Xú kaʼnii embayáxoʼ superintendente ndrígóo circuito rá.

Náa Escrituras Griegas Cristianas naʼthí mbaʼa ikho ga̱jma̱a̱ numuu Bernabé ma̱ngaa apóstol Pablo. Xa̱bekha bugi ninindxu̱ún superintendentes viajantes bi̱ nigún gúñun bi̱ kuwa náa mámbá congregación dí nirígá nákha ikhú. Náa numuu rá. Numuu rí ikhiin phú nixmiéjunʼ kuñún rí xú káʼnii kuwa angiún náa inuu Dios. Pablo nisngajma rí nindoo matanga̱a̱ gáʼñun a̱ngiu̱ún mu mbaʼyoo xú káʼnii kuwa. Taxmiéjunʼ rí maʼga̱ mitsinguánʼ wéñuʼ mu maxnún tsiakii a̱ngui̱i̱n (Hechos 15:36). Ikhaa má rúʼko̱ rí naxkaxi̱i̱n muni superintendentes viajantes rí mbiʼi xúgi̱.

Naguwáʼ mu muxnuxoʼ tsiakii. Mámbáa superintendente ndrígóo circuito na̱jkha̱ itháan maʼni rí mbá skíñúʼ congregación ga̱jma̱a̱ naxtáa mbá xmáná náa mámbá congregación, a̱jma̱ nuthu ejkha̱ rí mbá tsiguʼ. Ma̱ndoo majmañaxoʼ wéñuʼ náa a̱ngia̱xo ga̱jma̱a̱ náa guʼñún, á mu ikhiin ñajúnʼ xa̱bu̱ gajmin. Superintendentes gajmiún guʼñún nugíiʼ nuniʼnúnʼ jiáma ga̱jma̱a̱ wa̱ʼxa̱ʼ, xúʼko̱ má xa̱bu̱ wanii ma̱ngaa, ga̱jma̱a̱ ikhiin nandún wéñuʼ magun gutaraʼa ga̱jma̱á nindxaxoʼ ma̱ngaa rí muʼguáxo gúñu̱u̱n xa̱bu̱ bi̱ nusngúúnxo ga̱jma̱a̱ numuu Biblia. Superintendentes tsige nagún gajmiún bi̱ kuya̱ edxu̱u̱ náa congregación mu muxnún ikha a̱ngia̱lo; ma̱ngaa nuxna discurso rí májánʼ wéñuʼ náa guʼwá nagimbáanʼxo ga̱jma̱a̱ náa asamblea, ikhaa rígi̱ naxnáxoʼ tsiakii (Hechos 15:35).

Naxmiéjunʼ kuñún xúgínʼ. Superintendente ndrígóo circuito naxmiéjúnʼ kuñún wéñuʼ rí xú káʼnii kuwa náa inuu Dios a̱ngia̱xoʼ bi̱ kuwa náa congregación. Nagimbíin gajmiún bi̱ kuya̱ edxu̱u̱ ga̱jma̱a̱ siervos ministeriales mu mbuyáá xú káʼnii ni̱jkha̱ rajoo ñajunʼ rí nini ma̱ngaa mu muxnún consejo rí mambáñún mu munimbánii ñajunʼ ndrígu̱ún. Numbañún precursor mu mutaraʼa itháan májánʼ ga̱jma̱a̱ dí musngúún iʼwíínʼ xa̱bu̱, ma̱ngaa nadxún wéñuʼ índo̱ nuniʼnuʼ xa̱bu̱ bi̱ nugi̱ʼdi̱i̱ nagún náa nagimbáanʼxo ma̱ngaa índo̱ nduyáá rí na̱jkha̱ rajoo rí najmañún ga̱jma̱a̱ numuu Dios. Mámbáa ndxájuaxoʼ bugi̱ “nañajunʼ” wéñuʼ mu makuwáanʼxo májánʼ (2 Corintios 8:23). Guʼyaridáá fe ndrígu̱ún ga̱jma̱a̱ xú káʼnii eyamajkuíí Dios (Hebreos 13:7).

• Náa numuu rí nagún náa mámbá congregación superintendente ndrígóo circuito rá.

• Xú káʼnii gándoo mambáyaʼ ikháánʼ índo̱ naguwáʼ gúyalo náa guʼwá nagimbáanʼ rá.