KÍXNUU 21

Ndiéjunʼ ñajunʼ Betel rá.

A̱jmi̱i̱n bi̱ nutaraʼa numuu Jeobá kuwa ruñajunʼ náa naguma xtiʼkhu náa Betel — Náa naguma xtiʼkhu (Estados Unidos)

Mbáa bi̱ naʼtáraʼa numuu Jeobá nañajunʼ náa imprenta ndrígóo Betel dí rígá xuajen Alemania — Alemania

Mbáa bi̱ naʼtáraʼa numuu Jeobá nañajunʼ náa ndaʼu̱u̱ xtíin náa Betel dí rígá náa xuajen Kenia — Kenia

Meseros nuni májáánʼ mesa náa comedor ndrígóo Betel dí rígá náa xuajen Colombia — Colombia

Náa ajngáa hebreo Betel nandoo gáʼthi “Guʼwá ndrígóo Dios” (Génesis 28:17, 19, nota). Májánʼ rí xúʼko̱ mbiʼyuu mbaʼa guʼwá rí kuáʼdááxo bi̱ nutaráʼaxo numuu Jeobá náa xúgíʼ tsu̱du̱u̱ numbaaʼ ga̱jma̱a̱ asndu ikhí nuxna ikha ga̱jma̱a̱ nuruguambáá mu miʼtáraʼa. Mbá nguathi̱i̱n bi̱ Guáʼdáá mbá ñajunʼ kuwa náa guʼwá rí nuxna ikha náa xúgíʼ sucursal, guʼwá rígi̱ gíiʼ náa estado ndrígóo Nueva York (Estados Unidos), asndu ikhí exna ikha náa mbaʼa sucursal dí rígá náa i̱ʼwáʼ xuajin mba̱ʼu̱. A̱ngia̱xoʼ bi̱ nuñajunʼ náa guʼwá rígi̱ najmaʼnuʼ xóo mbá familia Betel. Xó má náa mbá guʼwíin nuphiʼtsu ga̱jma̱a̱ kúwi̱i̱n mbóó, nuñajunʼ ma̱ngaa nunigajmaa̱ Biblia mbá kambáxuun (Salmo 133:1).

Xúgínʼ bi̱ nuñajunʼ náa guʼwá kiejunʼ rígi̱ nuxnaximijna káxi̱. Mámbá guʼwá Betel kuwa xa̱bekha ga̱jma̱a̱ gu̱ʼu̱ bi̱ nuni rí nandoo Dios ga̱jma̱a̱ nuni káxi̱ ñajunʼ ndrígóo Reino (Mateo 6:33). Nimbáa na̱nguá eni numáá, mú nuxnún guʼwá náa makuwa ga̱jma̱a̱ rí muphu̱, ga̱jma̱a̱ nuxnún mbá chíʼgíʼ mbújkha̱a̱ mu majmúún náa rí nda̱ñúnʼ. Mámbáa tsáa gíʼdoo mbá ñajunʼ dí nijuixnáán maʼni: Tikhun kuwa náa oficina, náa nunimájánʼ ganitsu o náa comedor; iʼwíínʼ kuwa náa nuni i̱yi̱i̱ʼ o náa nagájnuu i̱yi̱i̱ʼ; iʼwíínʼ nuni kaʼwi̱i̱ guʼwá, tikhun kuwa náa nujñáa xtíin, iʼwíínʼ nuni̱i̱ rí nachúu.

Náa rígá wéñuʼ ñajunʼ rí nayambáá mu miʼtáraʼa numuu Reino. Rí phú nuni náa mámbá guʼwá Betel rí mbaʼin wéñuʼ xa̱bu̱ mudxawíín rí gajkhun rí na̱ʼkha̱ raʼthí náa Biblia. Folleto rígi̱ ñajunʼ mbá xkri̱da rí nasngájma rígi̱. Mbá nguathi̱i̱n bi̱ Guáʼdáá mbá ñajunʼ nithi xú káʼnii maguma i̱yi̱i̱ʼ rígi̱ ga̱jma̱a̱ nixuʼma náa computadora náa mbaʼin equipo bi̱ nurawíi ajngáa náa xúgíʼ tsu̱du̱u̱ numbaaʼ, nda̱wa̱á nirawíi nacha̱ wéñuʼ i̱yi̱i̱ʼ náa prensa dí rígá náa mbaʼa xuajin mba̱ʼu̱ ma̱ngaa nixuʼma náa itháan rí 110,000 congregación. Índo̱ naguma mámbá ñajunʼ rígi̱, xúgínʼ bi̱ kuwa náa guʼwá Betel nuruguambáá mu miʼtáraʼa nacha̱ ajngáa rí májánʼ (Marcos 13:10).

Tsíin lá ni̱ndxu̱ún bi̱ nuñajunʼ náa guʼwá Betel ga̱jma̱a̱ ndiéjunʼ rí najuixnún ikhí rá.
Xú káʼnii ñajunʼ dí gíʼdoo wéñuʼ numuu eni náa mámbá guʼwá Betel rá.