Tsáa ninindxu̱u̱ Job rá.

Náa mbá xuajen dí mbiʼyuu Uz, nixtáa mbáa xa̱bu̱ bi̱ ndiʼyamajkuu Jeobá. Ikhaa nigumbiʼyuu Job, nigiʼdoo wéñuʼ ma̱ngaa nigiʼdiin mbaʼin e̱ji̱i̱n. Ninindxu̱u̱ májáánʼ xa̱bu̱ ga̱jma̱a̱ ma̱ngaa nimbáñuun xa̱bu̱ gíníi, gu̱ʼú xuáʼa̱ ga̱jma̱a̱ e̱ji̱n bi̱ na̱nguá guáʼdiin anu̱ún. Job niʼni rí májánʼ. Lá naku̱ma̱ʼ ikháánʼ dí xágiʼdoo xkujndu numuu dí phú májánʼ a̱jkiu̱u̱n xáʼ.

Job na̱nguá eʼyoo dí Gixa̱a̱ xtáa raʼyoo. Jeobá niʼthúu̱n Satanás: “Lá nitayáá xa̱bi̱ʼ Job rá. Nda̱wa̱a̱ imba̱a̱ xóo ikhaa náa tsu̱du̱u̱ ku̱ba̱ʼ. Naʼnimbo̱o̱ ga̱jma̱a̱ naʼni dí májánʼ”. Satanás niriʼñuu: “Gajkhun dí naʼnimbo̱o̱ numuu dí ikháánʼ natiewa̱a̱n, natani tsajkurámaaʼ, naraxnáá ku̱ba̱ʼ ga̱jma̱a̱ xujkhúʼ... Atrígú kaʼyííʼ xúgíʼ ga̱jma̱a̱ ní xáʼyamajkhuaʼ itháan”. Jeobá niʼthúu̱n: “Ma̱ndoo matani mamínuʼ mú xátaxíyáa”. Jeobá niniñuʼ dí Satanás maʼni dí mamínuʼ Job, natayáá náa numuu ráʼ. Numuu dí ndaʼyoo rí Job maʼnimbo̱o̱ má xúʼko̱.

Mbaʼa dí niʼni Satanás mú mamínuʼ Job. Timbá, nijmiuu xa̱bu̱ xuajen sabeos mu muni kuʼwíínʼ xúgínʼ xediu̱u̱ ga̱jma̱a̱ búrriu̱u̱. Nda̱wa̱á nikhiin xúgínʼ mugiu̱u̱. Eʼwíínʼ xa̱bu̱, bi̱ ninindxu̱ún caldeos, nini kuʼwíínʼ camellos ndrígóo. Ma̱ngaa niradíin xúgínʼ bi̱ nuña̱wu̱u̱n xujkiúu. Mú itháan gíná nirígá nda̱wa̱á: Xúgínʼ e̱ji̱i̱n Job nikháñun índo̱ guʼwá náa kajchún ruphiʼtsu nirngáxi̱i̱. Job nixtáa gíná wéñuʼ, mú na̱nguá niniñuʼ raʼyamajkuu Jeobá.

Satanás nindoo dí Job mamínuʼ itháan, ikha jngó niʼni dí magiʼdoo nandii náa xúgíʼ xuyuʼ. Rúʼko̱ niʼni dí mikhu wéñuʼ. Ikhaa na̱nguá eʼyoo náa numuu dí namínuʼ wéñuʼ, mú niʼtákáñuu má xúʼko̱ Jeobá. Dios ndiʼyoo xúgíʼ dí niʼni Job ga̱jma̱a̱ nixtáa gagi.

Nda̱wa̱á Satanás nikuʼmiin ajtsíin xa̱bu̱ muni dí maxtáa itháan gíná Job. Ikhiin nitháán: “Mbáa nitani̱ aʼkhá ga̱jma̱a̱ nandaʼ matarkaʼwu. Ikha jngó Dios naʼni dí matamíniiʼ”. Job niriʼña: “Ikhúúnʼ na̱nguá nini nimbá dí raʼkhí”. Mú nda̱wa̱á nigíʼdu̱u̱ nikumu̱u̱ dí Jeobá gíʼdoo aʼkhúun náa xúgíʼ xkujndu dí niraʼnuu ga̱jma̱a̱ niʼthí dí Dios na̱nguá nindxu̱u̱ jmbii xó má ikhaa.

Mbáa dxámá bi̱ mbiʼyuu Elihú nixtáa raʼdxuun xúgíʼ dí nithi. Mú nda̱wa̱á niʼthí: “Xúgiáanʼ ikháanʼ raʼkhí dí kuwaanʼ ru̱tha̱. Jeobá nindxu̱u̱ májánʼ, itháan ki xóo dí nundxa̱ʼwa̱míjna̱lu, ikhaa xáʼni nimbá dí raʼkhí. Ndaʼyoo xúgíʼ ga̱jma̱a̱ nambáñun xa̱bu̱ índo̱ guáʼdáá xkujndu”.

Jeobá ma̱ngaa niʼtámíjná ga̱jma̱a̱ Job. Niʼthúu̱n: “Náa minaʼ xtaa ikháánʼ índo̱ ikhúúnʼ nini mekhu ga̱jma̱a̱ ku̱ba̱ʼ rá. Náa numuu natatsaʼwáminaʼ dí ra̱májánʼ a̱jkiu̱nʼ ga̱jma̱á ni̱ndxa̱ʼ rá. Naratá maski ajndu na̱nguá tayáá náa numuu erígá”. Job ndiʼyoo dí raʼkhí niʼni ga̱jma̱a̱ niʼthí: “Ningruʼún. Atani mba̱a̱ a̱jkia̱nʼ xta̱yo̱ʼ ga̱jma̱a̱ numuu dí nitha. Nidxuun ga̱jma̱a̱ numaʼ mú xúgi̱ naniʼnííʼ gajkhun ga̱jma̱a̱ nda̱yo̱o̱ dí ikháánʼ ma̱ndoo matani xúgíʼ”.

Índo̱ ninújngoo xúgíʼ gamiéjunʼ, Jeobá niʼni thanuu Job ga̱jma̱a̱ nixnúu itháan dí magiʼdoo ki xóo dí nigiʼdoo nákha ginii. Job nixtáa mba̱yu̱ʼ tsiguʼ ga̱jma̱a̱ gagi. Jeobá niʼni tsajkurámaaʼ numuu rí niʼnimbo̱o̱ má xúʼko̱, maski ajndu ninindxu̱u̱ mingíjyúuʼ. Ikháánʼ rá. Lá manindxa̱ʼ xóo Job ga̱jma̱a̱ matayamajkuíí má xúʼko̱ Jeobá, garigá má dí gárígá ráʼ.