoʼ mu ma̱ndoo monexo i̱ʼwáʼ ñajunʼ ndrígóo Jeobá ga̱jma̱a̱ nuyegun edxu̱u̱ náa najuiʼtaraʼa.

Nuxnaxo tsiakii mámbáa dí ikháanʼ. Mu mambayáxo mambáxaxoʼ itháan májánʼ gajmiáxo Jeobá, bi̱ kuya̱ edxu̱u̱ nagún náa guʼwáxoʼ mu mutamijná ga̱jma̱á nindxaxoʼ ma̱ngaa náa Guʼwá nagimbáanʼxo, ga̱jma̱a̱ nuxnuxoʼ tsiakii rí eʼkha̱ raʼthí náa Escrituras (Santiago 5:14, 15).

Maski ajndu guáʼdáá mbá ñajunʼ rí muni náa congregación, mbaʼin bi̱ kuya̱ edxu̱u̱ náa nagimbáanʼxo guáʼdáá mbá ñajunʼ náa makanun mbújkha̱a̱ ga̱jma̱a̱ guáʼdiin guʼñún ga̱jma̱a̱ ejñún bi̱ mumbañún ma̱ngaa muñewu̱u̱n. A̱ngia̱xoʼ bi̱ nuñajunʼ wéñuʼ ndayóoʼ rí mbuʼyamajkhún (1 Tesalonicenses 5:12, 13).

• Ndiejunʼ ñajunʼ eni bi̱ kuya̱ edxu̱u̱ náa congregación rá.

• Xú káʼnii esngajma rí naxmiéjunʼ kuyaxoʼ mámbáa rí ikháanʼxo rá.